ပၢင်လိူၵ်ႈတင်ႈ တီႈဢိူင်ႇၵၢတ်ႇတဝ်ႇ ၸႄႈဝဵင်းၵဵင်းတုင်ၼၼ်ႉ တတ်းမၵ်းၶၢဝ်းယၢမ်း ၵူၼ်းဝၢၼ်ႈ တွတ်ႈၶႅပ်း ၼိုင်ႈဝၢၼ်ႈလႂ် ၼိုင်ႈၸူဝ်ႈမူင်း၊ ပိူဝ်ႈတႃႇ ႁႂ်ႈၵူၼ်းဝၢၼ်ႈ လႆႈႁဵတ်းၵိၼ်ႁႃလဵင်ႉတွင်ႉပႃး ၼႆယဝ်ႉ။
ဝၼ်းတီႈ 08/11/2020 ဝၼ်းပၢင်တွတ်ႈၶႅပ်းၵၢင်ၸႂ် ၸိုင်ႈမိူင်းပတ်းပိုၼ်ႉ မိူဝ်ႈၼႆႉ တီႈဢိူင်ႇၵၢတ်ႇတဝ်ႇ ၸႄႈဝဵင်းၵဵင်းတုင် ၸိုင်ႈတႆးပွတ်းဢွၵ်ႇၶူင်း ၼၼ်ႉ ယူႇတီႈၶွမ်ႊမသျိၼ်ႊၵၢၼ်လိူၵ်ႈတင်ႈမိူင်းႁူမ်ႈတုမ်၊ ၽူႈၵွၼ်းဢိူင်ႇ ၵွၼ်းဝၢၼ်ႈၶဝ် တတ်းမၵ်း ပၼ်ၶၢဝ်းယၢမ်းၵူၼ်းဝၢၼ်ႈ ၵႂႃႇတွတ်ႈၶႅပ်း ၼိုင်ႈဝၢၼ်ႈလႂ် ၶၢဝ်းတၢင်းၼိုင်ႈၸူဝ်ႈမူင်း၊ တင်ႈတႄႇၵၢင်ၼႂ် 6 မူင်းထိုင်တၢမ်းၶမ်ႈ 4 မူင်း ၼႆယဝ်ႉ။
ၵူၼ်းၼႂ်းပိုၼ်ႉတီႈ ဢိူင်ႇၵၢတ်ႇတဝ်ႇ ၵေႃႉၼိုင်ႈတႄႉလၢတ်ႈဝႃႈ-“ၵၢၼ်မၵ်းမၼ်ႈပၼ်ၶၢဝ်းယၢမ်း တွတ်ႈၶႅပ်းၵၢင်ၸႂ်ၸိူင်ႉၼႆၼႆႉ ႁဝ်းၶႃႈၵေႃႈမႆႈၸႂ်ယူႇ၊ ၵွပ်ႈပိူဝ်ႈဝႃႈ ၵူၼ်းဝၢၼ်ႈၼိုင်ႈဝၢၼ်ႈၼႆႉ လႆႈၶၢဝ်းယၢမ်းၼိုင်ႈၸူဝ်ႈမူင်းၵူၺ်း၊ ၵူၼ်းဝၢၼ်ႈမၢင်ဝၢၼ်ႈ သမ်ႉမီးႁူဝ်ပၢၵ်ႇမၼ်းလူး ၶၢဝ်းယၢမ်း ၼိုင်ႈၸူဝ်ႈမူင်းၼႆႉ ၸွင်ႇတေပေႃးႁႃႉ၊ ပေႃးပူၼ်ႉၶၢဝ်းယၢမ်းမၼ်းၵႂႃႇလူး ၸွင်ႇတေလႆႈတွတ်ႈႁိုဝ်၊ ဢမ်ႇၼၼ် ၵူဝ်လႆႈႁၢမ်းသုၼ်ႇတွတ်ႈၶႅပ်းၵႂႃႇ” ဝႃႈၼႆ။
ၵၢၼ်တတ်းမၵ်းၶၢဝ်းယၢမ်း တွတ်ႈၶႅပ်း ၼႂ်းဢိူင်ႇၵၢတ်ႇတဝ်ႇၼႆႉ မိူၼ်ၼင်ႇ ဝၢၼ်ႈပႃႇၸၢမ် ယၢမ်း 6 မူင်းၵၢင်ၼႂ်ထိုင် 7 မူင်း၊ ဝၢၼ်ႈၵၢတ်ႇတဝ်ႇ-ၵၢင်ၼႃး ၶၢဝ်းယၢမ်း 7 မူင်းထိုင် 8 မူင်း၊ ဝၢၼ်ႈၵၢတ်ႇတဝ်ႇ-ၵျွင်း ၶၢဝ်းယၢမ်း 8 မူင်းထိုင် 9 မူင်း ၸိူဝ်းၼႆႉ။
ၸၢႆးသႅင် ၽူႈၵွၼ်းဢိူင်ႇၵၢတ်ႇတဝ်ႇ ၸႄႈဝဵင်းၵဵင်းတုင် လၢတ်ႈတီႈၽူႈတွႆႇႁွၵ်ႈဝႃႈ- “ႁဝ်းၶႃႈတတ်းမၵ်း တမ်းၶၢဝ်းယၢမ်းပၼ် ပီႈၼွင်ႉႁဝ်းၶႃႈမႃးသႂ်ႇၶႅပ်းၵၢင်ၸႂ်ၼႆႉ ႁဝ်းၶႃႈပၼ်တိုဝ်ႉတၢင်းၶၢဝ်းယၢမ်း ႁႂ်ႈၵူၼ်းဝၢၼ်ႈႁဝ်းၶႃႈ လႆႈႁဵတ်းၵိၼ်ၵၢၼ်လဵင်ႉတွင်ႉပႃးၶႃႈဢေႃႈ။ မိူၼ်ၼင်ႇဝၢၼ်ႈႁဝ်းၶႃႈ တမ်းဝႆႉၶၢဝ်းယၢမ်း 3 မူင်းတၢမ်းၶမ်ႈ တေႃႇထိုင် 4 မူင်းၼႆႉ မိူဝ်ႈၵၢင်ၼႂ်ၸဝ်ႉ ၶဝ်ၶႂ်ႈၵႂႃႇႁဵတ်းၵၢၼ်ၵေႃႈလႆႈ။ တူၵ်းပၢႆးၸဝ်ႉ ၶႂ်ႈတွတ်ႈပၢႆးၸဝ်ႉသေ ပၢႆးလႃႈမႃး ၶႂ်ႈႁဵတ်းၵၢၼ်ၵေႃႈလႆႈ။ တူၵ်းပၢႆးၸဝ်ႉသေ ပၢႆးၸဝ်ႈၼၼ်ႉ ဢမ်ႇတၼ်းၼႆၵေႃႈ မႃးတွတ်ႈပၢႆးလႃႈၵေႃႈလႆႈ။ ၼႂ်းၶၢဝ်းယၢမ်းတွတ်ႈၶႅပ်း 6 မူင်းၵၢင်ၼႂ်တေႃႇထိုင် 4 မူင်းႁူဝ်ၶမ်ႈၼၼ်ႉ ၶႂ်ႈမႃးတွတ်ႈယၢမ်းလႂ်ၵေႃႈလႆႈၶႃႈ” ဝႃႈၼႆ။
ၼႂ်းဢိူင်ႇၵၢတ်ႇတဝ်ႇၼႆႉ ႁူဝ်ၵူၼ်းမီးသုၼ်ႇတွတ်ႈၶႅပ်းတင်းမူတ်းမီး 4 ႁဵင်ပၢႆ၊ ႁူင်းတွတ်ႈၶႅပ်းမီး 3 ႁူင်း ၼႆယဝ်ႉ။
ပၢင်တွတ်ႈၶႅပ်းၵၢင်ၸႂ် တီႈၼႂ်းဢိူင်ႇၵၢတ်ႇတဝ်ႇ ၸႄႈဝဵင်းၵဵင်းတုင်ၼႆႉ တိုဝ်းၵမ်ႁဵတ်းၸွမ်း လၢႆးၵႅတ်ႇၵင်ႈတၢင်းပဵၼ်ၸိူဝ်ႉမႅင်းၶူဝ်ႊဝိတ်ႉ 19 ယူႇ လႆႈႁူႉၼင်ႇၼႆ။