ၵူၼ်းမိူင်းဢၼ်ယူႇသဝ်းၼႂ်း ငဝ်ႈငုၼ်းဝၢၼ်ႈႁႆး SSPP ၵုမ်းၵမ်ဝႆႉၼၼ်ႉ ဢွၼ်ၵၼ်ၵႂႃႇ တွတ်ႈၶႅပ်းၵၢင်ၸႂ် ထၢင်ႇ ႁၢင်ႈလွတ်ႈလႅဝ်းၵၼ် တင်းၼမ် ဝႃႈၼႆ။
မိူဝ်ႈၼႆႉ ဝၼ်းတီႈ 8/11/2020 ယၢမ်းၵၢင်ၼႂ် 6 မူင်း တေႃႇထိုင် 4 မူင်းႁူဝ်ၶမ်ႈ ပဵၼ်ဝၼ်းတွတ်ႈၶႅပ်းၵၢင်ၸႂ် ၵူႈလွင်ႈလွင်ႈ ပတ်းပိုၼ်ႉ မိူင်းႁူမ်ႈတုမ်လႄႈ ၵူၼ်းမိူင်း ၸိူဝ်းယူႇၼႂ်းငဝ်ႈငုၼ်းဝၢၼ်ႈႁႆး ပႃႇတီႇမႂ်ႇသုင်ၸိုင်ႈတႆး/ တပ်ႉသိုၵ်းၸိုင်ႈတႆး SSPP/SSA ၵုမ်းၵမ်ဝႆႉၼၼ်ႉ ဢွၼ်ၵၼ်ၵႂႃႇတွတ်ႈၶႅပ်းၵၢင်ၸႂ် ထၢင်ႇႁၢင်ႈလွတ်ႈလႅဝ်းၵၼ် တင်းၼမ် ၼႆယဝ်ႉ။
ၸဝ်ႈႁၢၼ် ၸၢႆးတၢၼ်းဢွင်ႇ ၽူႈၶၢၼ်ပၢၵ်ႇ SSPP လၢတ်ႈဝႃႈ – “ယၢမ်းလဵဝ် ဢွၼ်ၵၼ်ၵႂႃႇတွတ်ႈၵၼ်ၼမ်ၼႃႇၶႃႈယဝ်ႉ။ ၸဵမ်ယိင်း/ၸၢႆး တင်းမူတ်းၶႃႈဢေႃႈ ၸိူဝ်းမီးသုၼ်ႇတွတ်ႈၶႅပ်းၵၢင်ၸႂ်ၼၼ်ႉၶႃႈ ၵမ်ႉၶႃႈၵေႃႈ တေၵႂႃႇတွတ်ႈၶႃႈဢေႃႈၼႆႉ- ဝႃႈၼႆ။
ငဝ်ႈငုၼ်းဝၢၼ်ႈႁႆးၼႆႉ တင်းမူတ်းမီးႁူင်းတွတ်ႈၶႅပ်းၵၢင်ၸႂ် 3 ႁူင်း။တီႈ ႁူင်းႁဵၼ်းတီႈၼိုင်ႈ၊တီႈ ဝၢၼ်ႈပၢင်လူင် တီႈၼိုင်ႈလႄႈတီႈ ဝၢၼ်ႈပႃၶီး တၢင်းၽႄၵႂႃႇမိူင်းသူႈ တီႈၼိုင်ႈ ၼႆယဝ်ႉ။
လိူဝ်ၼၼ်ႉ ၵူၼ်းမိူင်းဢၼ်ယူႇၼႂ်းငဝ်ႈငုၼ်းဝၢၼ်ႈႁႆး SSPP ၵုမ်းၵမ်ဝႆႉသေ မီးသုၼ်ႇတွတ်ႈၶႅပ်းၵၢင်ၸႂ်ၼၼ်ႉ တင်းမူတ်း မီးႁူဝ်ၵူၼ်းတွတ်ႈၶႅပ်းၵၢင်ၸႂ် ဢမ်ႇယွမ်း 700 ၵေႃႉ ၼႆယဝ်ႉ။
“ၵူၼ်းမိူင်းႁဝ်းၶႃႈ ၸိူဝ်းဢမ်ႇပႃးၸိုဝ်ႈမႃး ၶဝ်သမ်ႉမီးဝႂ်ၵပ်းတူဝ်/ မၢႆၾၢင်လႄႈ မုင်ႉႁေႃႁိူၼ်းယူႇၸိုင် ၵႂႃႇတွတ်ႈပၼ် လႆႈယူႇၶႃႈ။ ယွၼ်ႉတီႈႁဝ်းၶႃႈၼႆႉ မီးႁူင်းတွတ်ႈ 3 တီႈ လႄႈ ၵူၼ်းၵႂႃႇတွတ်ႈမၼ်း ပေႃးၶႂ်ႈမူတ်းယဝ်ႉၶႃႈယူဝ်ႉ” – ၸဝ်ႈႁၢၼ် တၢၼ်းဢွင်ႇ လၢတ်ႈၼႄၼင်ႇၼႆ။
တီႈငဝ်ႈငုၼ်းဝၢၼ်ႈႁႆး SSPP ၼႆႉ ၸတ်းႁဵတ်းပၢင်လိူၵ်ႈတင်ႈမႃး မီး 3 ၸုပ်ႇ ပႃးပွၵ်ႈၼႆႉယဝ်ႉ။ မိူဝ်ႈပီ 2010 တင်း 2015 ၼၼ်ႉၵေႃႈ ၸတ်းႁဵတ်းမႃးယူႇ ဝႃႈၼႆ။
