ၽႂ်ယၢမ်ႈယူႇၸမ် တုမ်ႉတိူဝ်ႉၵူၼ်းၸပ်းၶူဝ်ႊဝိတ်ႉ ႁႂ်ႈၵူတ်ႇထတ်းပၢႆးယူႇလီ

ၽူႈၸပ်းၸိူဝ်ႉမႅင်းၶူဝ်ႊဝိတ်ႉ 19 တိုၵ်းသူၼ်းဝႃႈ ဢမ်ႇၶႆႈဢမ်ႇၼၢဝ်သင်ၵေႃႈ ပေႃးဝႃႈယၢမ်ႈယူႇဢိူမ်ႈၸမ် ၵူဝ်ႈၼုၵ်းထုၵ်းထူ တုမ်ႉတိူဝ်ႉမႅၼ်ႈ ၵူၼ်းၸပ်းၸိူဝ်ႉမႅင်းၶူဝ်ႊဝိတ်ႉ ႁႂ်ႈမေႃႁူႉတူဝ်သေ ၵူတ်ႇထတ်း ပၢႆးယူႇလီၵၼ်။

တေႃႇထိုင်ဝၼ်းတီႈ 03/12/2020 ၼႆႉ ၸၢႆးလႃႉသူၺ်ႇ  ၵေႃႉဢၼ်ၵူတ်ႇထတ်း ၼမ်ႉမုၵ်ႈ တီႈႁူင်းယႃဝဵင်းတႃႈၶီႈလဵၵ်း မိူဝ်ႈဝၼ်းတီႈ 30/11/2020 သေ ထူပ်းႁၼ်ၸိူဝ်ႉမႅင်းၶူဝ်ႊဝိတ်ႉ 19 ယဝ်ႉ လႆႈၶဝ်ႈၵၵ်း/ၵုမ်းတူဝ် (Quarantine) ဝႆႉတီႈႁူင်းယႃဝဵင်းတႃႈၶီႈလဵၵ်းၼၼ်ႉ တိုၵ်ႉယူႇလီၵိၼ်ဝၢၼ်ယူႇ၊ ဢမ်ႇမီးလူမ်းၶႆႈလူမ်းၼၢဝ်သင်၊ သႅဝ်ဢၢႆၸိူဝ်းၼႆႉၵေႃႈ တိုၵ်ႉလႆႈယိၼ်းယူႇ။ ၵူၺ်းၵႃႈ တၢင်းပဵၼ်ၼႆႉ ၸပ်းမႃးလူၺ်ႈ ဢမ်ႇႁူႉႁၢင်ႈႁူႉတူဝ် ၼႆယဝ်ႉ။

တၢမ်တူဝ် ၸၢႆးလႃႉသူၺ်ႇ ၵေႃႉၸပ်းမႅၼ်ႈတၢင်းပဵၼ်ၶူဝ်ႊဝိတ်ႉ 19 လၢတ်ႈတီႈ ၽူႈတွႆႇႁွၵ်ႈဝႃႈ- “ၶႃႈႁဝ်းၼႆႉ ၵူတ်ႇထတ်းထူပ်းႁၼ်ၸိူဝ်ႉမႅင်းၶူဝ်ႊဝိတ်ႉ မိူဝ်ႈဝၼ်းတီႈ 30 လိူၼ်ၼူဝ်ႊဝႅမ်ႊပိူဝ်ႊ တီႈႁူင်းယႃတႃႈၶီႈလဵၵ်းၶႃႈဢေႃႈ။ ၵူၺ်းၵႃႈ တင်ႈတႄႇ ၶႃႈႁဝ်းၵႂႃႇၵူတ်ႇထတ်းပၢႆးယူႇလီမႃး ႁၢၼ်ႉတေႃႇမိူဝ်ႈလဵဝ် (03/12/2020) ၼႆႉၵေႃႈ ဢမ်ႇပဵၼ်ဝတ်း ဢမ်ႇပဵၼ်ၶႆႈပဵၼ်ၼၢဝ်သင်၊ ဢၢႆသႅဝ်ၸိူဝ်းၼႆႉၵေႃႈတိုၵ်ႉလႆႈငိၼ်းယူႇ၊ မိူၼ်ၵူၼ်းဢမ်ႇမီးရေႃးၵႃႇသင်ၼၼ်ႉၵူၺ်းၶႃႈ” ဝႃႈၼႆ။

ၸၢႆးလႃႉသူၺ်ႇၼႆႉ ဢႃႇယုလႆႈ 29 ပီ၊ ၸႃႇတိပဵၼ်ၵူၼ်းတၢင်ႉယၢၼ်း၊ မႃးႁဵတ်းၵၢၼ်တၢင်းတႃႈၶီႈလဵၵ်းသေ ၸပ်းမႅၼ်ႈတၢင်းပဵၼ်။ ၵေႃႉပဵၼ်လုၵ်ႈၸၢႆးဢွၼ်ႇ ၸိုဝ်ႈၸၢႆးၵွၼ်ၼုမ်ႇၾႃႉ ဢႃႇယု 2 ပီပၢႆၵေႃႈ ၸပ်းၸွမ်းသေ ယၢမ်းလဵဝ် ၶဝ်ႈၵၵ်းတူဝ် တီႈႁူင်းယႃဝဵင်းတႃႈၶီႈလဵၵ်းဝႆႉ တီႈႁွင်ႈလဵဝ်ၵၼ်။ ၵူၺ်းၵႃႈ ၵေႃႉပဵၼ်မေးၼၢင်းလႄႈ လုၵ်ႈၸၢႆးၵေႃႉယႂ်ႇ ၵူတ်းထတ်းပၢႆးယူႇလီ ၽွၼ်းၵၢၼ်ဢွၵ်ႇမႃးဝႃႈဢမ်ႇၸပ်း ၼႆယဝ်ႉ။

“ၵမ်ႈၽွင်ႈဝႃႈ ပေႃးႁဝ်းဢမ်ႇလႆႈငိၼ်းသႅဝ်ၼႆႉ မၼ်းၸင်ႇပဵၼ်ၶူဝ်ႊဝိတ်ႉၼႆ၊ ၵူၺ်းၵႃႈ ၶႃႈႁဝ်းတႄႉ ပဵၼ်ၶူဝ်ႊဝိတ်ႉယဝ်ႉၵေႃႈ သႅဝ်ဢၢႆၸိူဝ်းၼႆႉ တိုၵ်ႉလႆႈငိၼ်းယူႇ။ တၢင်းပဵၼ်ဢၼ်ၼႆႉ မၼ်းပဵၼ် ၸိူင်ႉႁိုဝ်တႄႉတႄႉဢမ်ႇႁူႉ မၢင်ၵေႃႉၼင်ႈၵွတ်ႇၵၼ်ၵေႃႈဢမ်ႇၸပ်း၊ မၢင်ၵေႃႉၼင်ႈၸမ်ၵၼ်ၵူၺ်း ၵေႃႈၸပ်း။ ၵွပ်ႈပိူဝ်ႈၼၼ် ၶႃႈၶႂ်ႈၾၢၵ်ႇပၼ်ၵူႈၵေႃႉတႄႉ ငိၼ်းသႅဝ်ယူႇသေတႃႉၼႆၵေႃႈ ပေႃးဝႃႈယၢမ်ႈ လႆႈၵႂႃႇတုမ်ႉတိူဝ်ႉၺႃးသေၵေႃႉ ဢၼ်မီးရေႃးၵႃႇၼႆၸိုင်  ၵႂႃႇၵူတ်ႇထတ်းတူၺ်းပၢႆးယူႇလီၼႆႉလီသေပိူၼ်ႈ၊ ပေႃးပဵၼ်မႃး ၵူဝ်မၼ်းတုမ်ႉတိူဝ်ႉတင်းႁိူၼ်းတင်းယေးၶႃႈဢေႃႈ” ၸၢႆးလႃႉသူၺ်ႇ သိုပ်ႇလၢတ်ႈထႅင်ႈၼင်ႇၼႆ။

ဢွၼ်ၼႃႈၼႆႉ မိူဝ်ႈဝၼ်းတီႈ 22 (ၼူဝ်ႊဝႅမ်ႊပိူဝ်ႊ) ၸၢႆးလႃႉသူၺ်ႇ လႆႈၵႂႃႇၶဝ်ႈႁူမ်ႈဝၼ်းၵိူတ်ႇ မေႃသွၼ်တီၵွပ်ႊၾ် မွၵ်ႈ 12 မူင်းၶိုင်ႈ။ ဝၢႆးၼၼ်ႉ ၵႂႃႇၶဝ်ႈႁူမ်ႈၵိၼ်တီႈဝၼ်းၵိူတ်ႇ တီႈၼွင်ပႃဢႃးၶႃႇ။ ၵၢင်ၶမ်ႈ 5-6 မူင်း ၵိၼ်ၶဝ်ႈတီႈႁိူၼ်းတႆးၵေႃႉ တႃႈၶီႈလဵၵ်းသေ ႁွင်ႉၽဵင်းၵႂၢမ်းၸွမ်းၵၼ် တေႃႇၽႅဝ်ဝၼ်းတီႈ 23 ၵၢင်ၼႂ်၊ ဝၼ်းတီႈ 23 ၼၼ်ႉၵူၺ်းၼင်ႇၵဝ်ႇ တင်းတႆးၵေႃႉတႆးသေႈ ၵႂႃႇၵိၼ်တီႈႁၢၼ်ႉဢႃးႁၢရ် ၸွမ်းၵၼ်ထႅင်ႈ။

လိူဝ်သေၼၼ်ႉ ထိုင်မႃးဝၼ်းတီႈ 26/11/2020 ၶဝ်ႈႁူမ်ႈပၢင်ပွႆး ၵူပ်ႉၵူႈပဵၼ်ႁိူၼ်း ၸၢႆးၸိင်ႇမိူင်း။ ဝၼ်းၼႆႉ ၵၢင်ၶမ်ႈ ၸတ်းပၢင်ပွႆးဝၼ်းၵိူတ်ႇ ၵေႃႉပဵၼ်လုၵ်ႈၸၢႆးဢွၼ်ႇ ၼႆယဝ်ႉ။ ယူႇတီႈၸၢႆးလႃႉသူၺ်ႇ ယွမ်းႁပ်ႉဝႃႈ လႅပ်ႈၸပ်းမႅၼ်ႈၸိူဝ်ႉမႅင်း ၸွမ်းပၢင်ပွႆးၸိူဝ်းၼႆႉ ၼႆယဝ်ႉ။

တီႈပၢင်ပွႆးၵူပ်ႉၵူႈ ဝၼ်းတီႈ 26 ၼၼ်ႉ ၸၢႆးလႃႉသူၺ်ႇ လႆႈႁူပ်ႉတင်းတႆးၵေႃႉ ၸိုဝ်ႈၸၢႆးလၢဝ်မွၼ်း (ၵူၼ်းလၢႆးၶႃႈ)။ သွင်ၵေႃႉလႆႈဢုပ်ႇဢူဝ်းၵၼ် ၵိၼ်ၶဝ်ႈႁူမ်ႈမူႇၵၼ်ၵူၺ်းဢမ်ႇၵႃး ၵၢင်ၶမ်ႈမႃး မႃးၵိၼ်မူၼ်ႈၸွမ်းၵၼ်ထႅင်ႈ တီႈပၢင်ပွႆးဝၼ်းၵိူတ်ႇၼၼ်ႉ။ ၸၢႆးလၢဝ်မွၼ်းၵေႃႈ ၵူတ်ႇထတ်းႁၼ်ၸိူဝ်ႉမႅင်း မိူဝ်ႈ 01/12/2020 သေ မိူဝ်ႈလဵဝ်ၵၵ်း/ၵုမ်းတူဝ်ယူႇဝႆႉတီႈဝတ်ႉမုၼ်ၸဝ်ႈ မူဝ်းၵူၵ်ႉဝိပသ်ႉသၼႃႇ ဝဵင်းတႃႈၶီႈလဵၵ်း ၼႆယဝ်ႉ။

ၸၢႆးလၢဝ်မွၼ်း လၢတ်ႈဝႃႈ- “ၶႃႈပဵၼ်ၵူၼ်းၵေႃႉဢၼ် ႁေႃႈၵႃးပၼ်ၸၢႆးလႃႉသူၺ်ႇ မိူဝ်ႈပွၵ်ႈမိူင်းၵႅတ်ႈ မႃးၼၼ်ႉၶႃႈဢေႃႈ။ ပေႃးႁူႉဝႃႈၸၢႆးလႃႉသူၺ်ႇ ၸပ်းၸိူဝ်ႉမႅင်းယဝ်ႉၵေႃႈ ထိုင်ဝၼ်းတီႈ 1 (ၻီႊသႅမ်ႊပိူဝ်ႊ) ၶႃႈၵႂႃႇၵူတ်ႇထတ်း တီႈႁူင်းယႃတႃႈၶီႈလဵၵ်းသေ ထူပ်းႁၼ်ၸိူဝ်ႉမႅင်း။ ဝၼ်းတီႈ 1 ၼၼ်ႉၵူၺ်းၼင်ႇၵဝ်ႇ  ၶႃႈပဵၼ်ၼၢဝ် တွင်ႉၵႂႃႇဝၼ်းၼိုင်ႈ လိူဝ်သေၼၼ်ႉမႃးဢမ်ႇပဵၼ်သင်ယဝ်ႉ။ မေႃၶဝ်လၢတ်ႈဝႃႈ ပေႃးတဵမ် 11 ဝၼ်းယဝ်ႉ ၼႂ်းတူဝ်တိုၵ်ႉမီးၸိူဝ်ႉမႅင်းယူႇၵေႃႈ မႅင်းမၼ်းႁႅင်းဢူၼ်ႈယဝ်ႉ ဢမ်ႇၸပ်းပိူၼ်ႈလႆႈယဝ်ႉ ဢွၵ်ႇမိူဝ်းလႆႈယဝ်ႉ” ဝႃႈၼႆ။

ၼၢင်းၽူၺ်းသႅင် ၵူၼ်းပိုၼ်ႉတီႈလၢႆးၶႃႈ ၵေႃႈလၢတ်ႈဝႃႈ-“တၢင်းပဵၼ်ဢၼ်ၼႆႉ မၼ်းလီၵူဝ်ၶႃႈဢေႃႈ၊ မၼ်းၸပ်းၵၼ်ငၢႆႈၼႃႇၶႃႈ။ မိူဝ်ႈလဵဝ်ၼႆႉ တီႈဝဵင်းလၢႆးၶႃႈႁဝ်းၼႆႉ ၵူၼ်းတၢင်းၼွၵ်ႈၵေႃႈ ဢမ်ႇပၼ်ၶဝ်ႈဝဵင်းလၢႆးၶႃႈ၊ ၵူၼ်းဝဵင်းလၢႆးၶႃႈၵေႃႈ ဢမ်ႇပၼ်ဢွၵ်ႇတၢင်းၼွၵ်ႈယဝ်ႉ” ဝႃႈၼႆ။

မိူဝ်ႈလဵဝ် တီႈဝဵင်းလၢႆးၶႃႈၼႆႉ ပိၵ်ႉဢိုတ်းဝၢၼ်ႈဢိုတ်းမိူင်း Lockdown ဝႆႉမူတ်း။ ၵူၼ်းၸၢဝ်းၶိူဝ်းမၢၼ်ႈ ၸိူဝ်းမႃးၶၢႆၶူဝ်းၵႃႈပေႃးၵႃႈထုၵ်ႇၸိူဝ်းၼၼ်ႉၵေႃႈ ဢမ်ႇပၼ်မႃးၶၢႆ ဢမ်ႇပၼ်ၶဝ်ႈဝဵင်းယဝ်ႉ။ ၼႂ်းၵၢတ်ႇဝဵင်းလၢႆးၶႃႈၵေႃႈ လိူဝ်သေၵူၼ်းလၢႆးၶႃႈ ဢမ်ႇပၼ်ၶၢႆၶူဝ်းယဝ်ႉ လႆႈႁူႉၼင်ႇၼႆ။