မိူဝ်ႈၼႆႉ ဝၼ်းတီႈ 8/11/2020 ယၢမ်းၵၢင်ၼႂ် လုၵ်ႈဢွၼ်ႇ ဢႃယု ပႆႇတဵမ် 18 ပီ ဢွၼ်ၵၼ် ယိပ်းဝႂ်တူဝ်ႇၵိၼ်ႇ (ဝႂ်ၶိဝ်း) ၵႂႃႇ သႂ်ႇၶႅပ်းၵၢင်ၸႂ် ၼႂ်းၶဵတ်ႇသဵင်လိူၵ်ႈတင်ႈမၢႆ 2 တင်းၼမ် မိူၼ်ၼင်ႇ ႁူင်းတွတ်ႈၶႅပ်း ၼမ်ႉယွၼ်း၊ ႁူင်းႁဵၼ်း ဝၢၼ်ႈမႂ်ႇ၊ ဝၢၼ်ႈ ၾၢႆ ၸႄႈဝဵင်းမိူင်းတူၼ် ၸႄႈတွၼ်ႈမိူင်းသၢတ်ႇ ၸိုင်ႈတႆးပွတ်းဢွၵ်ႇၶူင်း ဢွင်ႈတီႈ ၸိူဝ်းၼၼ်ႉ ၵမ်ႈၼမ် ပဵၼ်ၼႂ်းတပ်ႉ သိုၵ်းဝႃႉ တူင်ႉၼိုင်ဝႆႉ ၼႆယဝ်ႉ။

ၸၢႆးဝိၼ်းမျၢတ်ႉဢူး ၼေႃႇၽူႈတႅၼ်းသၽႃးၸႄႈမိူင်း မၢႆ 1 ၸႄႈဝဵင်းမိူင်းတူၼ် လၢတ်ႈဝႃႈ -“ၸႂ်ႈၶႃႈဢေႃႈ လုၵ်ႈဢွၼ်ႇ ဢမ်ႇတဵမ် 18 ပီမႃးတွတ်ႈၶႅပ်းၵၢင်ၸႂ် တင်းၼမ် ႁဝ်းၶႃႈ ၵႂႃႇသၢၼ်ၶတ်းတီႈၽူႈၵွၼ်းႁူင်းတွတ်ႈၶႅပ်းယူႇ။ ၶဝ်ၶိုၼ်းလၢတ်ႈ မႃး ၵူၼ်းၸိူဝ်းမႃးတွတ်ႈၶႅပ်းၼၼ်ႉ ၶဝ်ယိပ်းဝႂ်တူင်ႇၵိၼ်ႇမႃးယူႇလူး ပၼ်တွတ်ႈသေလႄႈ ဝႃႈၼႆ။ ယၢပ်ႇဝႆႉၶႃႈဢေႃႈၼႆႉ။ ႁၢင်ႈႁၢႆႉၼႃႇၶႃႈ ၵူၼ်းဢၼ်မႃးတွတ်ႈ ႁူဝ်ၵူၼ်းမွၵ်ႈပၢၵ်ႇၼႆႉ တႃႇ 70 -80 ၵေႃႉဝႂ်တူဝ်ႇၵိၼ်ႇ ဢၼ်ၶဝ်ယိပ်းမႃးၼႆႉ တင်း တူဝ် တင်းဝႂ်ၶဝ် ဢမ်ႇငၢမ်ႇမႅၼ်ႈၵၼ်” – ဝႃႈၼႆ။

ဢိင်ၼိူဝ်လွင်ႈၼႆႉ ယူႇတီႈၼေႃႇၽူႈတႅၼ်းပႃႇတီႇႁူဝ်သိူဝ် သၢၼ်ၶတ်းႁူင်းတွတ်ႈၶႅပ်း ၸိူဝ်းၼၼ်ႉ ႁႂ်ႈယုၵ်ႉလိူၵ်ႈပႅတ်ႈ ဢၼ်တွတ်ႈဝႆႉၸိူဝ်းၼၼ်ႉ ဝႃႈၼႆ။

“ဢမ်ႇမီးမၢႆၾၢင်သေ ၵူၼ်းၵေႃႉဢၼ်ယိပ်းဝႂ်တူင်ႇၵိၼ်ႇမႃးၼႆႉ ပဵၼ်ၵူၼ်းပႃး ၼႂ်းသဵၼ်ႈမၢႆၼၼ်ႉ ၸႂ်ႈဢမ်ႇၸႂ်ႈၼႆ ႁဝ်းၶႃႈ ပႆႇၸၢင်ႈထတ်း သင်သေဢိတ်း။ ဝၢႆးလင်ပၢင်လိူၵ်ႈတင်ႈၼႆႉ ႁဝ်းၶႃႈ တေတၢင်ႇယိုၼ်ႈ ႁႂ်ႈယုၵ်ႉလိူၵ်ႈပႅတ်ႈၶႅပ်းၵၢင်ၸႂ် ၸိူဝ်းၼၼ်ႉၶႃႈဢေႃႈ မၼ်းဢမ်ႇမီးလွင်ႈၽဵင်ႇပဵင်းသင်ၶႃႈ”- ၸၢႆးဝိၼ်းမျၢတ်ႉဢူး လၢတ်ႈၼႄၼင်ႇၼႆ။

ၼႂ်းၸႄႈဝဵင်းမိူင်းတူၼ်ၼႆႉ ၵူၼ်းမီးသုၼ်ႇတွတ်ႈၶႅပ်းၵၢင်ၸႂ် တင်းမူတ်းမီး 47,000 ပၢႆ ၼႆယဝ်ႉ။

ဢူးဢွင်ႇမိၼ်ႉဢူး ႁူဝ်ပဝ်ႈၶွမ်ႊမသျိၼ်ႊ ၸႄႈဝဵင်းမိူင်းတူၼ် လၢတ်ႈဝႃႈ – “ဢၼ်မႃးလၢတ်ႈပဵၼ်တၢင်းၵၢၼ်တႄႉ ဢမ်ႇမီး။ တိုၵ်ႉလႆႈငိၼ်းၶၢဝ်ႇၸိူင်ႉၼၼ်ၵူၺ်း။ ၼေႃႇၽူႈတႅၼ်းသၽႃးၶဝ်မႃးသၢၼ်ၶတ်းယူႇ လွင်ႈလုၵ်ႈဢွၼ်ႇတွတ်ႈၶႅပ်းၼၼ်ႉ။ ယူႇတီႈႁဝ်းၶႃႈတႄႉၸဵမ် ပိုင်းတိုၼ်းလၢတ်ႈဝႆႉယူႇ လုၵ်ႈဢွၼ်ႇဢႃယု ဢမ်ႇတဵမ် 18 ပီ တေဢမ်ႇလႆႈတွတ်ႈၶႅပ်းၵၢင်ၸႂ်။ တိုၼ်းတေဢမ်ႇလႆႈၵၢႆၸမ်ႁူင်းတွတ်ႈၶႅပ်းၵၢင်ၸႂ်ၼႆၵွၼ်ႇဢေႃႈ”- ဝႃႈၼႆ။

ၵူၺ်းၵႃႈၾၢႆႇၶွမ်ႊမသျိၼ်ႊတႄႉ တေသိုပ်ႇဢဝ်လိူင်ႈၸိူင်ႉႁိုဝ် ၼႆ ဢမ်ႇလၢတ်ႈတီႈၽူႈတွႆႇႁွၵ်ႈတႅၵ်ႇလႅင်း။

ၵူၼ်းပိုၼ်ႉတီႈတႄႉလၢတ်ႈၼေၽူႈတွႆႇႁွၵ်ႈ ဝႃႈ ပဵၼ်လုၵ်ႈဢွၼ်ႇၸိူဝ်းလၢတ်ႈၵႂၢမ်းဝႃႉ ဝႃႈၼႆ။ လွင်ႈၼႆႉတႄႉယူႇတီႈၽူႈတွႆႇႁွၵ်ႈပႆႇၸၢင်ႈယိုၼ်ယၼ်ပဵၼ်တၢင်းၵၢၼ်။

ၼႂ်းၸႄႈဝဵင်းမိူင်းတူၼ်ၼႆႉ ႁူဝ်ၵူၼ်းပီႈၼွင်ႉၸၢဝ်းၶိူဝ်းဝႃႉ တင်းမူတ်းမီး 23,000 ပၢႆ။ ၼႂ်းၼၼ်ႉ ဢၼ်ဢမ်ႇမီးဝႂ်ၵပ်းတူဝ် မီးမွၵ်ႈ 16,000 ပၢႆ။ လိူဝ်ၼၼ်ႉ ၼႂ်းၸႄႈဝဵင်းမိူင်း သၢတ်ႇၵေႃႈ ႁူဝ်ၵူၼ်းတင်းမူတ်းမီး 20,000 ပၢႆ ဢၼ်ဢမ်ႇမီးဝႂ်ၵပ်းတူဝ် 12,000 ပၢႆ ၼႆယဝ်ႉ။