ပူၼ်ႉမႃး ဝၼ်းတီႈ 24/03/2025 ၼႆႉ ႁႅင်းၵၢၼ်မိူင်းမၢၼ်ႈ 2 ၵေႃႉ လူင်းႁဵတ်းလွင်ႈမူတ်းသႂ် ၼႂ်းလုၵ်းထၢင် ဢၼ်မီးသၢႆၾႆးၾႃႉတႂ်ႈလိၼ် တီႈပွၵ်ႉဝူင်းသဝၢၼ် ၶဵတ်ႇပၢင်သိုဝ်ႉ ဝဵင်းလူင်မိူင်းၵွၵ်ႇ (ၵုင်းထဵပ်ႈ) ၸိုင်ႈထႆး ၺႃးၾႆးၾႃႉသျွတ်ႉ လူႉတၢႆၵႂႃႇ – ၶၢဝ်ႇထႆး ႁၢႆးငၢၼ်းဝႆႉၼင်ႇၼႆ။

ၽူႈမီးပုၼ်ႈၽွၼ်း ၾၢႆႇၸွႆႈထႅမ်ၶဝ် တွပ်ႇလၢတ်ႈဝႆႉတီႈ သိုဝ်ႇၶၢဝ်ႇဝႃႈ – မိူဝ်ႈယၢမ်းၵၢင်ၶိုၼ်းမွၵ်ႈ 12 မူင်းၼၼ်ႉ လႆႈႁပ်ႉလွင်ႈတိူင်ႇၸႅင်ႇမႃး မီးၵူၼ်းၺႃးၾႆးၾႃႉသျွတ်ႉ တီႈႁူဝ်တၢင်း ပရႃႊၶျႃႊၶျိၼ်ႉ ၼႂ်းၶဵတ်ႇပၢင်သိုဝ်ႉၼႆလႄႈ ၸင်ႇလႆႈၵႂႃႇၸွႆႈထႅမ် – ဝႃႈၼႆ။

ဢွင်ႈတီႈ ပဵၼ်ၽေးၵိုင်ႉၵၢင်ႉ ၺႃးၾႆးၾႃႉသျွတ်ႉၼႆႉ ပဵၼ်ၼႂ်းလုၵ်းထၢင် ဢၼ်မီးဝႆႉသၢႆၾႆးၾႃႉတႂ်ႈလိၼ် တၢင်းလိုၵ်ႉမီး 15 မီႊတိူဝ်ႊ တၢင်းၵႂၢင်ႈ 3 မီႊတိူဝ်ႊ။

ၽွင်းႁႅင်းၵၢၼ်မိူင်းမၢၼ်ႈ 2 ၵေႃႉ လူင်းၵႂႃႇႁဵတ်း လွင်ႈမူတ်းသႂ် ႁိုင်မွၵ်ႈ 5 မိၼိတ်ႉၼၼ်ႉ ၵႂႃႇတိူဝ်ႉၺႃး သၢႆၾႆးၾႃႉ ဢၼ်ပွင်ႇသေ ၺႃးၾႆးၾႃႉသျွတ်ႉ ဝႃႈၼႆ။

ၽွင်းၽူႈမီးပုၼ်ႈၽွၼ်းၶဝ် လူင်းၵႂႃႇၸွႆႈထႅမ်ၼၼ်ႉ ယွၼ်ႉလႆႈပႂ်ႉၶၢဝ်းယၢမ်း တတ်းၶၢတ်ႇသၢႆၾႆးၾႃႉ တၢင်ႇဢၼ်လႄႈ ႁိုင်ၶၢဝ်းတၢင်းမွၵ်ႈ 2 ၸူဝ်ႈမူင်း ၸင်ႇၸွႆႈဢဝ်တူဝ်ၶဝ်သွင် ၵေႃႉ ဢွၵ်ႇမႃးလႆႈ။ မိူဝ်ႈၽွင်း ဢဝ်တူဝ်ၶဝ်သွင်ၵေႃႉ ဢွၵ်ႇမႃးၼၼ်ႉ ဢမ်ႇမီးသၢႆၸႂ်ယဝ်ႉ ဝႃႈၼႆ။

ႁႅင်းၵၢၼ်မိူင်းမၢၼ်ႈ 2 ၵေႃႉၼၼ်ႉ ပဵၼ်ၵူဝ်ႇမိၼ်းလုၼ်ႇဝိၼ်း (ကိုမင်းလွင်ဝင်း) ဢႃယု 30 လႄႈ ၵူဝ်ႇလိၼ်းၼၢႆႇ (ကိုလင်းနိုင်) ဢႃယု 35 ပီ။

ဢိင်ၼိူဝ် လွင်ႈပဵၼ်ၽေးၵိုင်ႉၵၢင်ႉ ထိုင်တၢႆၼႆႉသေ ၼင်ႇႁိုဝ် တေလႆႈၵႃႈသၢႆႈတႅၼ်း ဢၼ်ၵိုင်ႇလႆႈၼၼ်ႉ ယူႇတီႈ ၸုမ်း AAC ၾၢႆႇၸွႆႈထႅမ်ႁႅင်းၵၢၼ်မိူင်းမၢၼ်ႈ တေၸွႆႈတုၵ်းယွၼ်းၵႂႃႇၼႆ – သိုဝ်ႇၶၢဝ်ႇ DVB ဢွၵ်ႇဝႆႉၼင်ႇၼႆ။