ၸႄႈဝဵင်းမိူင်းသၢတ်ႇ ၸိုင်ႈတႆးပွတ်းဢွၵ်ႇၶူင်း ပႃႇတီႇသၢင်ႇသီႈ USDP ပေႉပုၼ်ႈၵိၼ်ၶၢတ်ႇ တင်းဝဵင်းထႅင်ႈ ဝႃႈၼႆ။

ပၢင်လိူၵ်ႈတင်ႈ ပတ်းပိုၼ်ႉမိူင်းႁူမ်ႈတုမ် 2020 ၼႆႉ ၸႄႈဝဵင်းမိူင်းသၢတ်ႇ ၸိုင်ႈတႆးပွတ်းဢွၵ်ႇၶူင်း ပႃႇ တီႇသၢင်ႇသီႈ USDP ပေႉပုၼ်ႈၵိၼ်ၶၢတ်ႇဝႆႉတင်း 3 တီႈၼင်ႈ ၽူႈတႅၼ်းသၽႃးၵူၼ်းမိူင်း၊ ၸႄႈမိူင်းမၢႆ 1 တင်း မၢႆ 2 ၸိူဝ်း ၼႆႉ။

ၸၢႆးၼၼ်ႇတီႇ ၼေႃႇၽူႈတႅၼ်းသၽႃး ပႃႇတီႇသိူဝ်ၽိူၵ်ႇ SNDP ၸႄႈဝဵင်းမိူင်းသၢတ်ႇ လၢတ်ႈဝႃႈ – “ယၢမ်းလဵဝ်ၼႆႉ သၢင်ႇသီႈၶဝ် ပေႉဝႆႉ တင်းသၢမ်တီႈၼင်ႈဝႆႉ။ ၵူၺ်းၵႃႈ ဢွင်ႈတီႈသၽႃးၸႄႈမိူင်းမၢႆ 2 ၼၼ်ႉတႄႉ ၼေႃႇၽူႈ တႅၼ်းၼူၵ်ႉယုင်း   မၢႆ 2   တေသၢၼ်ၶတ်းၼႆၶႃႈ လႆႈငိၼ်းဝႆႉၸိူင်ႉၼၼ်ၶႃႈဢေႃႈ”- ဝႃႈၼႆ။

ၶဵတ်ႇလိူၵ်ႈတင်ႈမၢႆ 2 မိူင်းသၢတ်ႇၼႆႉ ပဵၼ်ထုင်ႉလုၵ်ႈမေး ပီႈၼွင်ႉၸၢဝ်းဝႃႉယူႇသဝ်းတူင်ႉၼိုင် ပဵၼ်ၼႂ်း 4 ဢိူင်ႇ ဢၼ်ၺႃးပႃႇတီႇယႂ်ႇ 4 ဢၼ်လူင်းလၢႆးမိုဝ်း သူင်ႇလိၵ်ႈၸူး ၶွမ်ႊမသျိၼ်ႊပၢင်လိူၵ်ႈတင်ႈမိူင်းႁူမ်ႈတုမ်မိူဝ်ႈဝၼ်တီႈ 3/11/2020 ။ ၵူၺ်းၵႃႈ ၾၢႆႇ UEC တွပ်ႇၶိုၼ်းဝႃႈ ဢမ်ႇယုၵ်ႉလိူၵ်ႈၵၢၼ်လိူၵ်ႈတင်ႈ တေသိုပ်ႇၸတ်း။

ပၢင်လိူၵ်ႈတင်ႈ ဝၼ်းတီႈ 8/11/2020 ၸတ်းယဝ်ႉတူဝ်ႈယဝ်ႉတေႃႇထိုင် ဝၼ်းတီႈ 10/11/2020 ဝၼ်းမိူဝ်ႈၼႆႉ ဢၢၼ်ႇၶႅပ်းမႄးယင်းပႆႇယဝ်ႉတူဝ်ႈ၊ ဢမ်ႇမီးလွင်ႈ လွတ်ႈလႅဝ်း ပူင်ႇသႂ်ၼႆသေ ယူႇတီႈပႃႇတီႇ NLD တေသၢၼ်ၶတ်းၵႂႃႇ- ၸုမ်းၸွႆႈၵၢၼ်ပၢင်လိူၵ်ႈတင်ႈ မိူင်းသၢတ်ႇလၢတ်ႈၼေၼင်ႇၼႆ။

ၼေႃႇၽူႈတႅၼ်းသၽႃးပႃႇတီႇသၢင်ႈ USDP ဢၼ်ၶဝ်ႈၶဵင်ႇ ၼႂ်းၸႄႈဝဵင်းမိူင်းသၢတ်ႇၼႆႉ ၸၢႆးၶၢတ်းတိယ ၼေႃႇၽူႈတႅၼ်း  သၽႃးၵူၼ်းမိူင်း၊ ဢူးတၢၼ်းဝိၼ်း ၼေႃႇၽူႈတႅၼ်းသၽႃးၸႄႈမိူင်းမၢႆ 1 ၊ ဢူးယေႃးပ ၼေႃႇၽူႈတႅၼ်းသၽႃးၸႄႈမိူင်းမၢႆ 2 လႄႈ ဢူးဝုၺ်ႊလသိၼ်ႇမူဝ်း ၼေႃႇၽူႈတႅၼ်းသၽႃးၸိူဝ်ႉၸၢတ်ႈ ၸိူဝ်းၼႆႉ။

တီႈမိူင်းသၢတ်ႇၼႆႉ တင်ႈဢဝ်ပၢင်လိူၵ်ႈတင်ႈ 2010 မႃးတေႃႇထိုင်ယၢမ်းလဵဝ် ပၢင်လိူၵ်ႈတင်ႈ 3 ၵမ်းၼႆႉ ပႃႇတီႇသၢင်ႇသီႈ ဢွင်ႇပေႉပၢင်လိူၵ်ႈတင်ႈတင်း 3 ၵမ်း။