တီႈဝဵင်းတႃႈၶီႈလဵၵ်း ၵူၼ်းတိတ်းၸပ်းတၢင်းပဵၼ်ၶူဝ်ႊဝိတ်ႉ-19 ၼမ်ၶိုၼ်ႈၵူႈဝၼ်း မိူဝ်ႈဝႃးဝၼ်းလဵဝ် ၵူတ်ႇထတ်းႁၼ် 10 ၵေႃႉ ပႃးလုၵ်ႈဢွၼ်ႇလႅင် ဢႃယု 5 လိူၼ် ၵေႃႉၼိုင်ႈ ဝႃႈၼႆ။
ဝၼ်းတီႈ 8/12/2020 ယၢမ်းၵၢင်ၶမ်ႈ 8 မူင်း ယူႇတီႈႁွင်ႈၵၢၼ်ၵူတ်ႇထတ်းၸိူဝ်ႉမႅင်းၶူဝ်ႊဝိတ်ႉ 19 ပွတ်းၸၢၼ်း ပိုၼ်ၽၢဝ်ႇ ဢွၵ်ႇမႃးဝႃႈ ၼႂ်းၸိုင်ႈတႆးပွတ်းဢွၵ်ႇၶူင်း ၵူၼ်းတိတ်းၸပ်းတၢင်းပဵၼ်တင်းမူတ်းမီး 10 ၵေႃႉ ၼႂ်းၼၼ်ႉ တႃႈၶီႈလဵၵ်း 9 ၵေႃႉ။ တူင်ႈတႃႈ မိူင်းပဵင်း 1 ၵေႃႉ။ ပႃးလုၵ်ႈဢွၼ်ႇလႅင် ဢႃယု 5 လိူၼ် ၵေႃႉၼိုင်ႈ ၼႆယဝ်ႉ။
ၼၢင်းႁွမ် ၸဝ်ႈၶွင်ႁၢၼ်ႉၶၢႆၶူဝ်းၵုၼ် တႃႈၶီႈလဵၵ်းလၢတ်ႈဝႃႈ – “ဝၢႆးသေ ပိုၼ်ၽၢဝ်ႇ ဢွၵ်ႇမႃး ထူပ်းႁၼ်ထႅင်ၵူၼ်းတိတ်းမႅင်း 10 ၵေႃႉၼႆ ၵူၼ်းမိူင်းၵေႃႈယိင်ႈၶႅၼ်းတူၵ်းၸႂ်ဢမ်ႇႁတ်းဢွၵ်ႇဝဵင်း မိူင်းပေႃးယဵၼ်ဢေႃႈ။ ဝၢႆးဝၼ်းၼႆႉၵေႃႈ ဢွၼ်ၵၼ်ဢွၵ်ႇမႃးသိုဝ်ႉတၢင်းၵိၼ်ဢဝ်မိူဝ်းၵဵပ်းဝႆႉ ပႂ်ႉတူၺ်းငဝ်းလၢႆးထႅင်ႈၼေႃႈ။ မိူဝ်ႈၼႆႉပႃးတင်းလုၵ်ႈဢွၼ်ႇလဵၵ်ႉဢွၼ်ႇႁေၵေႃႉၼိုင်ႈလႄႈ ပဵၼ်ဢၼ်လီၵူဝ်လီၾၢင်ႉတူဝ်ၵၼ်တႄႉတႄႉၶႃႈ။ ”- ဝႃႈၼႆ။
ၵူၼ်းၸပ်းတၢင်းပဵၼ် 10 ၵေႃႉၼႆႉ လုၵ်ႈဢွၼ်ႇပႃးၼမ် ၊ ဢႃယုလဵၵ်ႉသုတ်းမီး 5 လိူၼ် ၊ လိူဝ်ၼၼ်ႉ ဢႃယု 1 ၶူပ်ႇၵေႃႉၼိုင်ႈ၊ ဢွၼ်ႇၸၢႆး ဢႃယု 2 ၶူပ်ႇၵေႃႉၼိုင်ႈ၊ ဢွၼ်ႇယိင်း ဢႃယု 15 ပီ ၵေႃႉၼိုင်ႈ ။
ၼွၵ်ႈလိူဝ်သေ ၼႂ်း 10 ၵေႃႉ တၢင်းပွတ်းဢွၵ်ႇၶူင်းၼႆႉယဝ်ႉ တၢင်းပွတ်းၸၢၼ်း ၸႄႈဝဵင်းတူၼ်ႈတီး တိတ်းၸပ်း ၵေႃႉၼိုင်ႈ လႄႈ ၸႄႈမိူင်းယၢင်းလႅင်ထႅင်ႈ ၵေႃႉၼိုင်ႈ ဝႃႈၼႆ။
ယၢမ်းလဵဝ် ၵူၼ်းတိတ်းၸပ်းၸိူဝ်ႉမႅင်းၶူဝ်ႊဝိတ်ႉ 19 ၼႂ်းမိူင်းတႆး သၢမ်ပွတ်းတွၼ်ႈ ဢမ်ႇယွမ်း 500 ပၢႆယဝ်ႉ၊ ပွတ်းၸၢၼ်းၼမ်လိူဝ်ပိူၼ်ႈမီး 300 ပၢႆ၊ ပွတ်းႁွင်ႇ 100 ပၢႆလႄႈ ပွတ်းဢွၵ်ႇၶူင်းၵေႃႈမီး 100 ပၢႆ။
ၼႂ်းမိူင်းႁူမ်ႈတုမ် ပတ်းပိုၼ်ႉ ၵူၼ်းတိတ်းၸပ်းၸိူဝ်ႉမႅင်းၶူဝ်ႊဝိတ်ႉ 19 တင်းမူတ်း 101,739 ၵေႃႉ၊ ယူတ်းယႃ 18,862 ၵေႃႉ၊ ယႃၶႅၼ်း 80,726 ၵေႃႉလႄႈ လူႉတၢႆ 2,151 ၵေႃႉ ယူႇတီႈႁွင်ႈၵၢၼ် ပၢႆးယူႇလီမိူင်းႁူမ်ႈတုမ် ပိုၼ်ၽၢဝ်ႇဢွၵ်ႇဝႆႉၼင်ႇၼႆ။
