ၽူႈၵွၼ်းဝတ်ႉပၢင်ႇၶႃး ၸႄႈဝဵင်းသီႇပေႃႉ ၺႃးၸဝ်ႈသၢင်ႇၾၼ်း တီႈၵွင်ႇၵေႃႈ မၢတ်ႇၸဵပ်းႁၢဝ်ႈႁႅင်း လႆႈႁၢမ်သူင်ႇ ႁူင်းယႃ ဝႃႈၼႆ။
မိူဝ်ႈၼႆႉဝၼ်းတီႈ 18/11/2020 ယၢမ်းၵၢင်ၼႂ် ၸဝ်ႈသၢင်ႇတူၼ်ၼိုင်ႈ လၢၵ်ႈၽႃႉ/ မိတ်ႈၾၼ်းသႂ်ႇ ၸဝ်ႈၵွၼ်းဝတ်ႉ တီႈဝၢၼ်ႈပၢင်ႇၶႃး ဢိူင်ႇဢုမ်မူႉ ၸႄႈဝဵင်းသီႇပေႃႉ ၸႄႈတွၼ်ႈၵျွၵ်ႉမႄး ၸိုင်ႈတႆးပွတ်းႁွင်ႇ ။ ၸဝ်ႈၵွၼ်းဝတ်ႉမၢတ်ႇၸဵပ်း တီႈ ၵွင်ႇၵေႃႈ ႁၢဝ်ႈႁႅင်း လႆႈသူင်ႇယူတ်းယႃတီႈႁူင်းယႃသီႇပေႃႉ ။
ၸၢႆးသႅင် ၽူႈတူင်ႉၼိုင်ၸွႆႈထႅမ် တူင်ႇဝူင်းၵူၼ်း သီႇပေႃႈ လၢတ်ႈဝႃႈ -“ၸႂ်ႈၶႃႈဢေႃႈ ပဵၼ်ၸဝ်ႈသၢင်ႇဢဝ်ၽႃႉ မိတ်ႈၾၼ်းၶိုၼ်းၽူႈၵွၼ်းဝတ်ႉ။ ၾၼ်းၵမ်းလဵဝ် တိူဝ်ႉၺႃးတီႈၵွင်ႈၵေႃႈမၼ်းၸဝ်ႈ။ ဢိင်ၼိူဝ် လွင်ႈၼႆႉ လႆႈမႃး ပိုတ်ႇလိူင်ႈဝႆႉတီႈႁူင်းပလိၵ်ႈယဝ်ႉ ၸဝ်ႈသၢင်ႇၵေႃႉၽၼ်းသႂ်ႇၼၼ်ႉ တေလႆႈလွၼ်ႈသၢင်ႇၵၢၼ်းသေ တူၵ်းၶွၵ်ႈ ၸွမ်းၼင်ႇ ပၢၵ်းပိူင်မၢႆမီႈဝၢၼ်ႈမိူင်းမီးၼၼ်ႉၶႃႈယဝ်ႉ”- ဝႃႈၼႆ။
ယွၼ်ႉသင်လႄႈ ထိုင်တီႈပေႃးလႆႈလၢၵ်ႈၽႃႉၾၼ်းၵၼ်ၼႆၼၼ်ႉ ဢမ်ႇလႆႈႁူႉၸွမ်း ။ ၵူၼ်းပိုၼ်ႉတီႈလၢမ်းၶၢတ်ႈဝႃႈ ယူဝ်မီးလွင်ႈဢမ်ႇႁၢၼ်ႉၸႂ်တေႃႇၵၼ် ၼႂ်းၵႄႈ 2 တူၼ်ႁိုဝ် ဝႃႈၼႆ။
ယၢမ်းလဵဝ် ၸဝ်ႈၽူႈၵွၼ်းဝတ်ႉပၢင်ႇၶႃးတႄႉ လႆႈသူင်ႇယူတ်းယႃတူဝ်ဝႆႉတီႈႁူင်းယႃသီႇပေႃႉ။ ၸဝ်ႈသၢင်ႇဢၼ် ၾၼ်းသႂ်ႇၼၼ်ႉတႄႉ ထုၵ်ႇၵုမ်းတူဝ်ဝႆႉသေ တေၺႃးတူတ်ႈတၢမ်ႇၵႂႃႇၸွမ်းၼင်ႇမၢႆမီႈဝၢၼ်ႈမိူင်းမီးၼၼ်ႉ ဝႃႈၼႆ။
