ပွတ်းၼႂ်မိူဝ်ႈၼႆႉ ၾႆးမႆႈႁူင်းၵဵပ်းၼမ်ႉမၼ်း တီႈႁိမ်းဝဵင်းမႂ်ႇဝၢၼ်ႈႁႆး ၸႄႈဝဵင်းၵေးသီး၊ လူႉသုမ်းၼပ်ႉပၢၵ်ႇသႅၼ် ၼႆယဝ်ႉ။
Photo:by ၵူၼ်းပိုၼ်ႉတီႈဢိူင်ႇဝၢၼ်ႈႁႆး/ ၽွင်းၾႆးတိုၵ်ႉမႆႈ ႁူင်းၵဵပ်းၼမ်ႉမၼ်း ႁိမ်းဝၢၼ်ႈၼွင်ႁီး ၾၢႆႇဢွၵ်ႇဝဵင်းမႂ်ႇဝၢၼ်ႈႁႆး
ဝၼ်းတီႈ 24/11/2020 မိူဝ်ႈၼႆႉ ၵၢင်ၼႂ်မွၵ်ႈယၢမ်း 8 မူင်းပၢႆ၊ ၵိူတ်ႇပိူင်ပဵၼ်ၾႆးၾႃႉသျွတ်ႉသေ ၾႆးမႆႈႁူင်းၵဵပ်းၼမ်ႉမၼ်းတီႈၼိုင်ႈ ၾၢႆႇဢွၵ်ႇဝၢၼ်ႈၼွင်ႁီး ႁိမ်းဝၢၼ်ႈၼွင်ႁီး ဢိူင်ႇဝၢၼ်ႈႁႆး ၸႄႈဝဵင်းၵေးသီး ၸႄႈတွၼ်ႈလွႆလႅမ် ၸိုင်ႈတႆးပွတ်းၸၢၼ်း၊ ထိုင်ၶၢဝ်းယၢမ်း 9 မူင်းပၢႆ ၾႆးၸင်ႇမွတ်ႇၵႂႃႇ။ လွင်ႈလူႉသုမ်း ဢမ်ႇယွမ်းၼပ်ႉႁူဝ်ပၢၵ်ႇသႅၼ်- လႆႈႁူႉၼင်ႇၼႆ။
ၵူၼ်းပိုၼ်ႉတီႈဝၢၼ်ႈႁႆး ဢမ်ႇၶႂ်ႈဢွၵ်ႇၸိုဝ်ႈၵေႃႉၼိုင်ႈလၢတ်ႈဝႃႈ –“ၾႆးမႆႈပွၵ်ႈၼႆႉ မႆႈတီႈႁူင်းၵဵပ်း ၼမ်ႉမၼ်းၵူၺ်းၶႃႈ၊ ဢမ်ႇမႆႈပႃးႁိူၼ်းၵူၼ်းဝၢၼ်ႈ၊ ၸုမ်းၾၢႆႇၶႄၾႆးဝၢၼ်ႈႁႆး တင်း ၵူၼ်းဝၢၼ်ႈ ၸွႆႈၵၼ်ၵႂႃႇၶႄသေ မွတ်ႇၵႂႃႇမိူဝ်ႈၶၢဝ်းယၢမ်း 9 မူင်းပၢႆၶႃႈဢေႃႈ၊ လႆႈႁၼ်ရူတ်ႉၵႃးၶႄၾႆးသွင်လမ်းၵေႃႈ ၵႂႃႇၸွႆႈမွတ်ႇၶႃႈ” ဝႃႈၼႆ။
ႁူင်းၵဵပ်းၼမ်ႉမၼ်း ဢၼ်မီးၾၢႆႇဢွၵ်ႇဝၢၼ်ႈၼွင်ႁီး ဢၼ်ၾႆးမႆႈပွၵ်ႈၼႆႉ မီးၾၢႆႇဢွၵ်ႇဝဵင်းမႂ်ႇဝၢၼ်ႈႁႆး ငဝ်ႈငုၼ်းပႃႇတီႇမႂ်ႇသုင်ၸိုင်ႈတႆး/ တပ်ႉသိုၵ်းၸိုင်ႈတႆး (SSPP/SSA) မွၵ်ႈ 1 လၵ်းၵူၺ်း-ၼႆယဝ်ႉ။
ၵဵဝ်ႇၵပ်းလွင်ႈၼႆႉ တၢင်းၸုမ်းၶၢဝ်ႇၽူႈတွႆႇႁွၵ်ႈ ၶတ်းၸႂ်ၵပ်းသိုပ်ႇတိတ်းတေႃႇ တွင်ႈထၢမ် ၽူႈၶၢၼ်ပၢၵ်ႇ SSPP တင်းသၢမ်ၸဝ်ႈသၢမ်ၵေႃႉသေတႃႉၵေႃႈ ၵပ်းတေႃႇဢမ်ႇလႆႈ ဢမ်ႇႁပ်ႉသၢႆ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ