ၾႆးမႆႈႁွင်ႈၵဵပ်းၶူဝ်း လႄႈ ႁၢၼ်ႉၶၢႆၶဝ်ႈၽၵ်း တီႈဝဵင်းမူႇၸေႊ ၶူဝ်းၶွင်ဢမ်ႇတၼ်းလႆႈသင် လူႉသုမ်းၼပ်ႉႁူဝ်ပၢၵ်ႇသႅၼ်ပျႃး ။
ဝၼ်းတီႈ 6/12/2020 ယၢမ်းၵၢင်ၼႂ်ၸဝ်ႉ မွၵ်ႈ 4 မူင်းၼႆႉ ၾႆးမႆႈႁွင်ႈၵဵပ်းၶူဝ်းၶွင် (ဂိုဒေါင်) 2 လင်လႄႈ ႁၢၼ်ႉၶၢႆၶဝ်ႈၽၵ်းဢၼ် တိတ်းၵၼ်ၼၼ်ႉ 1 ႁၢၼ်ႉ တီႈပွၵ်ႉၵွင်းမူးတူင်ႈ သိၼ်ႇၽိဝ်ႇဢဵင်ႇယႃႇ ( ဆင်ဖြူအိမ်ယာ) ၼႂ်း ၸႄႈဝဵင်းမူႇၸေႊ ၸိုင်ႈတႆးပွတ်းႁွင်ႇ ၶူဝ်းၶွင်ဢၼ်မႆႈၼႂ်းႁွင်ႈၵဵပ်းၶူဝ်းၸိူဝ်းၼၼ်ႉ မႆႈၸွမ်းၾႆးမူတ်း ဢမ်ႇတၼ်းလႆႈ သင် ၼႆယဝ်ႉ။
ၸၢႆးႁိၼ်လဵၵ်း ၸုမ်းၶၢဝ်ႇထုင်ႉႁူၺ်ႈလီႈ မူႇၸေႊ လၢတ်ႈဝႃႈ – “ၾႆးၼႆႉ တႄႇမႆႈတီႈ ႁွင်ႈၵဵပ်းၶွင် Online Shop ၼၼ်ႉမႃး ဢွၼ်တၢင်းၼႆၶႃႈ။ ယဝ်ႉၵေႃႈ ၸင်ႇလၢမ်းမႆႈမႃးတီႈႁွင်ႈၵဵပ်းၶူဝ်းၶိူင်ႈၸႂ်ႉၼႂ်းၵႃး၊ ပႅတ်ႇထရီႇ ၸိူဝ်းၼႆႉ။ လိူဝ်ၼၼ်ႉ လၢမ်းမႆႈပႃးတီႈႁၢၼ်ႉၶၢႆၶဝ်ႈၽၵ်း တီႈႁိမ်းၼၼ်ႉ ထႅင်ႈႁၢၼ်ႉၼိုင်ႈၶႃႈ။ ယၢမ်းလဵဝ် မၼ်းပဵၼ်လွင်ႈသင်တႄႉတႄႉလႄႈမႆႈ ဢၼ်ဝႃႈၼၼ်ႉ ပႆႇလႆႈ ႁူႉႁူဝ်မၼ်းၶႃႈ ၶဝ်တိုၵ်ႉၵူတ်ႇထတ်းတူၺ်းလွင်ႈတင်းမၼ်းယူႇၼႆၶႃႈဢေႃႈ”- ဝႃႈၼႆ။
ၶူဝ်းၶွင် ဢၼ်ၵဵပ်းဝႆႉ ၼႂ်းႁွင်ႈၵဵပ်းၶွင်ၸိူဝ်းၼၼ်ႉ ဢမ်ႇတၼ်းလႆႈသင် ထုၵ်ႇမႆႈၵႂႃႇ ၸွမ်းၾႆးမူတ်း တေႃႇထိုင်ယၢမ်းလဵဝ် လွင်ႈၶူဝ်းၶွင် ထုၵ်ႇၾႆးၵႂႃႇၸိူဝ်းၼၼ်ႉ တင်းမူတ်း တူၵ်းမႅၼ်ႈၶၼ်ငိုၼ်းၵႃႈၼႆၼၼ်ႉ ယင်းပႆႇလႆႈႁူႉတႅပ်းတေႃး ၼႆယဝ်ႉ။
