Friday, March 29, 2024

ထႆး – မၢၼ်ႈ လူတ်းၵႃးတၢင်ႇၵုၼ်ႇ ၶဝ်ႈဢွၵ်ႇတေႃႉသူင်ႇ မႄႈသၢႆ – တႃႈၶီႈလဵၵ်း

Must read

ၽွင်းၶၢဝ်းတၢင်းပဵၼ်ၶူဝ်ႊဝိတ်ႉ 19 ၽႄႈလၢမ်းၼႂ်းမိူင်းႁူမ်ႈတုမ်ႁၢဝ်ႈႁႅင်း ပွၵ်ႈၵမ်းသွင်ၼႆႉသေ ရူတ်ႉၵႃး တၢင်ႇၵုၼ်ႇၶဝ်ႈ ဢွၵ်ႇ တႃႈၶီႈလဵၵ်း – မႄႈသၢႆ ၼိုင်ႈၾၢႆႇလႂ် ပၼ်ရူတ်ႉၵႃးတၢင်ႇၵုၼ်ႇၶဝ်ႈဢွၵ်ႇၵႂႃႇမႃး 6 လမ်းၵူၺ်းလႄႈ လွင်ႈ ၼႆႉ ၵူၼ်းမိူင်းပိုၼ်ႉတီႈပွတ်းတႃႈၶီႈလဵၵ်း မႆႈၸႂ် ၵူဝ်ၶၼ်ၵုၼ်ႇၶိုၼ်ႈ ဝႃႈၼႆ။

ႁူဝ်ၶူဝ် မၢႆ 2 တႃႈၶီႈလဵၵ်း – မႄႈသၢႆ (ၾင်ႇတင်း မိူင်းတႃႈၶီႈလဵၵ်း)

တႄႇဢဝ် 17/9/2020 ၼႆႉၵႂႃႇ လူင်ပွင်ၸိုင်ႈမိူင်းထႆး ပိုၼ်ၽၢဝ်ႇ ၸီႉသင်ႇ ပၼ်ၶႂၢင်ႉရူတ်ႉၵႃးတၢင်ႇၵုၼ်ႇ တၢင်းၾင်ႇတႃႈၶီႈလဵၵ်း ၶဝ်ႈၵႂႃႇတၢင်းၾင်ႇမႄႈသၢႆ မိူင်းထႆးၼၼ်ႉ ၼိုင်ႈဝၼ်းလႂ် ပၼ်ၶဝ်ႈၵႂႃႇ 6 လမ်း။ ၵူၼ်းႁေႃႈၵႃး ၸိူဝ်းၼၼ်ႉ ယူႇတီႈတၢင်းၾင်ႇမိူင်းထႆး တေမႃးႁပ်ႉႁေႃႈၶဝ်ႈၵႂႃႇဢဝ်လႄႈ တၢင်းၾင်ႇမိူင်းထႆးၵေႃႈ တေတေႃႉၶူဝ်းၵုၼ်ႇၶဝ်ႈမႃး တၢင်း ၾင်ႇတႃႈၶီႈလဵၵ်း ၼိုင်ႈဝၼ်းလႂ် 6 လမ်းၵူၺ်းမိူၼ်ၵၼ် လွင်ႈၼႆႉ ၵူၼ်းပိုၼ်ႉတီႈ ပွတ်းတႃႈၶီႈလဵၵ်း မႆႈၸႂ် ၵူဝ်ၶၼ်ၶူဝ်း ၵုၼ်ႇၶိုၼ်ႈ ။

- Subscription -

ၸၢႆးၵႅဝ်ႈ ၵူၼ်းတႃႈၶီႈလဵၵ်း လၢတ်ႈဝႃႈ သင်ဝႃႈ ပၼ်ၵႃးၶဝ်ႈဢွၵ်ႇၵႂႃႇမႃး ၼိုင်ႈၾၢႆႇလႂ် တေႃႇဝၼ်း 6 လမ်းၵူၺ်းၼႆတႄႉ တုမ်ႉတိူဝ်ႉၵၢၼ်ႁႃၵိၼ်လဵင်ႉတွင်ႉတႄႉဢိူဝ်ႈ။ ယၢမ်းလဵဝ် ၼႂ်းတႃႈၶီႈလဵၵ်းၼႆႉ ၵၢၼ်ၵေႃႈဢမ်ႇပဵၼ်တႄႉတႄႉဝႃႈဝႃႈ။ ၵၢၼ် ပၢႆးမၢၵ်ႈမီးၵေႃႈတူၵ်း။ ထႅင်ႈၾၢႆႇၼိုင်ႈ ၶၼ်ၶူဝ်းၵုၼ်ၼႆႉၵေႃႈ တေလႅပ်ႈၶိုၼ်ႈထႅင်ႈ။ သင်ဝႃႈ ၶဝ်တတ်း ၶူဝ်း ၵုၼ်ႇ ၼိုင်ႈၾၢႆႇတေႃႇဝၼ်းလႂ် ၵႃး 6 လမ်းတႄႉ၊ ၵူၼ်းႁဵတ်းၵၢၼ်ပၢႆးမၢၵ်ႈမီးတၢင်းၾင်ႇမႄႈသၢႆၵေႃႈ ၵမ်ႉဢွၼ်ၵၼ် လုၵ်ႉ ၼႄၵၢင်ၸႂ်ၵွၼ်ႇၶႃႈဢေႃႈ။ ယွၼ်ႉၶူဝ်းဢမ်ႇၸၢင်ႈတေႃႉသူင်ႇဢွၵ်ႇသေ တေသုမ်းၵၼ်ၶႃႈလူး – ဝႃႈၼႆ။

ၸႄႈဝဵင်းတႃႈၶီႈလဵၵ်းၼႆႉသမ်ႉ ပဵၼ်ဝဵင်းတိတ်းၸပ်းၵၼ်တင်းမႄႈသၢႆ ၸႄႈတွၼ်ႈၵဵင်းႁၢႆး ၸိုင်ႈထႆး ဝႆႉဝဵင်းၼိုင်ႈ ၸဵမ် ၶူဝ်းၵုၼ်ႇၶွင်ၵိၼ်ယႅမ်ႉ ၼမ်ႉၼမ်းရူတ်ႉၵႃး၊ ၵႅတ်ႉသ် ၸိူဝ်းၼႆႉ တေႃႉဢဝ်တၢင်းမိူင်းထႆးမႃး သူင်ႇၸူးၶၢႆတင်းၼမ် ဝႃႈၼႆ။

ၸၢႆးတူး ၵူၼ်းၶၢႆၼမ်ႉမၼ်း ရူတ်ႉၶိူင်ႈ တႃႈၶီႈလဵၵ်း လၢတ်ႈဝႃႈ – လိူၼ်ၼႆႉ ၼမ်ႉမၼ်းၶိုၼ်ႈ၊ ဢဝ်ပုင်းၵႂႃႇသိုဝ်ႉၼမ်ႉမၼ်း ၵေႃႈဢမ်ႇလႆႈယဝ်ႉ။ လူဝ်ႇဢဝ်ၵႃး ဢဝ်ရူတ်ႉၶိူင်ႈၵႂႃႇသိုဝ်ႉၸင်ႇလႆႈ။ ၶၢဝ်းတၢင်း 10-20 ဝၼ်းၼႆႉ လုၵ်ႉတီႈ 12.50 ဝၢတ်ႇ ၶိုၼ်ႈပဵၼ် 15.50 ဝၢတ်ႇ တေႃႇလိတ်ႉ။ ဢၼ်ႁဝ်းၶႃႈသမ်ႉ ၶူတ်ႇ 1.5 လိၼ်ႉ ၶူတ်ႇၼမ်ႉၶူၵ်ႉၼၼ်ႉ ပေႃးဢမ်ႇၶၢႆ 25 ဝၢတ်ႇ ဢမ်ႇလႆႈယဝ်ႉၶႃႈ – ဝႃႈၼႆ။

ဢိင်ၼိူဝ် လွင်ႈတၢင်းမိူင်းထႆး ပၼ်ၵႃးတၢင်ႇၵုၼ်ႇ တၢင်းမိူင်းတႆးၶဝ်ႈ ၼိုင်ႈဝၼ်းလႂ် 6 လမ်းၵူၺ်း။ တၢင်းၾၢႆႇထႆး သမ်ႉ ၵႃးတၢင်ႇၵုၼ်ႇၶဝ်ႈမႃးၼမ်လိူဝ်တၢင်းၾၢႆႇမိူင်းႁူမ်ႈတုမ်လႄႈ လွင်ႈၼႆႉ တၢင်းသွင်မိူင်း လႆႈငူပ်ႉငီႉၵၼ် တႄႉတႄႉ ဝႃႈဝႃႈသေ ယၢမ်းလဵဝ် ၸင်ႇပၼ် ၼိုင်ႈၾၢႆႇလႂ် တေႃႇဝၼ်း ပၼ်ရူတ်ႉၵႃးတၢင်ႇၵုၼ်ႇၶဝ်ႈဢွၵ်ႇၵႂႃႇမႃး 6 လမ်း ၼႆယဝ်ႉ။

ၸၢႆးဢုတ်း ၽူႈၵွၼ်းပွၵ်ႉမႄႈၶၢဝ် လၢတ်ႈဝႃႈ သင်ဝႃႈ တင်းသွင်ၾၢႆႇမီးလွင်ႈၽဵင်ႇပဵင်းတေႃႇၵၼ်တႄႉ ဢမ်ႇထိုင်တီႈလႆႈ သုၵ်ႉသၵ်ႉၸိူင်ႉၼႆၼင်ႇၵဝ်ႇ။ ၵႃးမိူင်းမၢၼ်ႈသမ်ႉ ပၼ်ၶဝ်ႈၵႂႃႇတၢင်းၶဝ် 6 လမ်း။ ၶဝ်သမ်ႉ မႃးၼမ်လိူဝ် 6 လမ်းလူင်ၼႄႇ။ ယၢမ်းလဵဝ် သင်ဝႃႈ တင်းသွင်ၾၢႆႇ တိုၵ်ႉၶဵင်ႈၶႅင် တိုဝ်တေႃႇၵၼ် ဢမ်ႇယွၼ်ႉယၼ်း ပၼ်ၵၼ်တႄႉ ၵူၼ်းမိူင်းၵူၺ်းဢေႃႈ တေတုၵ်ႉၶတင်းသွင်ၾၢႆႇယူႇ။ မိူၼ်ၼင်ႇ မိူင်းထႆးသမ်ႉ ၶဝ်မီးၶူဝ်းၶွင်ၶၢႆ။ သင်ၵူၼ်းမိူင်းမၢၼ်ႈ ဢမ်ႇႁပ်ႉသိုဝ်ႉၼႆ ၶဝ်တေ ႁဵတ်းႁိုဝ် – ဝႃႈၼႆ။

မိူင်းတႆး – မိူင်းထႆး ၼႆႉ ၽၵ်းတူမိူင်း လႅၼ်လိၼ် ဢၼ်ပိုတ်ႇပဵၼ်တၢင်းၵၢၼ် မီးတီႈဝဵင်းတႃႈၶီႈလဵၵ်း သွင်တီႈ၊ ၶူဝ်မၢႆ ၼိုင်ႈ တင်း ၶူဝ်မၢႆ သွင်။ ၶူဝ်ႈမၢႆ ၼိုင်ႈ ပၼ်ၵူၼ်းၶၢမ်ႈၵႂႃႇမႃး၊ ၶူဝ်မၢႆသွင် သမ်ႉတေႃႉတၢင်ႇၵုၼ်ႇ။ ၶူဝ်မၢႆၼိုင်ႈ တႄႉ လိူင်ပွင် ၸိုင်ႈ ထႆး ပိၵ်ႉဢမ်ႇပၼ်ၽႂ်ၵႂႃႇမႃး ၸဵမ်မိူဝ်ႈ လိူၼ်မတ်ႉၶျ် ဝၼ်းတီႈ 23 ဝၼ်း ၸမ်တေတဵမ် 6 လိူၼ်။ ၶူဝ်မၢႆ သွင်တႄႉ ပၼ် တေႃႉ တၢင်ႇၵုၼ်ႇၶဝ်ႈဢွၵ်ႇ။ ယၢမ်းလဵဝ်သမ်ႉ မိူင်းႁူမ်ႈတုမ်မၢၼ်ႈ တၢင်းပဵၼ် ၶူဝ်ႊဝိတ်ႉ ၽႄႈလႄႈ ထႆး ႁၢမ်ႈတတ်း လူတ်းၵႃး ၶဝ်ႈဢွၵ်ႇထႅင်ႈ။

ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ

- Subscription -
- SHAN's Apps -spot_img

ၶၢဝ်ႇလိုၼ်းသုတ်း