ထဝ်ႈယိင်းၵူၼ်းမိူင်းၵိုင် ၶွင်ႉၺႃးၶႅမ်း ၶႂၢၵ်ႇ ၼၢင်တၢင်းဢၼ်ဝၢင်းဝႆႉၼႃႈၵဵၵ်ႉသိုၵ်းမၢၼ်ႈ ၼၼ်ႉသေတူၵ်းရူတ်ႉတၢႆ

ထဝ်ႈယိင်းၵူၼ်းဝၢၼ်ႈၼႂ်းၸေႈဝဵင်းမိူင်းၵိုင် ၵေႃႉၼိုင်ႈ ၵႂႃႇၸွၼ်ႉသူၼ်သေၽွင်းပွၵ်ႈၶိုၼ်းႁိူၼ်းၼၼ်ႉ ၶွင်ႉၺႃးႁူဝ်ႉၶႂၢၵ်ႇၼၢမ်ဢၼ် သိုၵ်းလူင်ပွင်ၸိုင်ႈမၢၼ်ႈ ၼၢင်ဝႆႉၵၢင်တၢင်း ၼႃႈၵဵၵ်ႉ /လၢၼ်ႇ ပၢင်ႇၵေႇတူႉ ၸႄႈဝဵင်းမိူင်းၵိုင် ၼၼ်ႉလႄႈ သဵၼ်တူၵ်းရူတ်ႉ လူႉတၢႆ။

ဝၼ်းတီႈ 28/10/2020 ယၢမ်းၵၢင်ၼႂ် 10 မူင်း ပႃႈၸၢင်းမုင်ႇ ဢႃယု 64 ပီ မႅၵ်ႇၶေႃသဵမ် ၶီႇရူတ်ႉၶိူင်ႈ လုၵ်ႉ တီႈၵျွင်းၼႃးၼိူဝ် တေပွၵ်ႈႁိူၼ်း ဝၢၼ်ႈပၢင်ႇၸၢမ်ၶမ်း၊ ၽွင်းထိုင်တီႈလၢၼ်ႇ/ ၵဵတ်ႉတပ်ႉသိုၵ်းလူင်ပွင်ၸိုင်ႈ မၢၼ်ႈ တီႈတၢင်းၽေ ပၢင်ႇၵေႇတူႉ ၸႄႈဝဵင်းမိူင်းၵိုင်ၼၼ်ႉ  ၶေႃသဵမ်မၼ်းၼၢင်း ၵွင်ႉၺႃးမႆႉၼၢမ်ဢၼ်သိုၵ်းမၢၼ်ႈ ဢဝ်ႁႄႉဝႆႉ ၵၢင်တၢင်းၼၼ်ႉလႄႈ တူဝ်မၼ်းၼၢင်းသဵၼ်တူၵ်းရူတ်ႉၶိူင်ႈ ႁူဝ်ၽတ်ႉၺႃးပိုၼ်ႉလိၼ်လႄႈထိုင်တီႈလႆႈႁၢမ်သူင်ႇႁူင်းယႃ။ ၽွင်းႁွတ်ႈထိုင်ႁူင်းယႃၵေႃႈ လူႉတၢႆၵႂႃႇပႅတ်ႈ ။  

ၵူၼ်းဢိူင်ႇပၢင်ႇၵေႇတူႉ ၵေႃႉၼိုင်ႈလၢတ်ႈဝႃႈ – “ လၢၼ်ႇမၢၼ်ႈ တီႈပၢင်ႇၵေႇတူႉၼၼ်ႉ ၶဝ်ဢဝ်ၶႅမ်းလဵၵ်းၶႂၢၵ်ႇၼၼ်ႉၼၢင်ႁႄႉသဵၼ်ႈတၢင်းဝႆႉ ။ သဵၼ်ႈတၢင်းၵႂႃႇမႃး ၵႅပ်ႈၵႂႃႇႁႅင်းၼႃႇလႄႈ ႁဵတ်းႁႂ်ႈၵူၼ်းမိူင်း ၶီႇရူတ်ႉၶိူင်ႈ ရူတ်ႉၵႃးၵႂႃႇမႃး လတ်းၽၢၼ်ႇဢမ်ႇလွတ်ႈလႅဝ်း။ ၵႆႉၵႆႉၶိတ်ႇၺႃးမႆႉၼၢမ်ၶဝ်ၼၼ်ႉ မၢင်ၵေႃႉ ၶႅၼ်လွၵ်ႈ ၶႃလွၵ်ႈၸိူဝ်းၼႆႉ မီးတင်းၼမ်ၶႃႈယဝ်ႉ။ ပွၵ်ႈၼႆႉ ႁၢဝ်ႈႁႅင်းသုတ်း ထိုင်တီႈၵူၼ်းဝၢၼ်ႈပေႃးလႆႈလူႉတၢႆ  ” – ဝႃႈၼႆ။

ၵဵဝ်ႇၵပ်းလွင်ႈၼႆႉ ၵူၼ်းမိူင်းထုင်ႉပၢင်ႇၵေႇတူႉ မိူင်းၵိုင် တုၵ်းယွၼ်းႁႂ်ႈသိုၵ်းမၢၼ်ႈ ၽဵဝ်ႈပႅတ်ႈႁူဝ်ႉၼၢမ်ဢၼ်ၶႂၢင်တၢင်းၵူၼ်းမိူင်းၵႂႃႇမႃးၼၼ်ႉမူတ်းမူတ်း ဝႃႈၼႆ။