ရူတ်ႉၵႃးတပ်ႉသိုၵ်းလူင်ပွင်ၸိုင်ႈ တၢင်ႇဢဵၼ်ႁႅင်းသိုၵ်း လႄႈ တၢင်းၵိၼ်ယႅမ်ႉ တဵမ်လမ်းရူတ်ႉသေ လတ်းဝဵင်းမူႇၸေႊ ၵႂႃႇဝၢင်းၶူဝ်းၶွင် ၾင်ႇၸႄႈလၢၼ်ႉ။
ဝၼ်းတီႈ 3/11/2020 ဝၼ်းမိူဝ်ႈၼႆႉ ရူတ်ႉၵႃးသိုၵ်းမၢၼ်ႈ လတ်းဝဵင်းမူႇၸေႊ မွၵ်ႈ 20 လမ်း ၊ ၵူၼ်းမိူင်းမူႇၸေႊတူၵ်းၸႂ် ။
ၵူၼ်းမူႇၸေႊ ၽူႈၸၢႆး ဢႃယု မွၵ်ႈ 40 ၵေႃႉၼိုင်ႈလၢတ်ႈဝႃႈ – လတ်းၵၢင်ဝဵင်းမွၵ်ႈ 10 လမ်း ။ သမ်ႉလဵပ်ႈဝဵင်းၵႂႃႇထႅင်ႈ 10 လမ်း။ၵႂႃႇဝၢင်းၶူဝ်းၶွင် တီႈၸေႊလၢၼ်ႉသေပွၵ်ႈမႃးၶိုၼ်း။- ဝႃႈၼႆ။
ၽွင်းၶၢဝ်းၸမ်ပၢင်လိူၵ်ႈတင်ႈပၼ်းပိုၼ်ႉၸိုင်ႈမိူင်း ၵိုတ်း 4 ဝၼ်းၵူၺ်းၼၼ်ႉ သိုၵ်းလူင်ပွင်ၸိုင်ႈမၢၼ်ႈ ဢဝ်ႁႅင်းသိုၵ်းလတ်းၵၢင်ဝဵင်းလႄႈ ႁဵတ်းႁႂ်ႈၵူၼ်းမိူင်းမူႇၸေႊ ၵႂင်ၸႂ်ၸွမ်း။
ၵူၼ်းသိုၵ်းၼိူဝ်ၵႃး တၢင်ႇမႃးလၢႆၵေႃႉဢမ်ႇလႆႈႁူႉၸွမ်းသေတႃႉ ပဵၼ်ၽွင်းၶၢဝ်း ၵဵပ်းၵၢင်ၸႂ်လူင်ႈၼႃႈ ယူႇလႄႈ ၵူၼ်းမိူင်းတူၵ်းၸႂ်ၵူဝ်မီးပၢင်တိုၵ်းသိုၵ်းသိူဝ်ထႅင်ႈ။
တၢင်းပွတ်းတွၼ်ႈ ၸႄႈဝဵင်းတႃႈမိူင်းငႅၼ်း ၵေႃႈ ၵူၼ်းထဝ်ႈၽူႈၵႂႃႇပၼ်ၶႅပ်းၵၢင်ၸႂ်လူင်ႈၼႃႈၶဝ် ၺႃးၵူၼ်းၸုမ်းၼိုင်ႈ တဵၵ်းၸႂ်ႉတွတ်ႈပၼ်ၶႅပ်းၵၢင်ၸႂ် ပႃႇတီႇ တၢင်ႇဢၼ်ယူႇ ဝႃႈၼႆ။
