ပႃႇတီႇသိူဝ်ၽိူၵ်ႇ ၸႄႈဝဵင်းတႃႈၶီႈလဵၵ်း မိူင်းတႆး ပွတ်းဢွၵ်ႇၶူင်း တေႃႇသူႈ တၢင်းပဵၼ် ၸိူဝ်ႉမႅင်း ၶူဝ်ႊဝိတ်ႉ 19 သေ တႄႇလူင်းပိုၼ်ႉတီႈ သူၼ်းတုမ်ႁႃသဵင် ဝၼ်းႁႅၵ်ႈ၊ လႆႈသႂ်ႇၽႃႈပိၵ်ႉပၢၵ်ႇ၊ လႆႈယူႇႁၢင်ႇၵၼ်၊ ၵူၼ်းဢမ်ႇလိူဝ် 50 ၸိူဝ်းၼႆႉသေ လူင်းႁႃသဵင်။
မိူဝ်ႈၼႆႉ 15/09/2020 တီႇမူဝ်ႇၶရႅတ်ႉတိၵ်ႉပႃႇတီႇၸၢဝ်းၶိူဝ်းတႆး (SNDP) ႁိုဝ် ပႃႇတီႇသိူဝ်ၽိူၵ်ႇ တႄႇလူင်း သူၼ်းတုမ်ႁႃသဵင် ပဵၼ်ဝၼ်းႁႅၵ်ႈ။ ဝၼ်းမိူဝ်ႈၼႆႉ ႁၢင်ႈႁႅၼ်းတူဝ် ၵၢၼ်ၵႅတ်ႇၵင်ႈ ၵႆယၢၼ် တၢင်းပဵၼ် ၶူဝ်ႊဝိတ်ႉ 19 သေ တႄႇလူင်းႁႃသဵင် တၢင်း ဝၢၼ်ႈသၢမ်ပူး၊ ပႃႇသႃ ၊ ႁူၺ်ႈလိၼ်လမ် တၢင်းဝၢၼ်ႈႁွင်ႇ ႁွင်ႈလိုၵ်ႉ ၸိူဝ်းၼႆႉ။ ၵၢၼ်ႁႃသဵင်တႄႉ – ပူၵ်းပၢႆႉပႃႇတီႇ၊ ပူၵ်းတုင်းပႃႇတီႇ/ၸၢတ်ႈ၊ ႁွင်ႇပၢဝ်ႇ ပၼ်ႇလဵပ်ႈ တိုၵ်းသူၼ်း ႁႂ်ႈသႂ်ႇၶႅပ်းၵၢင်ၸႂ်ပၼ်ပႃႇတီႇသိူဝ်ၽိူၵ်ႇ – ၸဵမ်ၸိူဝ်းၼႆႉ။
ၼၢင်းငူၺ်ႇမျႃႉ ၼေႃႇၽူႈတႅၼ်းသၽႃးၸႄႈမိူင်း ပႃႇတီႇသိူဝ်ၽိူၵ်ႇ SNDP ၶဵတ်ႇလိူၵ်ႈတင်ႈမၢႆ 2 ၸႄႈဝဵင်းတႃႈၶီႈလဵၵ်း လၢတ်ႈတီႈ ၽူႈတွႆႇႁွၵ်ႈဝႃႈ- “ႁဝ်းၶႃႈဢမ်ႇမီးတၢင်းယၢပ်ႇၽိုတ်ႇသင်ၶႃႈ။ မိူဝ်ႈၼႆႉ လူင်းသူၼ်းတုမ်တီႈဝၢၼ်ႈသၢမ်ပူး၊ ပႃႇသႃ မႃးယဝ်ႉတီႈဝၢၼ်ႈပုင်ႇ ၼႂ်းဢိူင်ႇမိူင်းၽူင်း (ၵ)၊ မိူဝ်ႈၽုၵ်ႈၸင်ႇတႄႇထႅင်ႈၶႃႈ။ ပေႃးမိူင်းၽူင်း (ၵ) ယဝ်ႉ တေသိုပ်ႇလူင်းသူၼ်းတုမ်ႁႃသဵင်ထႅင်ႈ ၼႂ်းမိူင်းၽူင်း (ၶ)။ ပေႃးယဝ်ႉ ၸင်ႇသိုပ်ႇၵႂႃႇထႅင်ႈ ပႃႇလႅဝ်း ၵဵင်းလၢပ်ႈ၊ တႃႈလိူဝ်ႇ မိူင်းလဵၼ်း” ဝႃႈၼႆ။
ပၢင်ၶွၼ်ႈတုမ် ဢၼ်ပႃႇတီႇသိူဝ်ၽိူၵ်ႇ လူင်းသူၼ်းတုမ်ႁႃသဵင်ၼႆႉ တီႈလႂ်ဢမ်ႇဝႃႈ မီးၵၢၼ်တမ်းပၼ် ၼမ်ႉယႃႈလၢင်ႉမိုဝ်း၊ မီးၵၢၼ်ၸႅၵ်ႇၽႃႈတူမ်းပၢၵ်ႇ/ၶူႈၼင် ၸွမ်းၼင်ႇ ပိူင်ၵႅတ်ႇၶႄႁႄႉၵင်ႈ တၢင်းပဵၼ်ၶူဝ်ႊ ဝိတ်ႉ 19 ၼႆယဝ်ႉ။
ထိုင်ၶၢဝ်းၶွမ်ႊမသျိၼ်ႊၵၢၼ်လိူၵ်ႈတင်ႈ မိူင်းႁူမ်ႈတုမ် ပၼ်ဢၼုၺၢတ်ႈ/ ၶႂၢင်ႉ လူင်းႁႃသဵင်ယဝ်ႉသေတႃႉ ပႃႇတီႇႁူဝ်သိူဝ် ၸႄႈဝဵင်းတႃႈၶီႈလဵၵ်း တႄႉ ယင်းပႆႇလူင်းသူၼ်းတုမ်ႁႃသဵင် ပဵၼ်တၢင်းၵၢၼ်။ ပူၼ်ႉမႃး 2-3 ဝၼ်းၼၼ်ႉ ၶီႇရူတ်ႉထိပ်ႇ လူင်းပိုၼ်ႉတီႈ ႁူပ်ႉထူပ်း ၵူၼ်းမိူင်း ႁူပ်ႉထူပ်းလုၵ်ႈၸုမ်းသေ ပူဝႆႉ ပိုၼ်ႉၵၢၼ် ႁႃသဵင်ၵူၺ်းၼႆ ၵူၼ်းၼႂ်းပႃႇတီႇႁူဝ်သိူဝ်တႃႈၶီႈလဵၵ်း လၢတ်ႈၼႄၼင်ႇၼႆ။
ၸၢႆးၼုမ်ႇတုၺ်ႈ ၼေႃႇၽူႈတႅၼ်းသၽႃး ၵူၼ်းမိူင်း ပႃႇတီႇႁူဝ်သိူဝ် ၸႄႈဝဵင်းတႃႈၶီႈလဵၵ်း လၢတ်ႈဝႃႈ- “ၸွမ်းၼင်ႇလႆႈတႅပ်းတတ်းဝႆႉ ဝၼ်းတေလူင်းသူၼ်းတုမ်ႁႃသဵင် ပဵၼ်တၢင်းၵၢၼ် တေပဵၼ်ဝၼ်းတီႈ 17 ၵႂႃႇ၊ ပေႃးလူင်းသူၼ်းတုမ်တႄႉတႄႉမႃး ၵူၼ်းတေၵႂႃႇၸွမ်းၵၼ်ၼႆႉ မၼ်းတေမီးၼမ်၊ ၸၢင်ႈမီးထိုင် 70-80 ၸမ်ပၢၵ်ႇ။ ၵွပ်ႈပိူဝ်ႈၼၼ် ၼင်ႇႁိုဝ်တေမႅၼ်ႈၸွမ်း လၢႆးၵႅတ်ႇၵင်ႈတၢင်းပဵၼ်ၶူဝ်ႊဝိတ်ႉၼၼ်ႉ တေလႆႈၶပ်းၶိုင်ႁဵတ်းသၢင်ႈၵႂႃႇ”- ဝႃႈၼႆ။
ပၢင်လိူၵ်ႈတင်ႈ 2020 ၼႆႉ ယူႇတီႈပႃႇတီႇသိူဝ်ၽိူၵ်ႇသေ တေၶဝ်ႈၶေႉၶဵင်ႇတႃႇ 37 ၸႄႈဝဵင်း ပတ်းပိုၼ်ႉမိူင်း ႁူမ်ႈတုမ်။ ၼႂ်း ၸိုင်ႈတႆး 32 ၸႄႈဝဵင်း ၊ မိူင်းၶၢင် 4 ဝဵင်း ၊ တီႈၼင်ႈၽွင်းလူင် ၸၢဝ်းၶိူဝ်းတႆး 2 တီႈၼင်ႈ တႄႉ တေၶေႉၶဵင်ႇ ၼႂ်းတိူင်းတႃႈလိူဝ်ႇ လႄႈ ၸႄႈမိူင်းၶၢင်။
ပႃႇတီႇႁူဝ်သိူဝ်သမ်ႉ တေၶဝ်ႈၶေႉၼႂ်း 45 ၸႄႈဝဵင်း။ တႃႇတီႈၼင်ႈ သၽႃးၸိူဝ်ႉၸၢတ်ႈ 12 ၵေႃႉ၊ သၽႃး ၵူၼ်းမိူင်း 38 ၵေႃႉလႄႈ သၽႃးၸႄႈမိူင်း 79 ၵေႃႉ၊ ၽွင်းလူင်ၾၢႆႇၸၢဝ်းၶိူဝ်းတႆး 3 ၵေႃႉ။ တင်းမူတ်း 132 ၵေႃႉ။ ပႃးၸဵမ်မိူင်းၶၢင်၊ တိူင်းတႃႈလိူဝ်ႇ တင်းမိူင်းယၢင်းလႅင် ၸိူဝ်းၼႆႉ။
