လူင်ပွင်ၸိုင်ႈမိူင်းထႆး လူင်းလၢႆးမိုဝ်းသင်ႇသိုဝ်ႉယႃႈယႃၵႅတ်ႇၶႄႁႄႉၵင်ႈတၢင်းပဵၼ်ၶူဝ်ႊဝိတ်ႉ 19 တီႈၶွမ်ႊပၼီႊယႃႈယႃ AstraZeneca Plc မိူင်းပရိတ်ႊထဵင်ႊ (မိူင်းဢိင်းၵလဵတ်ႈ) တႃႇ 26 လၢၼ်ႉတဝ်ႈ။
သွင်ၾၢႆႇလႆႈလူင်းလၢႆးမိုဝ်းသိုဝ်ႉၶၢႆၵၼ်မိူဝ်ႈဝၼ်းတီႈ 27/11/2020 ။
ယႃႈယႃၼၼ်ႉၸၼ်ႉၸွမ်မိူင်းဢွၵ်ႉသၾိူတ်ႊတိုၵ်ႉၶူင်သၢင်ႈႁဵတ်းဢွၵ်ႇ တႃႇၸ်ႂႉတိုဝ်းတူၺ်းယူႇ။ ၾၢႆႇမိူင်းဢိင်းၵလဵတ်ႈၵေႃႈယိုၼ်ယၼ်ဝႃႈ လႅပ်ႈတေဢွင်ႇမၢၼ်ဢဝ်မႃးၸႂ်ႉတိုဝ်းလႆႈယူႇဝႃႈၼႆဝႆႉ။
ယႃႈယႃၼႆႉလႆႈဝႃႈ ၾၢႆႇထႆးသင်ႇသိုဝ်ႉဝႆႉတႃႇႁႂ်ႈလႆႈသမ်းပၼ်ၵူၼ်းမိူင်းထႆး ၼႂ်းၵၢင်ပီ 2021 တေမႃးၼႆႉဝႃႈၼႆ။ ၵႃႈၶၼ်ယႃႈယႃႁူမ်ႈတင်းမူတ်းပဵၼ် ငိုၼ်းဢမေႊရိၵၼ်ႊ 198 လၢၼ်ႉတေႃႇလႃႇ (မႅၼ်ႈ ငိုၼ်းထႆး 6 ႁဵင်လၢၼ်ႉဝၢတ်ႇ၊ မႅၼ်ႈငိုၼ်းမၢၼ်ႈ 26041 လၢၼ်ႉပျႃး)။
ၸွမ်ၽွင်းလူင်ၸိုင်ႈထႆး ပရႃႊယုတ်းၵျၼ်ႊဢူဝ်ႊၶျႃႊ လၢတ်ႈတီႈပၢင်လူင်းလၢႆးမိုဝ်းသိုဝ်ႉယႃႈယႃၼၼ်ႉဝႃႈ – ပေႃးတူၺ်းငဝ်းလၢႆးဢၼ်ပဵၼ်တၢင်းပဵၼ်ၶူဝ်ႊဝိတ်ႉ-19 ယူႇ ဝၼ်းမိူဝ်ႈၼႆႉသေ ယႃႈယႃ 26 လၢၼ်ႉတဝ်ႈၼႆႉတႄႉ ႁၼ်ထိုင်ဝႃႈမၼ်း ၵုမ်ႇထူၼ်ႈတႃႇၵူၼ်းမိူင်းထႆး ယူႇ။ ပေႃးလႆႈယႃႈယႃႁႄႉၵင်ႈၸိူဝ်ႉမႅင်းၶူဝ်ႊဝိတ်ႉ-19 သေ ယူတ်းယႃပၼ်ၵူၼ်းမိူင်းႁၢႆဝႆးဝႆးၸိုင် တေၸၢင်ႈပူၵ်းပွင်ပၢႆးမၢၵ်ႈမီးမိူင်းထႆးၶိုၼ်းဝႆးဝႆးယူႇ- ဝႃႈၼႆ။
ယၢမ်းလဵဝ် တႄႉ မိူင်းထႆးလႆႈပိုၼ်ၽၢဝ်ႇယိုတ်ႈၶၢဝ်းယၢမ်းငဝ်းလၢႆးၶိုၵ်ႉၶၵ်ႉထႅင်ႈ တေႃႇထိုင်ၵၢင်လိူၼ် ၵျႅၼ်ႊၼိဝ်ႊရီႊ တေမႃးၼႆႉ။
ဝၼ်းမိူဝ်ႈၼႆႉ ဝၼ်းတီႈ 30/11/2020 ၵူၼ်းမိူင်းထႆးဢၼ်တိတ်းၸပ်းတၢင်းပဵၼ်ၶူဝ်ႊဝိတ်ႉ 19 မီးၼမ်မႃးထႅင်ႈ 21 ၵေႃႉ။ တင်းမူတ်းၵူၼ်းၸပ်းတၢင်းပဵၼ်ၶူဝ်ႊဝိတ်ႉ 19 မီး 3998 ၵေႃႉ။ တၢႆ 60 ၵေႃႉ။