ၵူၼ်းမိူင်းႁိမ်း 50 ၵေႃႉ တီႈတႃႈၶီႈလဵၵ်း လႆႈတွတ်ႈၶႅပ်းၵၢင်ၸႂ်လူင်ႈၼႃႈၽိတ်း ယွၼ်ႉၶွမ်ႊမသျိၼ်ႊ ၸႅၵ်ႇၶႅပ်းမႄး ၽိတ်းသေ ၶိုၼ်းလႆႈတွတ်ႈမႂ်ႇထႅင်ႈ ၵမ်းၼိုင်ႈ ဝႃႈၼႆ။
မိူဝ်ႈၼႆႉ ဝၼ်းတီႈ 7/11/2020 ယၢမ်းၵၢင်ဝၼ်း မွၵ်ႈ 12:10 မူင်းပၢႆၼၼ်ႉ တီႈႁူင်း တွတ်ႈၶႅပ်း ပွၵ်ႉပႃႇသၵ်း ၸႄႈဝဵင်းတႃႈ ၶီႈလဵၵ်း ၸိုင်ႈတႆးပွတ်းဢွၵ်ႇၶူင်း တႃႇႁူဝ်ၵူၼ်း 47 ၵေႃႉ ဢၼ်မီးၼႂ်းၶဵတ်ႇလိူၵ်ႈတင်ႈမၢႆ 1 ၼၼ်ႉ လႆႈႁပ်ႉၶႅပ်းမႄးၶွင်ၶဵတ်ႇလိူၵ်ႈတင်ႈမၢႆ 2 လႄႈ လႆႈတွၵ်ႇတွတ်ႈၽိတ်းပိူင်ႈ ၊ ထိုင်တီႈလႆႈႁွင်ႉႁႃ ၵူၼ်းတွတ်ႈၶႅပ်းမႄးၼၼ်ႉမႃးၶိုၼ်းတွၵ်ႇမႂ်ႇ။
ၸၢႆးၼုမ်ႇတုၺ်ႈ ၼေႃႇၽူႈတႅၼ်းသၽႃးၵူၼ်းမိူင်း ၸႄႈဝဵင်းတႃႈၶီႈလဵၵ်း လၢတ်ႈဝႃႈ – “ယူႇတီႈၶွမ်ႊမသျိၼ်ႊဢဝ်ၶႅပ်းၵၢင် ၸႂ် သူင်ႇၸူးတီႈႁူင်းတွတ်ႈၶႅပ်းၵၢင်ၸႂ်ပွၵ်ႉပႃႇသၵ်းၼၼ်ႉ ဢဝ်ဝႂ်မၼ်းၽိတ်းၶႃႈဢေႃႈ။ တီႈတႄႉမၼ်း တီႈဝႂ်ၼၼ်ႉ လူဝ်ႇ ပဵၼ်ဝႂ်ၶဵတ်ႇလိူၵ်ႈတင်ႈမၢႆ 1 ၵူၺ်း။ ၶဝ်သမ်ႉဢဝ်ဝႂ်ၶဵတ်ႇလိူၵ်ႈတင်ႈမၢႆ 2 သူင်ႇၵႂႃႇ။ ၽိူဝ်ႇၵူၼ်းမိူင်း တွတ်ႈယဝ်ႉ ၸင်ႇႁူႉဝႃႈ ပဵၼ်ဝႂ်ၶဵတ်ႇလိူၵ်ႈတင်ႈမၢႆ 2 ၼႆသေ လႆႈႁွင်ႉၵူၼ်းမိူင်းဢၼ်တွတ်ႈယဝ်ႉၵႂႃႇၼၼ်ႉ မႃးတွတ်ႈၶိုၼ်းမႂ်ႇမႂ်ႇမူတ်းၶႃႈဢေႃႈ”- ဝႃႈၼႆ။
ဢိင်ၼိူဝ်လွင်ႈၼႆႉ ယူႇတီႈၶွမ်ႊမသျိၼ်ႊၵၢၼ်လိူၵ်ႈတင်ႈ တင်း ၽူႈတႅၼ်းပႃႇတီႇ ႁပ်ႉႁူႉလွင်ႈပိူင်ပဵၼ်ၼႆႉသေ သွင်ၾၢႆႇ လႆႈဢုပ်ႇဢူဝ်းငူပ်ႉငီႉ တူၵ်းလူင်းလႆႈၸႂ်ၵၼ်ၵႂႃႇလီငၢမ်းယူႇ ဝႃႈၼႆ။
ပပ်ႉတွတ်ႈၶႅပ်းၵၢင်ၸႂ်ၼၼ်ႉ ၼိုင်ႈပပ်ႉလႂ် တင်းမူတ်းမီးဝႂ်တွတ်ႈၶႅပ်းၵၢင်ၸႂ် 50 ဝႂ် ၼႆယဝ်ႉ။
ၼႂ်းၸႄႈဝဵင်းတႃႈၶီႈလဵၵ်းၼႆႉ ႁူင်းတွတ်ႈၶႅပ်းၵၢင်ၸႂ် တင်းမူတ်းမီး 70 ႁူင်း။ ပႃႇတီႇဢၼ်ၶဝ်ႈၶဵင်ႇသမ်ႉ ၼေႃႇၽူႈတႅၼ်း သၽႃးၵူၼ်းမိူင်း တင်းမူတ်းမီး 7 ပႃႇတီႇ၊ ၶဵတ်ႇသဵင်မၢႆ 1 တင်းမူတ်းမီး 6 ပႃႇတီႇ ၼႂ်းၼၼ်ႉ ပႃႇသုၼ်ႇတူဝ်ၵေႃႉ 1၊ ၶဵတ်ႇမၢႆ 2 မီး 6 ပႃႇတီႇ၊ ၼေႃႇၽူႈတႅၼ်းသၽႃးၸိူဝ်ႉၸၢတ်ႈ 7 ပႃႇတီႇ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ