သိုၵ်းလူင်ပွင်ၸိုင်ႈမၢၼ်ႈ  ဢၼ်ပၼ်သဵၼ်ႈၸိုဝ်ႈဝႆႉ တႃႇတွတ်ႈၶႅပ်းၵၢင်ၸႂ်  ၼႂ်းၸေႈဝဵင်းၼမ်ႉတူႈ မီး   1,000 ပၢႆ ပဵၼ်သိုၵ်းၼႃႈမႂ်ႇလွၼ်ႉလွၼ်ႉဝႃႈၼႆ။

သိုၵ်းလူင်ပွင်ၸိုင်ႈမၢၼ်ႈ ဢၼ်ၶဝ်ႈမႃးတူင်ႉၼိုင် ယူႇသဝ်း ပွတ်းၸေႈဝဵင်းၼမ်ႉတူႈ ပူၼ်ႉ 90 ဝၼ်းၼၼ်ႉ တႄႇဢဝ် ဝၼ်းတီႈ 17/9/2020 – 10/10/2020 ၼႆႉထႅမ်ၾွမ်ႊပိူင် 3 (က) သေ  ယိုၼ်ႈယွၼ်း တႃႇတွတ်ႈၶႅပ်းၵၢင်ၸႂ် ပၢင်လိူၵ်ႈတင်ႈတေမႃးၼႆႉ  တင်းမူတ်းမီး  1,033 ၵေႃႉ ၼႆ ယဝ်ႉ။

ၽူႈတူင်ႉၼိုင် ၼႂ်းပႃႇတီႇၵၢၼ်မိူင်း ၵေႃႉၼိုင်ႈ လၢတ်ႈဝႃႈ – “ပၢင်လိူၵ်ႈတင်ႈပီ 2020 ၼႆႉ သိုၵ်းမၢၼ်ႈ ဢၼ်လုၵ်ႉ တၢင်ႇတီႈ သေမႃးလူင်းသဵၼ်ႈၸိုဝ်ႈ တႃႇတေတွတ်ႈၶႅပ်းၵၢင်ၸႂ် ၼႂ်းၸႄႈဝဵင်းၼမ်ႉတူႈႁဝ်းၶႃႈၼႆႉ တင်းမူတ်းမီး 1,000 ပၢႆ ။ ပဵၼ် သိုၵ်းမၢၼ်ႈမႃးမႂ်ႇသေ ယူႇသဝ်းတဵမ် 90 ဝၼ်းလွၼ်ႉလွၼ်ႉ ပႆႇပႃးၵူၼ်းသိုၵ်းၵဝ်ႇ ။  လွင်ႈၼႆႉၵေႃႈ ပဵၼ်ဢၼ်ၶဵင်ႇတႃႉ တႃႇပႃႇတီႇၸၢဝ်းၶိူဝ်းၼႂ်းပိုၼ်ႉတီႈတႄႉတႄႉၶႃႈ ဢေႃႈ” – ဝႃႈၼႆ။

ၼႂ်းၸႄႈဝဵင်းၼမ်ႉတူႈၼႆႉ ၵူၼ်းမီးၸိူဝ်းမီးသုၼ်ႇတွတ်ႈၶႅပ်းၵၢင်ၸႂ် ၸဵမ် ၵူၼ်းမိူင်း၊ ၵူၼ်းသိုၵ်းလူင်ပွင်ၸိုင်ႈမၢၼ်ႈၵဝ်ႇ – မႂ်ႇ၊ မုင်ႉႁေႃႁိူၼ်းၵူၼ်းသိုၵ်းလူင်ပွင်ၸိုင်ႈမၢၼ်ႈ ၸိူဝ်းၼႆႉ တင်းမူတ်းမီး 33185 ၵေႃႉ။ ၼႂ်းၼၼ်ႉ ၶဵတ်ႇသဵင်မၢႆ 1 မီး  15,545 ၵေႃႉ၊ မၢႆ 2 မီး 17,640 ၵေႃႉ ၼႆႉယဝ်ႉ။

ၸၢႆးၸိင်ႇ ၽူႈတူင်ႉၼိုင်ၼႂ်းတူင်ႇဝူင်းၵူၼ်း ၼႂ်းၸႄႈဝဵင်းၼမ်ႉတူႈ လၢတ်ႈဝႃႈ “ၼႂ်းၶၢဝ်းတၢင်းသွင်သၢမ်ဝၼ်းၼႆႉ လႆႈႁၼ်ၵႃးသိုၵ်းမၢၼ်ႈ မွၵ်ႈ 20 လမ်းပၢႆၼႆႉ လုၵ်ႉတၢင်းသီႇပေႃႉသေ မုင်ႈၼႃးၸူး တၢင်းဝၢၼ်ႈၸၢမ်ၼႆႉၶႃႈဢေႃႈ။ လႆႈႁူႉဝႃႈ လုၵ်ႉတၢင်းပုင်ႇဝူဝ်းၵျွၵ်ႉမႄးမႃး။ ယွၼ်ႉၶဝ်သႂ်ႇသဵၼ်ႈမၢႆတႃႇတွတ်ႈၶႅပ်းၵၢင်ၸႂ် ဝႆႉတၢင်းၼမ်ႉတူႈၼႆႉလႄႈ ထၢင်ႇတႄႉ ပွၵ်ႈမႃးယူႇဝႆႉတႃႇတွတ်ႈၶႅပ်းၵၢင်ၸႂ်ၶႃႈဢေႃႈ” – ဝႃႈၼႆ ။

ၼႂ်းၸႄႈဝဵင်းၼမ်ႉတူႈၼႆႉ ပႃႇတီႇဢၼ်ၶဝ်ႈၶဵင်ႇၵၼ် တင်းမူတ်းမီး 7 ပႃႇတီႇ။ မိူၼ်ၼင်ႇ ပႃႇတီႇႁူဝ်သိူဝ်၊ သိူဝ်ၽိူၵ်ႇ၊ တဢၢင်း၊ ၶၢင်၊ မွၵ်ႇၼၢင်းသီႇ၊ ၼူၵ်ႉယုင်းလႄႈ သၢင်ႇသီႈ ၸိူဝ်းၼႆႉ။

ၼႂ်းမိူင်းတႆးပွတ်းႁွင်ႇၼႆႉ ၵူၼ်းသိုၵ်းလူင်ပွင်ၸိုင်ႈမၢၼ်ႈ ဢၼ်မႃးမႂ်ႇသေ မႃးယိုၼ်ႈယွၼ်းတႃႇတေ တွတ်ႈၶႅပ်းၵၢင်ၸႂ် ပီ 2020 ၼႆႉ တင်းမူတ်းမီးႁူဝ်ၵူၼ်း 10,080 ၵေႃႉ ယူႇတီႈၶွမ်ႊမသျိၼ်ႊၵၢၼ်လိူၵ်ႈတင်ႈ ၵိင်ႇၽႄ ၸိုင်ႈတႆးပွတ်းႁွင်ႇ လၢတ်ႈ – ႁွင်ႈၵၢၼ်ၶၢဝ်ႇ  RFA  ပိုၼ်ၽၢဝ်ႇဝႆႉၼင်ႇၼႆ။