ၾႆး မႆႈဝတ်ႉဝိႁၢရ် ဝၢၼ်ႈၸူင်လဝ်း ၼႂ်းၸႄႈဝဵင်းမိူင်းၵိုင်တင်းလင် ၶူဝ်းၶွင်ဢမ်ႇတၼ်းလႆႈသင် သင်ၶၸဝ်ႈ မၢတ်ႇၸဵပ်းလူႉလွၼ်ႇတႄႉဢမ်ႇမီး။
မိူဝ်ႈၼႆႉ ဝၼ်းတီႈ 26/11/2020 ယၢမ်းၵၢင်ၸႂ် မွၵ်ႈ 4 မူင်းၶိုင်ႈ ၾႆးတဵၼ်းတီႈၶဵင်ႇၽြႃးလူမ်ႉသေ လၢမ်းမႆႈဝတ်ႉဝိႁၢရ် တီႈဝၢၼ်ႈၸူင်လဝ်း ဢိူင်ႇၸူင်လဝ်း ဢၼ်မီးၸဵင်ႇႁွင်ႇဝၼ်းတူၵ်းယၢၼ်ၵႆဝဵင်း မွၵ်ႈ 30 လၵ်း ၼႂ်းၸႄႈဝဵင်းမိူင်းၵိုင် ၸႄႈတွၼ်ႈလွႆ လႅမ် ၸိုင်ႈတႆးပွတ်းၸၢၼ်း ၶူဝ်းၶွင်ၼႂ်းဝတ်ႉ ဢမ်ႇတၼ်းလႆႈသင် မႆႈၸွမ်းၾႆးတင်းမူတ်း ၼႆယဝ်ႉ။
ၼၢင်းလႅင်းလႅင်းဢူး ၾၢႆႇပွင်ႇၶၢဝ်ႇလႄႈတိတ်းတေႃႇၵွင်ႉသၢၼ်ၵူၼ်းမိူင်း လုမ်းၽူႈၵွၼ်းၸႄႈဝဵင်း မိူင်းၵိုင် လၢတ်ႈဝႃႈ -“လႆႈငိၼ်းတႄႉ ယွၼ်ႉတႆႈ ၾႆးတဵၼ်းၽြႃးဝႆႉသေ ၾႆးတဵၼ်းၼၼ်ႉ လူမ်ႉလၢမ်းမႆႈၶဵင်ႇၽြႃးၼႆၶႃႈဢေႃႈ။ ၵျွင်းတႄႉ မႆႈတင်းလင်ၶႃႈယဝ်ႉ။ ၶူဝ်းၶွင်ၼႂ်း ၵျွင်း ဢမ်ႇတၼ်းလႆႈသင်ၶႃႈ”- ဝႃႈၼႆ။
ဝတ်ႉဝိႁၢရ်ၸူင်လဝ်းၼႆႉ ပဵၼ်ဝတ်ႉတိၼ်သုင် မုင်းလဵၵ်းၽိူၵ်ႇ ၵၢင်ႈၽႃပႅၼ်ႈ၊ သိူဝ်ႇပႅၼ်ႈ ပဵၼ်ဝတ်ႉ/ၵျွင်းၸၼ်ႉလဵဝ် ၼႆယဝ်ႉ။
“ၵဵဝ်ႇၵပ်းလွင်ႈၼႆႉ ယူႇတီႈႁွင်ႈၵၢၼ်လူင်ပွင်ၸိုင်ႈ တီႈမိူင်းၵိုင်ႁဝ်းၶႃႈ တိုၵ်ႉလူႇၶၢမ်ႇၵၼ်သေ တေမိူဝ်းလူႇၶႃႈဢေႃႈ တိုၵ်ႉၶပ်းၶိုင်ဝႆႉယူႇၶႃႈ။ သင်ဝႃႈ ပီႈၼွင်ႉႁဝ်းၶႃႈ ၽူႈလႂ်ၽႂ်သေဢမ်ႇဝႃႈ ၶႂ်ႈၵမ်ႉၸွႆႈလူႇတၢၼ်းၸိုင် ၵပ်းသိုပ်ႇမႃးတီႈ မၢႆၾူၼ်းၶႃႈႁဝ်း 09257030597 ၵေႃႈလႆႈယူႇၶႃႈ”- ၼၢင်းလႅင်းလႅင်းဢူး သိုပ်ႇလၢတ်ႈ ၼႄၼင်ႇၼႆ။
တီႈဝတ်ႉဝိႁၢရ်ၼၼ်ႉ တင်းမူတ်းမီးသင်ၶၸဝ်ႈ 15 တူၼ်ႈ၊ ၽူႈၵွၼ်းဝတ်ႉ 1 တူၼ် လႄႈ ၸဝ်ႈသၢင်ႇ 14 တူၼ်။ ၵူၺ်းၵႃႈ သင်ၶၸဝ်ႈတင်းမူတ်းတႄႉ လွတ်ႈၽေး ၵူႈၸဝ်ႈ ၼႆယဝ်ႉ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ