ၾၢႆႇပွင်ႇၶၢဝ်ႇတပ်ႉသိုၵ်းလူင်ပွင်ၸိုင်ႈမၢၼ်ႈ ပိုၼ်ၽၢဝ်ႇမိူဝ်ႈဝၼ်းတီႈ 1/12/2020 ဝႃႈ ၼွၵ်ႈလိူဝ်ၼႃႈလိၼ် ၸုမ်းယိပ်းၵွင်ႈၵၢင်ႇဢၼ်ထုၵ်ႇ လူင်ပွင်ၸိုင်ႈပိုၼ်ၽၢဝ်ႇပဵၼ်ၸုမ်းၵေႃႇၵၢၼ်ႁၢႆႉဝႆႉၼၼ်ႉ ၾၢႆႇသိုၵ်းမၢၼ်ႈတေၵိုတ်းတိုၵ်းၾၢႆႇလဵဝ်ၵႂႃႇတေႃႇထိုင်လိူၼ်ၼႆႉသဵင်ႈဝႃႈၼႆ။
ၼႂ်းလိၵ်ႈပိုၼ်ၽၢဝ်ႇၼၼ်ႉပႃးဝႆႉဝႃႈ တႃႇၵိုတ်းတိုၵ်းလႄႈ တႃႇငမ်းယဵၼ်တေမၼ်ႈၵိုမ်းယိုၼ်းယၢဝ်းၼၼ်ႉ – သင်ဝႃႈၶႂ်ႈဢုပ်ႇၵုမ်တင်းတပ်ႉသိုၵ်းလူင်ပွင်ၸိုင်ႈၸိုင် ၼင်ႇႁိုဝ်တေလႆႈသိုပ်ႇဢုပ်ႇၵႂႃႇထႅင်ႈ၊ ၼင်ႇႁိုဝ်တေၸၢင်ႈႁူမ်ႈမိုဝ်းၵၼ်တင်း ၸုမ်းလူင်းလၢႆးမိုဝ်းၵိုတ်းတိုၵ်း NCA သေႁဵတ်းႁႂ်ႈငမ်းယဵၼ်မၼ်ႈၵိုမ်း ၊ ၸိူဝ်းပႆႇလႆႈလူင်းလၢႆးမိုဝ်း NCA ၵေႃႈၼင်ႇႁိုဝ်တေၸၢင်ႈ ဢုပ်ႇၵုမ်ၵၼ်တေႃႇထိုင်ပေႃးၸၢင်ႈလူင်းလၢႆးမိုဝ်းၵိုတ်းတိုၵ်းသေပွင်သၢင်ႈလွင်ႈငမ်းယဵၼ်ၵႂႃႇႁႂ်ႈပေႃးထိုင်တီႈယဝ်ႉတူဝ်ႈ၊ ၼင်ႇႁိုဝ်တေၸၢင်ႈလူင်းပိုၼ်ႉတီႈၵႅတ်ႇၵင်ႈတၢင်းပဵၼ်ၶူဝ်ႊဝိတ်ႉ-19 ႁႂ်ႈထိုင်တီႈလႆႈၼၼ်ႉ ယူႇတီႈတပ်ႉသိုၵ်းမၢၼ်ႈသေ တေၵိုတ်းတိုၵ်းၾၢႆႇလဵဝ်ၵႂႃႇထႅင်ႈ တင်ႈဢဝ်ဝၼ်းတီႈ 1/12/2020 တေႃႇထိုင်ဝၼ်းတီႈ 31/12/2020 -ဝႃႈၼႆ။
တပ်ႉသိုၵ်းလူင်ပွင်ၸိုင်ႈမၢၼ်ႈၼႆႉ ပူၼ်ႉမႃးမိူဝ်ႈဝၼ်းတီႈ 30 လိူၼ် ဢွၵ်ႊထူဝ်ႊပိူဝ်ႊ ၼၼ်ႉၵေႃႈပိုၼ်ၽၢဝ်ႇၵိုတ်းတိုၵ်းၾၢႆႇလဵဝ် 1 လိူၼ်တဵမ်တဵမ် 1-30/11/2020 ၼႆၼင်ႇၵဝ်ႇ။ ၼႂ်းၶၢဝ်းတၢင်း ပီ 2020 ၼႆႉၾၢႆႇပွင်ႇၶၢဝ်ႇသိုၵ်းမၢၼ်ႈ ၵမ်းၵမ်းပိုၼ်ၽၢဝ်ႇၵိုတ်းတိုၵ်းၾၢႆႇလဵဝ် ၵမ်းၼႆႉပဵၼ်ၵမ်းထူၼ်ႈ 7 ။
