သိုၵ်းလူင်ပွင်ၸိုင်ႈမၢၼ်ႈတင်း သိုၵ်းတဢၢင်း TNLA ပဵၼ်ပၢင်တိုၵ်းၵၼ် ၵူၼ်းမိူင်း ပိုၼ်ႉတီႈ လႆႈဢွၼ်ၵၼ်ပၢႆႈၶဝ်ႈဝဵင်း ဝႃႈၼႆ။
မိူဝ်ႈဝၼ်းတီႈ 24/11/2020 ယၢမ်းၵၢင်ၶမ်ႈ မွၵ်ႈ 8 မူင်းၼၼ်ႉ သိုၵ်းလူင်ပွင်ၸိုင်ႈမၢၼ်ႈ တင်း သိုၵ်းတဢၢင်း ပဵၼ်ပၢင်တိုၵ်း ၵၼ် ႁိမ်းဝၢၼ်ႈၵျွၵ်ႉဝႃႇ ၸႄႈဝဵင်းမိူင်းၵုတ်ႈ ၵူၼ်းမိူင်းပိုၼ်ႉတီႈ ၵမ်ႈၽွင်ႈ ဢွၼ်ၵၼ်ၵူဝ်သေ ပၢႆႈၶဝ်ႈဝဵင်း မႃးမူၵ်ႉယူႇၸွမ်း ႁိူၼ်းပီႈၼွင်ႉၽႂ်မၼ်းၵမ်ႈၽွင်ႈ ၼႆယဝ်ႉ။
ၸၢႆးလႃႉမွင်ႇ ၵူၼ်းမိူင်းၵုတ်ႈ လၢတ်ႈဝႃႈ – “လႆႈငိၼ်းသဵင်တႅၵ်ႈသေ ၵူၼ်းပိုၼ်ႉတီႈ ပီႈၼွင်ႉလီႇသူး တင်း တႆး လႆႈဢွၼ် ၵၼ်ပၢႆႈၶဝ်ႈဝဵင်းၶႃႈဢေႃႈ။ ဢွၼ်ၵၼ်ပၢႆႈမႃးတင်းၼမ်တႄႉၵေႃႈဢမ်ႇၸႂ်ႈၼင်ႇၵဝ်ႇ ပၢႆႈမႃးၵမ်ႈၽွင်ႈၵူၺ်းၶႃႈ။ ဢၼ်ပၢႆႈမႃး ၼႆႉၵေႃႈ ယွၼ်ႉၵူဝ်သေ ပၢႆႈမႃးၶႃႈ”- ဝႃႈၼႆ။
ဢွင်ႈတီႈဢၼ်ပဵၼ်ပၢင်တိုၵ်းၼႆႉ ၵႃႈပူၼ်ႉမႃးၵေႃႈ သိုၵ်းလူင်ပွင်ၸိုင်ႈမၢၼ်ႈတင်း သိုၵ်းတဢၢင်း ၵႆႉပဵၼ်ပၢင်တိုၵ်းၵၼ် ယူႇ။
တႃႉဢၢႆႈၵျေႃႇ ၽူႈၶၢၼ်ပၢၵ်ႇ TNLA လၢတ်ႈဝႃႈ -“ၸႂ်ႈယဝ်ႉၶႃႈ သိုၵ်းမၢၼ်ႈတင်းႁဝ်း လႆႈပဵၼ်ပၢင်တိုၵ်းၵၼ်ၵမ်ႉၼိုင်ႈ တေ ႁိုင်မွၵ်ႈ 15 မိၼိတ်ႉ 20 မိၼိတ်ႉၼႆႉ။ ၵူၺ်းၵႃႈ ဢမ်ႇပဵၼ်ၵၼ်ႁႅင်းၵႃႈႁိုဝ်၊ သိုၵ်းမၢၼ်ႈတႄႉ ထွၼ်ဢွၵ်ႇၵႂႃႇယဝ်ႉ”- ဝႃႈၼႆ။
မိူဝ်ႈဝၼ်းတီႈ 19/11/2020 ၼၼ်ႉၵေႃႈ တီႈမိူင်းၵုတ်ႈၼႆႉၵူၺ်းၼင်ႇၵဝ်ႇ သိုၵ်းမၢၼ်ႈတင်း သိုၵ်းတဢၢင်း လႆႈပဵၼ်ပၢင် တိုၵ်းၵၼ်မႃးၵမ်းၼိုင်ႈ ဝႃႈၼႆ။
ဢိင်ၼိူဝ် လွင်ႈပဵၼ်ပၢင်တိုၵ်းၵၼ် မိူဝ်ႈဝၼ်းတီႈ 24 ၼၼ်ႉ သိုၵ်းတင်းသွင်ၾၢႆႇ ပိုတ်းယိုဝ်းၵၼ် ၸႂ်ႉၶိူင်ႈၵွင်ႈယႂ်ႇ ၸိူဝ်းၼႆႉ ယိုဝ်းပႃးလႄႈ ၵူၼ်းမိူင်းၼႂ်းပိုၼ်ႉတီႈ ဢွၼ်ၵၼ်ၵူဝ်သေ လႆႈပၢႆႈၶဝ်ႈဝဵင်း ၵူၼ်းပိုၼ်ႉတီႈမိူင်းၵုတ်ႈလၢတ်ႈၼႄၼင်ႇၼႆ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ