ၼႂ်းမိူင်းတႆး 49 ၸႄႈဝဵင်း ဢၼ်ၸတ်းႁဵတ်းပၢင်လိူၵ်ႈတင်ႈၼႆႉ ၵူၼ်းထဝ်ႈ ဢႃယု 60 ၶိုၼ်ႈၼိူဝ် မီးသုၼ်ႇတွတ်ႈၶႅပ်း ၵၢင်ၸႂ်လူင်ႈၼႃႈ ႁိမ်း 4 သႅၼ်ၵေႃႉ လႆႈႁပ်ႉႁူႉ တီႈၶွမ်ႊမသျိၼ်ႊၸႄႈမိူင်းတႆး ၼင်ႇၼႆ။
တႃႇပၢင်လိူၵ်ႈတင်ႈ ၵူႈလွင်ႈလွင်ႈ ပတ်းပိုၼ်ႉ မိူင်းႁူမ်ႈတုမ် ပီ 2020 ၼႆႉ ၵူၼ်းထဝ်ႈ ဢႃယု 60 ၶိုၼ်ႈၼိူဝ် ၼႂ်းမိူင်းတႆး 3 ပွတ်းတွၼ်ႈ ပွတ်းဢွၵ်ႇ၊ ပွတ်းၸၢၼ်းလႄႈ ပွတ်းႁွင်ႇ ဝၼ်းတီႈ 29/10/2020 တေႃႇထိုင် 5/11/2020 ၼႆႉ မီးသုၼ်ႇတွတ်ႈၶႅပ်းၵၢင်ၸႂ်လူင်ႈၼႃႈ ႁူဝ်ၵူၼ်းတင်းမူတ်းမီး 396,000 ၵေႃႉ ၼႆယဝ်ႉ။
ဢူးထိၼ်ႇၵျေႃႇ ႁူဝ်ပဝ်ႈၶွမ်ႊမသျိၼ်ႊၵိင်ႇၽႄၵေႃၵမ်ၵၢၼ်လိူၵ်ႈတင်ႈ ၸႄႈမိူင်းတႆး လၢတ်ႈဝႃႈ -“တႄႇဢဝ်ဝၼ်းတီႈ 29/10/2020 မႃးတေႃႇထိုင်ဝၼ်းတီႈ 2/11/2020 ၼႆႉ ၵူၼ်းထဝ်ႈဢႃယု 60 ပီၶိုၼ်ႈၼိူဝ် ဢၼ်မႃးတွတ်ႈၶႅပ်းၵၢင်ၸႂ် မီး 74,000 ပၢႆ”- ဝႃႈၼႆ။
ပၢင်လိူၵ်ႈတင်ႈ ပီ 2020 ၼႆႉ ၶႃႈႁၢပ်ႇၵၢၼ်လူင်ပွင်ၸိုင်ႈမၢၼ်ႈ ဢၼ်တွတ်ႈၶႅပ်းၵၢင်ၸႂ် ၼႂ်းၸႄႈမိူင်းတႆး တင်းမူတ်းမီး 55,000 ၵေႃႉ၊ ၵူၼ်းတုၵ်ႉၶိတမီး 5000 ပၢႆ ။
ပၢင်လိူၵ်ႈတင်ႈ ၵူႈလွင်ႈလွင်ႈ ပတ်းပိုၼ်ႉ မိူင်းႁူမ်ႈတုမ်ၼႆႉ တေၸတ်းႁဵတ်းၼႂ်းဝၼ်းတီႈ 8/11/2020 လိူၼ် 11 လွင်ႈ 8 ၶမ်ႈ ဝၼ်းတိတ်ႉ တႄႇဢဝ် ၵၢင်ၼႂ် 6 မူင်း ထိုင် 4 မူင်း ႁူဝ်ၶမ်ႈ ဝႃႈၼႆ။
