ၵၢင်ဝဵင်းသီႇပေႃႉ မိူင်းတႆးပွတ်းႁွင်ႇၼၼ်ႉ ၾႆးမႆႈႁၢၼ်ႉၶပ်ႉ/ပေႃႉလိၵ်ႉ တီႈပွၵ်ႉၵၢတ်ႇ လူႉသုမ်းၵႂႃႇ ၶၼ်ငိုၼ်း မွၵ်ႈ 40 သႅၼ်ပျႃး ဝႃႈၼႆ။
ဝၼ်းတီႈ 8/12/2020 ယၢမ်းၵၢင်ၶိုၼ်း မွၵ်ႈ 11 မူင်းပၢႆၼၼ်ႉ ၾႆးမႆႈႁၢၼ်ႉၶပ်ႉလိၵ်ႈ ပေႃႉလိၵ်ႈ ၸိုဝ်ႈႁၢၼ်ႉႁွင်ႉဝႃႈ ႁၢၼ်ႉ ဢူဝ်ပႃးမႃး ဢၼ်ပိုတ်ႇဝႆႉတၢင်းၾၢႆႇၼႃႈဝတ်ႉထမ်ႇမႃႇယူင်ႇ ၵၢင်ဝဵင်း ပွၵ်ႉၵၢတ်ႇ ဝဵင်းသီႇပေႃႉ ၸိုင်ႈတႆးပွတ်းႁွင်ႇ၊ တူမ်ႈ ၶဝ်ႈသွႆးၵိၼ်၊ ၾႆးၾႃႉသမ်ႉၶၢတ်ႇ၊ ၵူၼ်းၼႂ်းႁၢၼ်ႉသမ်ႉဢွၵ်ႇၵႂႃႇတၢင်းၼွၵ်ႈပႅတ်ႈ၊ ၽိူဝ်ႇၾႆးမႃးၵေႃႈ ဢဝ်ယဵၼ်းပဵၼ်ၾႆး လုၵ်ႉလၢမ်းမႆႈ ႁၢၼ်ႉပေႃႉလိၵ်ႈမူတ်း။
ၸၢႆးလၢဝ် ၵူၼ်းသီႇပေႃႉ လၢတ်ႈဝႃႈ – “ၸႂ်ႈၶႃႈဢေႃႈ ၵူၼ်းႁဵတ်းၵၢၼ်တီႈၼၼ်ႈ ၶဝ်တေတၢင်ႈမေႃႈၶဝ်ႈသွႆးဝႆႉသေ လိုမ်း ပိၵ်ႉ ၾႆးဢေႃႈ။ ၾႆးသမ်ႉၶၢတ်ႇၵႂႃႇၼၼ်ႉၶႃႈၼႃႇ၊ ၽိူဝ်ႇၾႆးမႃးၵေႃႈ မႆႈယဝ်ႉၶႃႈယိုင် ”- ဝႃႈၼႆ။
ဢိင်ၼိူဝ် လွင်ႈၾႆးမႆႈၼႆႉသေ ၼႂ်းႁၢၼ်ႉၼၼ်ႉ မႆႈပႃးၶွမ်ႊပိဝ်ႊတိူဝ်ႊ၊ ပရိၼ်ႊတိူဝ်ႊ၊ ၶိူင်ႈလွၵ်ႈၽိုၼ်မိူၼ် ၸိူဝ်းၼႆႉပႃး ဝႃႈၼႆ။
ၵဵဝ်ႇၵပ်းလွင်ႈၼႆႉသေ ယူႇတီႈၵူၼ်းႁိမ်းႁွမ်းလႄႈ ရူတ်ႉၵႃးၾၢႆႇၶႄၾႆး သီႇပေႃႉ လႆႈမႃးၸွႆႈႁူတ်းမွတ်ႇ၊ ဢမ်ႇတၼ်း လၢမ်းမႆႈပႃးတၢင်ႇႁိူၼ်း ဝႃႈၼႆ။
