ၸႄႈဝဵင်းလၢင်းၶိူဝ်း ၸိုင်ႈတႆးပွတ်းၸၢၼ်း တီႈဢၼ်မီလုမ်းၸႄႊတွၼ်ႈပၵ်းသဝ်းဝႆႉၼၼ်ႉ  ပႃႇတီႇႁူဝ်သိူဝ် SNLD ပေႉပုၼ်ႈၵိၼ်ၶၢတ်ႇ ။

ဝဵင်းလၢင်းၶိူဝ်းၼႆႉ ပဵၼ်ဝဵင်းၸႄႈတွၼ်ႈလႄႈ ၶႃႈႁၢပ်ႇၵၢၼ်ၶုၼ်ၵေႃႈၼမ်၊တပ်ႉသိုၵ်းလူင်ပွင်ၸိုင်ႈၵေႃႈပၵ်းဝႆႉ မီး 3 တပ်ႉ။

ပၢင်လိူၵ်ႈတင်ႈ 2020 ၼႆႉ တီႈဝဵင်းလၢင်းၶိူဝ်းမီးပႃႇတီႇႁူဝ်သိူဝ် ပႃႇတီႇသိူဝ်ၽိူၵ်ႇ ပႃႇတီႇ ၼူၵ်ႉယုင်း ပႃႇတီႇသၢင်ႇသီႈ  လႄႈ သုၼ်ႇလဵဝ်   ၶေႉၶဵင်ႇၵၼ်။

ယူႇတီႈၼေႃႇၽူႈတႅၼ်းယိုၼ်ယၼ်လၢတ်ႈၼေၽူႈတွႆႇႁွၵ်ႈဝႃႈ – ပႃႇတီႇႁူဝ်သိူဝ် SNLD လႆႈၶႅပ်းမႄးၼမ်သုတ်းတင်း 4 တီႈၼင်ႈ  ၽူႈတႅၼ်းသၽႃးၸိူဝ်ႉၸၢတ်ႈ၊ ၵူၼ်းမိူင်း၊ ၸႄႈမိူင်းမၢႆ 1 တင်း မၢႆ 2 ။

ၵူၺ်းၵႃႈ ယူႇတီႈၶွမ်ႊမသျိၼ်ႊတႄႉပႆႇပိုၼ်ၽၢဝ်ႇပဵၼ်တၢင်းၵၢၼ်။

ၽူႈတႅၼ်းသၽႃးပႃႇတီႇႁူဝ်သိူဝ် SNLD  ဢၼ်လႆႈၶႅပ်းမႄးၼမ်သုတ်းတီႈဝဵင်းလၢင်းၶိူဝ်းၼႆႉပဵၼ် ၸၢႆးထုၼ်းဢေး / ဝုၼ်းဢေး ၽူႈတႅၼ်းသၽႃးၸိူဝ်ႉၸၢတ်ႈ၊ ၸၢႆးဢွင်ႇၶိၼ်ႇ ၽူႈတႅၼ်းသၽႃးၵူၼ်းမိူင်း၊ ၼၢင်းၶမ်း/ ၶမ်းဢူး ၽူႈတႅၼ်းသၽႃးၸႄႈမိူင်း မၢႆ 1 လႄႈ ၸၢႆးၵျေႃႇၸဵင်ႇ ၽူႈတႅၼ်းသၽႃး ၸႄႈမိူင်းမၢႆ 2 ၸိူဝ်းၼႆႉ။

မိူဝ်ႈပၢင်လိူၵ်ႈတင်ႈ 2015 ၼၼ်ႉၵေႃႈတီႈလၢင်းၶိူဝ်းၼႆႉ ပႃႇတီႇႁူဝ်သိူဝ် SNLD ဢွင်ႇပေႉလႆႈတီႈၼင်ႈၼႂ်းသၽႃးတင်း 4 တီႈၼင်ႇၵဝ်ႇ။

ၸႄႈဝဵင်းလၢင်းၶိူဝ်းၼႆႉ ၵူၼ်းမီးသုၼ်ႇတွတ်ႈၶႅပ်းမီး 26000 ပၢႆ။ မီးႁူင်းတွတ်ႈၶႅပ်းမႄး 39 ႁူင်း။