မိူဝ်ႈၼႆႉ ဝၼ်းတီႈ 8/11/2020 ယၢမ်းၵၢင်ဝၼ်း မွၵ်ႈ 11 မူင်း တီႈႁူင်းတွတ်ႈၶႅပ်း ၵၢင်ၸႂ် မၢႆ 1 တီႈဢိူင်ႇၼွင်လႅင် ဝဵင်းပၢင် လူင် ၸႄႈဝဵင်းလွႆလႅမ် ၸိုင်ႈတႆးပွတ်းၸၢၼ်း ၵူၼ်းမႃးတွတ်ႈၸမ်တေမူတ်းယဝ်ႉ ဝႃႈၼႆ။
ၸၢႆးဢွင်ႇၶမ်း ၽူႈၵွၼ်းဢိူင်ႇၼွင်လႅင် လၢတ်ႈဝႃႈ – “ယၢမ်းလဵဝ်ၼႆႉ တီႈႁူင်းတွတ်ႈ ၶႅပ်း မၢႆ 1 တီႈၼွင်လႅင်ၼႆႉ ၵူၼ်းမႃး တွတ်ႈ ၸမ်တေမူတ်းယဝ်ႉ။ လိူဝ်ထႅင်ႈ 3 ႁူင်းၼၼ်ႉၵေႃႈ ၶႂ်ႈဝႃႈ မိူၼ်ၵၼ်ယဝ်ႉၶႃႈ။ မိူဝ်ႈပီ 2015 ၼၼ်ႉ တီႈဢိူင်ႇႁဝ်းၶႃႈ ၼႆႉ မီး 2 ႁူင်းၵူၺ်းၶႃႈ ပီၼႆႉ မီး 4 ႁူင်းလႄႈ ဝႆးၶႃႈဢေႃႈ။ ႁဝ်းၶႃႈ တေပႂ်ႉၵူၼ်းမိူင်းႁဝ်းၶႃႈ မႃးတွတ်ႈၶႅပ်းၵၢင်ၸႂ်ၵၼ် တေႃႇထိုင် 4 မူင်းႁူဝ်ၶမ်ႈယူႇၶႃႈ” – ဝႃႈၼႆ။
ၼႂ်းဢိူင်ႇၼွင်လႅင်ၼႆႉ ၵူၼ်းမိူင်းမီးသုၼ်ႇတွတ်ႈၶႅပ်းၵၢင်ၸႂ် တင်းမူတ်းမီး ႁူဝ်ၵူၼ်း 5 ႁဵင်ပၢႆ ႁူင်းတွတ်ႈၶႅပ်းၵၢင်ၸႂ် မီး 4 ႁူင်း။ ၵူၼ်းမႃးပၼ်ၶႅပ်းၵၢင်ၸႂ် လူင်ႈၼႃႈသမ်ႉ မီး 300 ပၢႆ ၼႆယဝ်ႉ။
လိူဝ်ၼၼ်ႉ ၸွမ်းၼင်ႇ ပိူင်ပၢႆးယူႇလီ တမ်းဝၢင်းဝႆႉၼၼ်ႉၵေႃႈ ဢွၼ်ၵၼ်တိုဝ်းၵမ် ႁဵတ်းၸွမ်းၵၼ်ယူႇ ဝႃႈၼႆ။
သင်ဝႃႈ ၵူၼ်းပိုၼ်ႉတီႈ ဢမ်ႇပႃးၸိုဝ်ႈ တႃႇတေတွတ်ႈၶႅပ်းၵၢင်ၸႂ် သမ်ႉမီးမၢႆၾၢင်ယူႇၼႆၸိုင် ႁႂ်ႈႁွင်ႉၶိင်းၵၢင်ႉသေ ၵမ်ႉ ထႅမ်ပၼ်သေ တွတ်ႈၶႅပ်းၵၢင်ၸႂ်လႆႈယူႇ ၸၢႆးဢွင်ႇၶမ်း လၢတ်ႈၼႄၼင်ႇၼႆ။
