ၵူၼ်းမိူင်းၸိူဝ်းၵႂႃႇတွတ်ႈၶႅပ်းၵၢင်ၸႂ်ၶွၼ်ႈၵိုၼ်းဢိူမ်ႈၵၼ် တီႈႁူင်းတွတ်ႈၶႅပ်းၵၢင်ၸႂ် တီႈၼိုင်ႈ ၸႄႈဝဵင်းၵူတ်ႉၶၢႆ ဢမ်ႇတၼ်းႁဵတ်းၸွမ်းပိူင်ပၢႆးယူႇလီ တမ်းဝၢင်းဝႆႉ လႄႈ ၵူၼ်းပိုၼ်ႉတီႈမႆႈၸႂ်။
မိူဝ်ႈၼႆႉ ဝၼ်းတီႈ 8/11/2020 ယၢမ်းၵၢင်ၸႂ် တီႈႁူင်းတွတ်ႈၶႅပ်း 38 လၵ်း မၢၼ်ႈပဵင်း ၸႄႈဝဵင်းၵူတ်ႉၶၢႆ ၸိုင်ႈတႆးပွတ်းႁွင်ႇ ၵူၼ်းမိူင်းၸိူဝ်းၵႂႃႇတွတ်ႈၶႅပ်းၵၢင်ၸႂ် တိတ်းၸပ်းၵၼ်ႁႅင်း၊ ဢမ်ႇဝဵၼ်ႉႁၢင်ႇယၢၼ်ၵၼ် ၸွမ်းၼင်ႇပၢႆးယူႇလီပိုၼ်ၽၢဝ်ႇဝႆႉ ၼိုင်ႈၵေႃႉ 6 ပေႇ/ ထတ်း ။ လွင်ႈၼႆႉ ၵူၼ်းမိူင်းပဵၼ်ဢၼ်မႆႈၸႂ် ၵူဝ်တိတ်းၸပ်းၸိူဝ်ႉမႅင်းတၢင်းပဵၼ်ၶူဝ်ႊဝိတ်ႉ 19 ၼႆယဝ်ႉ။
ၸၢႆးပျေႉၽဵဝ်းၵျေႃႇ ၼေႃႇၽူႈတႅၼ်းသၽႃးၵူၼ်းမိူင်း ၸႄႈဝဵင်းၵူတ်ႉၶၢႆ လၢတ်ႈဝႃႈ – “မၵ်းမၼ်ႈဝႆႉ ၵူၼ်းၼိုင်ႈၵေႃႉ တေ လႆႈယူႇယၢၼ်ၵႆၵၼ် 3 ပေႇ/ ထတ်း ဢမ်ႇၼၼ် 6 ပေႇ/ ထတ်း ၶႃႈဢေႃႈ။ ၵူၺ်းၵႃႈ ၵူၼ်းဢၼ်ၵႂႃႇတွတ်ႈၶႅပ်းၼၼ်ႉသမ်ႉ ဢမ်ႇ ယၢၼ်ၵႆၵၼ် ၊ တိတ်းၸပ်းၵၼ်ဝႆႉမူတ်းၶႃႈ။ မႆႈၸႂ်ၵူဝ် တိတ်းၸပ်းတၢင်းပဵၼ်ၶူဝ်ႊဝိတ်ႉ 19 ၵူၺ်းၶႃႈဢေႃႈ” – ဝႃႈၼႆ။
ၵူၺ်းၵႃႈ ၽႃႈတူမ်းသူပ်းတင်း ၼမ်ႉယႃႈလၢင်းမိုဝ်းတႄႉ ၸႅၵ်ႇပၼ် လၢင်ႉမိုဝ်းၵၼ်ယူႇ ဝႃႈၼႆ။
ၸွမ်းၼင်ႇ ႁွင်ႈၵၢၼ်ပၢႆးယူႇလီ မိူင်းႁူမ်ႈတုမ် ပိုၼ်ၽၢဝ်ႇဢွၵ်ႇဝႆႉၼၼ်ႉ ႁူင်းတွတ်ႈ ၶႅပ်းၵၢင်ၸႂ် ၵူႈတီႈ တေလႆႈတမ်းဝၢင်း ဝႆႉ ၵူၼ်းၼိုင်ႈၵေႃႉ တေလႆႈယူႇယၢၼ်ၵႆ 6 ထတ်း၊ ယဝ်ႉၵေႃႈ သႂ်ႇၽႃႈတူမ်းသူပ်းၵၼ် ၵူႈၵေႃႉ၊ လိူဝ်ၼၼ်ႉ တေလႆႈလၢင်ႉ မိုဝ်းၵၼ်ၸဵမ်ၸိူဝ်းၼႆႉ တွၼ်ႈတႃႇၵႅတ်ႇၶႄႁႄႉၵင်ႈတၢင်းပဵၼ်ၶူဝ်ႊဝိတ်ႉ 19 ပေႃးတေဢမ်ႇတိတ်းၸပ်းတၢင်းပဵၼ် ၼႆယဝ်ႉ။