ဢိင်ၼိူဝ်တၢင်းပဵၼ်ၶူဝ်ႊဝိတ်ႉ 19 ၽႄႈလၢမ်းႁၢဝ်ႈႁႅင်းၵူႈဝၼ်းသေ ၼင်ႇႁိုဝ်  တၢင်းပဵၼ် ပေႃးတေ ဢမ်ႇၽႄႈလၢမ်းၶိုၼ်ႈထႅင်ႈၼၼ်ႉ တီႈဢၼ်ၵူၼ်းမိူင်းမႃးလူႇတၢၼ်းဝႆႈသႃဢႅဝ်ႇယဵမ်ႈ တီႈၵွင်းမူးမၢၵ်ႇႁိၼ်ၼမ်ႉ ဝဵင်းလၢႆးၶႃႈၼၼ်ႉ တေဢိုတ်းပိၵ်ႉဝႆႉ ၸူဝ်ႈၶၢဝ်း တႃႇၶၢဝ်းတၢင်း 15 ဝၼ်း ဝႃႈ ၼႆ။

တႄႇဢဝ် ဝၼ်းတီႈ 3/12/2020 တေႃႇထိုင် ဝၼ်းတီႈ 17/12/2020 တႃႇၶၢဝ်းတၢင်း 15 ဝၼ်း တီႈၵွင်းမူင်းမၢၵ်ႇႁိၼ်ၼမ်ႉ ၸႄႈဝဵင်းလၢႆးၶႃႈ ၸႄႈတွၼ်ႈလွႆလႅမ် ၸိုင်ႈတႆး ပွတ်းၸၢၼ်း တေဢိုတ်းပိၵ်ႉဝႆႉၵူၼ်းမႃးဢႅဝ်ႇလႄႇ ဝႆႈသႃဝႆႉ ၸူဝ်ႈၶၢဝ်း ၼင်ႇႁိုဝ် တေဢမ်ႇပဵၼ်လွင်ႈ ၵူၼ်းၶွၼ်ႈတုမ်ၵၼ်ၼမ် ၼႆယဝ်ႉ။

ၸဝ်ႈၶူး ၽူႈတူင်ႉၼိုင် ၼႂ်းသင်ၶ ၸႄႈဝဵင်းလၢႆးၶႃႈ တူၼ်ၼိုင်ႈ လၢတ်ႈဝႃႈ – “လွင်ႈတၢင်းတႄႉ ယွၼ်ႉပိူဝ်ႈၶူဝ်ႊဝိတ်ႉ ၽိူမ်ႉ ၶိုၼ်ႈႁႅင်း ၵူႈဝၼ်းလႄႈ  ၸင်ႇလႆႈဢိုတ်းပိၵ်ႉဝႆႉၸူဝ်ႈၶၢဝ်း ”- ဝႃႈၼႆ။

ၼႂ်းလိၵ်ႈပိုၼ်ၽၢဝ်ႇၼၼ်ႉ ဢွၵ်ႇဝႆႉဝႃႈ ဢိင်ၼိူဝ်ငဝ်းလၢႆး ပၢႆးယူႇလီ ၽေးရေႃးၵႃႇ ၶူဝ်ႊဝိတ်ႉ 19 ၽႄႈတိူၼ်းႁၢဝ်ႈႁႅင်းမႃး ၼၼ်ႉသေဢမ်ႇၵႃး ၾၢႆႇၸုမ်းမေႃယႃၸိုင်ႈမိူင်း ၸႄႈဝဵင်းၵေႃႈ ႁႄႉႁၢမ်ႈဝႆႉ ယႃႇႁႂ်ႈၵူၼ်းလႆႈၸူႉၶွၼ်ႈတုမ်ၵၼ်ၼမ်၊ ယွၼ်ႉဝႃႈ ၵူဝ်မီးလွင်ႈတုမ်ႉတိူဝ်ႉပၢႆးယူႇလီ ပီႈၼွင်ႉၶဝ် ၽွင်းမိူဝ်ႈၵႂႃႇမႃးၸွမ်းတႃႈၸွမ်းတၢင်း (ၵူဝ်ၸပ်းၺႃးတၢင်းပဵၼ် ၶူဝ်ႊဝိတ်ႉ) ၼႆသေလႄႈ ၸင်ႇလႆႈသင်ႇပိၵ်ႉဝႆႉ ၸူဝ်ႈၶၢဝ်း ၼႆယဝ်ႉ။

လိူဝ်ၼၼ်ႉ ပေႃးငဝ်းလၢႆးမၼ်း လီၶိုၼ်ႈမႃးၼႆၸိုင် တေပွင်ႇလႅင်းထိုင်ပၼ်ၶိုၼ်း တီႈပီႈၼွင်ႉ ၵူႈတီႈၵူႈတၢင်း ၵူႈၵေႃႉ ၵူႈ ၵူၼ်းၶိုၼ်းယူႇ ၼႂ်းလိၵ်ႈပိုၼ်ၽၢဝ်ႇၼၼ်ႉ ဢွၵ်ႇဝႆႉၼင်ႇၼႆ။

မိူဝ်ႈဝႃး ဝၼ်းတီႈ 2/12/2020 ယၢမ်းၵၢင်ၶမ်ႈ 8 မူင်း ႁွင်ႈၵၢၼ်ပၢႆးယူႇလီ ၾၢႆႇၵူတ်ႇထတ်း ၸိူဝ်ႉမႅင်းၶူဝ်ႊဝိတ်ႉ 19 တီႈတူၼ်ႈ တီး လႆႈပိုၼ်ၽၢဝ်ႇဢွၵ်ႇမႃး ထူပ်းႁၼ်ထႅင်ႈၵူၼ်းတိတ်းတၢင်းပဵၼ်ၽိူမ်ႉၶိုၼ်ႈထႅင်ႈ 9 ၵေႃႉ ၼႆယဝ်ႉ။

ယၢမ်းလဵဝ် ၼႂ်းမိူင်းႁူမ်ႈတုမ် ၵူၼ်းတိတ်းၸပ်းၸိူဝ်ႉမႅင်းၶူဝ်ႊဝိတ်ႉ 19 တင်းမူတ်း မီးၵႂႃႇ 93,600 ၵေႃႉ၊ ယူတ်းယႃ 19,001 ၵေႃႉ၊ ယႃၶႅၼ်း 72,601 ၵေႃႉ၊ လူႉတၢႆ 1,998 ၵေႃႉ ႁွင်ႈၵၢၼ်ပၢႆးယူႇလီမိူင်းႁူမ်ႈတုမ် ပိုၼ်ၽၢဝ်ႇ ဢွၵ်ႇဝႆႉၼင်ႇၼႆ။