ဝဵင်းတူၼ်ႈတီး ဢၢၼ်ႇၶႅပ်းၵၢင်ၸႂ်ပႆႇယဝ်ႉတူဝ်ႈ ၼေႃႇၽူႈတႅၼ်းလႄႈၸၢဝ်းပဢူဝ်းမႃးပႂ်ႉတူၺ်းတင်းၼမ်

ဝဵင်းလူင်တူၼ်ႈတီး ငဝ်ႈဝဵင်းၸိုင်ႈတႆးၼၼ်ႉ ၶွမ်ႊမသျိၼ်ႊ ၸႄႈဝဵင်းဢၢၼ်ႇၶႅပ်းၵၢင်ၸႂ်ပၢင်လိူၵ်ႈတင်ႈ ႁိုင်ၼၢၼ်းလႆႈမႃး 2 ဝၼ်းယဝ်ႉယင်းပႆႇယဝ်ႉတူဝ်ႈလႄႈ ထိုင်တီႈၼေႃႇၽူႈတႅၼ်းလႄႈပီႈၼွင်ႉပဢူဝ်းမႃးပႂ်ႉတူၺ်းၵၢၼ်ဢၢၼ်ႇၶႅပ်းၵၢင်ၸႂ်။

မိူဝ်ႈၼႆႉ ဝၼ်းတီႈ 10/11/2020  ၸၢဝ်းပဢူဝ်း ဢွၼ်ၵၼ်မႃးပႂ်ႉတူၺ်း ၶွမ်ႊမသျိၼ်ႊၵေႃၵမ်ၵၢၼ်လိူၵ်ႈတင်ႈ လွင်ႈၼပ်ႉၶႅပ်းၵၢင်ၸႂ် တီႈႁူင်းႁေႃ ၸႄႈဝဵင်းတူၼ်ႈတီး ၸိုင်ႈတႆးပွတ်းၸၢၼ်း ။

 ၸၢႆးၼုမ်ႇ ၸၢဝ်းပဢူဝ်း ဝဵင်းတူၼ်ႈတီးၵေႃႉၼိုင်ႈလၢတ်ႈဝႃႈ   – “ဢၼ်ႁဝ်းၶႃႈ ဢွၼ်ၵၼ်မႃးပႂ်ႉတူၺ်းၼႆႉ ၸွင်ႇမီး လွင်ႈမၢၼ်ႇမႅၼ်ႈ ဢမ်ႇမၢၼ်ႇမႅၼ်ႈပဵၼ်ထမ်း။ တီႈတႄႉမၼ်း ၶႅပ်းၵၢင်ၸႂ်ၼႆႉ ပေႃးလူဝ်ႇလႆႈႁူႉၶေႃႈတွပ်ႇမၼ်း ၸဵမ်မိူဝ်ႈ ဝႃးၶႃႈယဝ်ႉ။ တေႃႇထိုင်ယၢမ်းလဵဝ် ပႆႇလႆႈႁူႉၶႃႈ”- ဝႃႈၼႆ။

ၸႄႈဝဵင်းတူၼ်ႈတီးၼႆႉ တေႃႇထိုင်ယၢမ်းလဵဝ် ပႆႇႁူႉဝႃႈ ပႃႇတီႇလႂ်ပေႉ မိူဝ်ႈၼႆႉ ယၢမ်းၵၢင်ၶမ်ႈ ၸင်ႇတေပိုၼ်ၽၢဝ်ႇ ဢွၵ်ႇ ပဵၼ်တၢင်းၵၼ် လႆႈႁူႉဝႆႉၼင်ႇၼႆ။

တီႈဝဵင်းလူင်တူၼ်ႈတီး ငဝ်ႈဝဵင်းၸိုင်ႈတႆးၼႆႉ ပႃႇတီႇဢၼ်ၶဝ်ႈၶေႉၶဵင်ႇၵၼ်မီး 10 ပၢႆ။

ယၢမ်းလဵဝ်   ပႃႇတီႇၼူၵ်ႉယုင်း NLD  လႆႈၶႅပ်းၵၢင်ၸႂ်ၼမ်လိူဝ်ဝႆႉ  ။