တီႈႁူင်းတွတ်ႈၶႅပ်းၵၢင်ၸႂ် မၢႆ 1 ပွၵ်ႉ 5 ၸႄႈဝဵင်းၵဵင်းတုင် ၵူၼ်းမိူင်း 90 ပၢႆ တွတ်ႈၶႅပ်းၵၢင်ၸႂ် လူင်ႈၼႃႈ တွတ်ႈၶႅပ်းမႄး ၽိတ်းၽူၼ်ဝႆႉလႄႈ ၼေႃႇၽူႈတႅၼ်းပႃႇတီႇ ဢွၼ်ၵၼ်သၢၼ်ၶတ်း ႁႂ်ႈယုၵ်ႉလိူၵ်ႈပႅတ်ႈၶႅပ်းၵၢင်ၸႂ်ၼၼ်ႉ ႁႂ်ႈပဵၼ်ၶႅပ်းၵၢင် လူႉ ၼႆယဝ်ႉ။
မိူဝ်ႈဝႃး ဝၼ်းတီႈ 8/11/2020 ၼႆႉ ပဵၼ်ဝၼ်းပၢင်လိူၵ်ႈတင်ႈ ၵူႈလွင်ႈလွင်ႈ ပတ်းပိုၼ်ႉ မိူင်းႁူမ်ႈတုမ် ဢွင်ႈတီႈႁူင်းတွတ်ႈ ၶႅပ်းၵၢင်ၸႂ် မၢႆ 1 ဝၢၼ်ႈသုၽုမ်းမႃး ပွၵ်ႉ 5 ၸႄႈဝဵင်းၵဵင်းတုင် ၸိုင်ႈတႆးပွတ်းဢွၵ်ႇၶူင်း မီးၵူၼ်းတွတ်ႈၶႅပ်းၵၢင်ၸႂ်လူင်ႈၼႃႈ 94 ၵေႃႉ ၵူၺ်းၵႃႈ ၽိတ်းဝႂ်မၼ်းဝႆႉ ၼႆယဝ်ႉ။
ၸၢႆးၼုမ်ႇၵွၼ်း ၽူႈပွင်ၵၢၼ် ၸုမ်းၸွႆႈထႅမ်ပႃႇတီႇႁူဝ်သိူဝ် ၸႄႈဝဵင်းၵဵင်းတုင် လၢတ်ႈဝႃႈ – “ၶွမ်ႊမသျိၼ်ႊၶဝ်ၼႆႉ ဢဝ်ၶႅပ်း ၵၢင်ၸႂ်ၽိတ်းၽူၼ်ၵၼ်ဝႆႉၶႃႈဢေႃႈ တီႈပွၵ်ႉ 5 ၼၼ်ႉ မၼ်းလူဝ်ႇပဵၼ်ၶဵတ်ႇသဵင်မၢႆ 2 ၵမ်းၼႆႉ ၶဝ်ပၼ်ၵႂႃႇသမ်ႉ ပဵၼ်ၶႅပ်း ၵၢင်ၸႂ် ၶဵတ်ႇသဵင်မၢႆ 1 ႁဵတ်းၼႆၶႃႈဢေႃႈ။ ဢၼ်ၵူၼ်း 94 ၵေႃႉ တွတ်ႈၵႂႃႇၼၼ်ႉ ပဵၼ်ၶႅပ်းၵၢင်ၸႂ် ၶဵတ်ႇသဵင်မၢႆ 1 ၶႃႈဢေႃႈ” – ဝႃႈၼႆ။
လွင်ႈၼႆႉ ယူႇတီႈၼေႃႇၽူႈတႅၼ်ႈပႃႇတီႇ ဢၼ်ၶဝ်ႈၶႅင်ႇတီႈၶဵတ်ႇသဵင်ၼၼ်ႉ ဢွၼ်ၵၼ် သၢၼ်ၶတ်း ႁႂ်ႈလႆႈပဵၼ်ၶႅပ်းၵၢင် ၸႂ်လူႉ ၼႆယဝ်ႉ။
“လွင်ႈၼႆႉ ယူႇတီႈလၢႆပႃႇတီႇႁူမ်ႈၵၼ် သၢၼ်ၶတ်းၶႃႈဢေႃႈ ႁႂ်ႈပဵၼ်ၶႅပ်းၵၢင်ၸႂ်လူႉပႅတ်ႈ။ ၵူၺ်းၵႃႈ ပႃႇတီႇၼူၵ်ႉယုင်းသမ်ႉ ၵမ်ႉထႅမ် ယႃႇႁႂ်ႈပဵၼ်ၶႅပ်းၵၢင်ၸႂ်လူႉၼႆၶႃႈဢေႃႈ” – ၸၢႆးၼုမ်ႇၵွၼ်း သိုပ်ႇလၢတ်ႈၼႄၼင်ႇၼႆ။
ၵဵဝ်ႇၵပ်းလွင်ႈၼႆႉ တေထုၵ်ႇႁဵတ်းႁိုဝ်ၼႆႉ တေပၢၵ်ႈပႅတ်ႈ ပဵၼ်ၶႅပ်းၵၢင်ၸႂ်လူႉႁႃႉ ဢမ်ႇလူႉ ဢၼ်ဝႃႈၼၼ်ႉ တေယူႇတီႈ ၶွမ်ႊမသျိၼ်ႊၸႄႈတွၼ်ႈသေ တေတႅပ်းတတ်းလူင်း ၼႆယဝ်ႉ။