ၼႂ်းၸႄႈဝဵင်းၼမ်ႉတူႈၼၼ်ႉ ယၢမ်းလဵဝ်ပၢင်တိုၵ်းယဵၼ်ဝႆႉယူႇသေတႃႉ သိုၵ်းတင်းသွင်ၾၢႆႇတိုၵ်ႉထႅမ်ႁႅင်းသိုၵ်းယူႇၵူၺ်းဢမ်ႇၵႃး သိုၵ်းလူင်ပွင်ၸိုင်ႈၵေႃႈလူင်းတဝ်ၵူတ်ႇထတ်းၼႂ်းပိုၼ်ႉတီႈပဵၼ်ပၢင်တိုၵ်းမိူဝ်ႈဝႃးၼႆႉလႄႈ ၵူၼ်းမိူင်းၵူဝ်ပဵၼ်ပၢင်တိုၵ်းထႅင်ႈ ဢွၼ်ၵၼ်ပၢႆႈၽေးသိုၵ်းမႃးထိုင်မၢၼ်ႈၸၢမ် မီး 200 ပၢႆယဝ်ႉဝႃႈၼႆ။
လုင်းပႃႉၺၢၼ်ႇ ၵႅမ်ၶွမ်ႊမတီႊၸွႆႈထႅမ်ၵူၼ်းပၢႆႈၽေးသိုၵ်း တီႈၼမ်ႉတူႈ လၢတ်ႈဝႃႈ -“ၸႂ်ႈၶႃႈယဝ်ႉ ယၢမ်းလဵဝ် ပၢႆႈမႃးမီးဝႆႉသွင်တီႈ။ တီႈမၢၼ်ႈၸၢမ် တီႈၼိုင်ႈလႄႈ ဝၢၼ်ႈပၢင်ၶႅမ် တီႈၼိုင်ႈ။ လွင်ႈၵိၼ်ယႅမ်ႉတႄႉ ဢမ်ႇလႆႈမႆႈၸႂ်သင်ၶႃႈ ႁဝ်းၶႃႈလႆႈ ၵမ်ႉၸွႆႈ ဝႆႉယဝ်ႉ” – ဝႃႈၼႆ။
ပၢင်တိုၵ်းၼႆႉ ပဵၼ်သိုၵ်းၸုမ်းဢူၺ်းလီပွတ်းႁွင်ႇဢၼ်မီး တပ်ႉသိုၵ်း TNLA, SSPP ၶဝ်ၶဝ်ႈပႃးဝႆႉလႄႈတင်း တပ်ႉသိုၵ်း RCSS ပိုတ်းယိုဝ်းၵၼ်ၼႂ်းဢိူင်ႇၼမ်ႉတွင်ႇၵူင်း မိူဝ်ႈဝႃးၵၢင်ၼႂ်။ သဵင်ပိုတ်းယိုဝ်းၵၼ်ယဵၼ်လူင်းၵႂႃႇၸဵမ်မိူဝ်ႈဝႃးၵၢင်ဝၼ်း၊ တေႃႇထိုင်ၼႂ်ၼႆႉ ဢမ်ႇပိုတ်းယိုဝ်းၵၼ်ထႅင်ႈသေတႃႉ တင်းသွင်ၾၢႆႇတိုၵ်ႉထႅမ်ႁႅင်းသိုၵ်းၵၼ်ယူႇလႄႈ ၵူၼ်းဝၢၼ်ႈႁိမ်းႁွမ်းတူၵ်းၸႂ်ငိူင်ႉဝႄႈဝႆႉ။
“ယၢမ်းလဵဝ်ၼႆႉ သမ်ႉပဵၼ်ၶၢဝ်းလူဝ်ႇဢဝ်ၶဝ်ႈ ဢဝ်ၼမ်ႉ ၶဝ်ႈၵၢပ်ႇလႄႈ မိူဝ်ႈၼႆႉ သင်ဝႃႈ ဢမ်ႇမီပၢင်တိုၵ်းယိုဝ်းၵၼ်ယဝ်ႉၼႆတႄႉ ၵူၼ်းပၢႆႈၽေး တေဢွၼ်ၵၼ်ပွၵ်ႈႁိူၼ်းၶိုၼ်းၶႃႈ။ ” – လုင်းပႃႉၺၢၼ်ႇ သိုပ်ႇလၢတ်ႈၼႄ ၼင်ႇ ၼႆ။
ယွၼ်ႉပၢင်တိုၵ်းၼႆႉသေ ၵူၼ်းဝၢၼ်ႈ ပၢႆႈမႃးသွၼ်ႈယူႇဝႆႉသွင်တီႈ ၊ တီႈၵျွင်းႁွင်ႇမၢၼ်ႈၸၢမ် တင်း တီႈဝၢၼ်ႈပၢင်ၶႅမ်။ ၵမ်ႈၼမ် ပဵၼ်ပီႈၼွင်ႉတႆး ။
ၵူၼ်းပိုၼ်ႉတီႈမၢၼ်ႈၸၢမ် လၢတ်ႈဝႃႈ – “ငဝ်းလၢႆးမိူဝ်ႈၼႆႉတႄႉ တပ်ႉပွင်းၸူႉၵေႃႈ တိုၵ်ႉထႅမ်ႁႅင်းမႃးထႅင်ႈယူႇၶႃႈ။ တပ်ႉသိုၵ်း မၢၼ်ႈသမ်ႉ လူင်းၵူတ်ႇထတ်း ဢွင်ႈတီႈ ဢၼ်ၶဝ်ပဵၼ်ပၢင်တိုၵ်းၵၼ် မိူဝ်ႈဝႃးၼၼ်ႉၶႃႈဢေႃႈ။ ပၢင်တိုၵ်း တေပဵၼ် ထႅင်ႈ ဢမ်ႇပဵၼ်ထႅင်ႈဢၼ်ဝႃႈၼၼ်ႉ ၵွပ်ႈဝႃႈ တိုၵ်ႉမီးသၢႆငၢႆ မုင်ႈၼႃးၸူးၵၼ်ယူႇလႄႈ ပၢင်တိုၵ်းၼႆႉ လႅပ်ႈတေဢမ်ႇလွတ်ႈၶႃႈ”- ဝႃႈၼႆ။
ၵူၼ်းပၢႆႈၽေးသိုၵ်း ဢၼ်ပၢႆႈမႃးသွၼ်ႈဝႆႉတီႈၵျွင်းႁွင်ႇမၢၼ်ႇၸၢမ်သမ်ႉ ပဵၼ်ၵူၼ်း ဝၢၼ်ႈၵုၼ်ၵျွင်း၊ ဝၢၼ်ႈၼႃးၵႅင်း၊ ဝၢၼ်ႈ ပဵင်းလူင်၊ ဝၢၼ်ႈၼႃးၵေး ၸိူဝ်းၼႆႉ ႁူဝ်ၵူၼ်းမီး 131 ၵေႃႉ၊ မုင်ႉႁေႃႁိူၼ်း 44 လင်။
တီႈဝၢၼ်ႈပၢင်ၶႅမ်သမ်ႉ ပဵၼ်ၵူၼ်းဝၢၼ်ႈပဵင်းလူင်၊ ၵုၼ်ၵျွင်းလႄႈ ၼႃးၵေး ၵူၺ်းၼင်ႇၵဝ်ႇ ႁူဝ်ၵူၼ်းတင်းမူတ်းမီး 119 ၵေႃႉ မုင်ႉႁေႃႁိူၼ်း 40 လင် ၼႆယဝ်ႉ။
