မိူဝ်ႈၼႆႉ ဝၼ်းတီႈ 18/6/2021 ယၢမ်းၵၢင်ဝၼ်း မွၵ်ႈ 12 မူင်း ၵႃးလူင် 22 လေႃႉ 2 လမ်း ထုၵ်ႇၾႆးၽဝ် တီႈလွႆသိဝ်ႉၶိၼ်းတႃႇ ၼႂ်းၵႄႈၵူတ်ႉၶၢႆ – ၼမ်ႉၽၵ်းၵႃ ၸႄႈဝဵင်း ၵူတ်ႉၶၢႆ ၸႄႈတွၼ်ႈမူႇၸေႊ ၸိုင်ႈတႆး ပွတ်းႁွင်ႇ ဝႃႈၼႆ။
ၸဝ်ႈၵႃး ဢၼ်လႅၼ်ႈသဵၼ်ႈတၢင်းၼၼ်ႉ ဢၼ်ႁၼ်တႂ်ႈတႃ လၢတ်ႈတီႈၽူႈတွႆႇႁွၵ်ႈဝႃႈ– “ၵႃးလူင်ဢၼ် ၵိုတ်းဝႆႉတီႈၸိၵ်းလွႆ သိဝ်ႉၶိၼ်းတႃႇမီး 3 လမ်း ပဵၼ်ၵႃးလူင် 22 လေႃႉ။ တႃႇလမ်းၼိုင်ႈၾႆးမႆႈႁၢဝ်ႈႁႅင်း၊ ထႅင်ႈလမ်းၼိုင်ႈမႆႈတီႈ ႁူဝ်ၵႃး ဢိတ်းၼိုင်ႈသေ မွတ်ႇၵႂႃႇယဝ်ႉ။ ထႅင်ႈလမ်းၼိုင်ႈမၢၼ်ႇၵႃးတၢင်းၼႃႈၵွႆၵႂႃႇ”- ဝႃႈၼႆ။
ၵႃးလူင် 22 လေႃႉၼႆႉ လုၵ်ႉတၢင်းမူႇၸေႊသေ လူင်းမႃး ၵူၺ်းၵႃႈ ယွၼ်ႉသင်လႄႈ ထုၵ်ႇၾႆးၽဝ် ယဝ်ႉၵေႃႈ ၸဝ်ႈၵႃး ၵူၼ်းၸွမ်းၵႃး ၸိူဝ်းၼၼ်ႉၵေႃႈ ဢမ်ႇႁၼ် တူဝ်တၢႆ တူဝ်လိပ်းသင်သေၵေႃႉ ဝႃႈၼႆ။
“ႁဝ်းၶႃႈ လႆႈႁၼ်တႄႉ ပဵၼ်ၸုမ်းၶၢင်ၶဝ် တီႉၵႂႃႇၶႃႈဢေႃႈ ၸဝ်ႈၵႃးၸိူဝ်းၼၼ်ႉ။ တေလႅပ်ႈပဵၼ်လွင်ႈၵဵပ်းၶွၼ်ႇႁိုဝ် ဢမ်ႇ ႁူႉ။ လွင်ႈတူဝ်တၢႆ ၵူၼ်းမၢတ်ႇၸဵပ်းႁိမ်းႁွမ်း ၸိူဝ်းၼၼ်ႉတႄႉ ဢမ်ႇမီးသေၵေႃႉၶႃႈ”- ၸဝ်ႈၵႃး သိုပ်ႇလၢတ်ႈၼႄၼင်ႇၼႆ။
ၼႂ်းၵႄႈ ၼမ်ႉၽၵ်းၵႃ တင်း ၵူတ်ႉၶၢႆ တီႈလွႆသူႉၶိၼ်းတႃႇ ၸိူဝ်းၼႆႉ ၵႆႉပဵၼ်ပၢင်တိုၵ်းၵၼ် ၶွင်ႇသီႇသိုၵ်းမၢၼ်ႈ မိူၵ်ႈမႂ်ႈ တင်း သိုၵ်းၶၢင် ႁဵတ်းႁႂ်ႈရူတ်ႉၵႃး ၶိုၼ်ႈလူင်း တၢင်းသၢႆၼၼ်ႉ လႆႈၵိုတ်းယင်ႉၵၼ် ပဵၼ်လၢႆၸူဝ်ႈမူင်း။
မိူဝ်ႈဝၼ်းတီႈ 18 လိူၼ် May ၶၢဝ်းယၢမ်းၵၢင်ၼႂ် မွၵ်ႈ 7 မူင်း ၶွင်ႇသီႇသိုၵ်းမၢၼ်ႈ တင်း သိုၵ်းၶၢင် KIA ပဵၼ်ပၢင်တိုၵ်း ၵၼ်ႁၢဝ်ႈႁႅင်း တီႈႁိမ်းဝၢၼ်ႈၼမ်ႉပႃၶီး ၸႄႈဝဵင်းၵူတ်ႉၶၢႆ ၸိုင်ႈတႆးပွတ်းႁွင်ႇ လူတ်ႉတၢင်ႇၼမ်ႉမၼ်း လမ်းၼိုင်ႈ ၺႃး ယိုဝ်းလႄႈ ၾႆးမႆႈ လူႉၵွႆမူတ်း။ မိူဝ်ႈဝႃး ဝၼ်းတီႈ 17 ယၢမ်းၵၢင်ၶမ်ႈၼၼ်ႉၵေႃႈ ၸုမ်းယိပ်းၵွင်ႈၵၢင်ႇ ယိုဝ်းၵွင်ႈလူင် သႂ်ႇၵႃးတၢင်ႇၼမ်ႉမၼ်း 6 လမ်း ၼႂ်းၵႄႈၵူတ်ႉၶၢႆ – သႅၼ်ဝီ ၼင်ႇၵဝ်ႇ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ