တႆးႁွတ်ႈၵဵင်းမႆႇ လၵ်ႉၶူဝ်းငိုၼ်းၶမ်းၵၼ် ပႃးၵႂႃႇၶမ်းၶၼ်ပၢႆ တင်း ငိုၼ်းထႆးသႅၼ်ပၢႆ

ႁႅင်းၵၢၼ်ယၢၼ်မိူင်း သွင်ၵေႃႉပူႇဢွၵ်ႇၽူဝ်မေး ၵဵပ်းငိုၼ်း ၵဵပ်းၶမ်းမႃးပီယၢဝ်းၶၢဝ်းႁိုင် ၺႃးၶႅၵ်ႇမႃးယွၼ်းၼွၼ်းတီႈႁိူၼ်းသေ လၵ်ႉဢဝ်ၵႂႃႇၶမ်း ၶၼ်ပၢႆ ငိုၼ်းႁိမ်းသႅၼ်ႁႃႈမိုၼ်ႇ ။

မိူဝ်ႈၶိုၼ်းဝၼ်းတီႈ 01/09/2020 ၼၼ်ႉ ၶူဝ်းၶွင်ငိုၼ်းၶမ်း ၸၢႆးဝူၼ်ႇၼႃႉ ၼၢင်းဢိတ်း တီႈမူႇဝၢၼ်ႈမေႃႈ ဢိူင်ႇႁူၺ်ႈသၢႆး ၸႄႈဝဵင်းသၼ်ၵမ်ႇၽႅင်း ႁၢႆၵႂႃႇတင်းမူတ်းႁူမ်ႈ ၶမ်း 13 ဝၢတ်ႇ (ၵျၢပ်ႈ)၊ ငိုၼ်း 140,000 (ၼိုင်ႈသႅၼ်သီႇမိုၼ်ႇ)ဝၢတ်ႇ။  ၵေႃႉထုၵ်ႇထၢင်ႇထိူမ်ဝႃႈပဵၼ်ၽူႈလၵ်ႉၼၼ်ႉ ပဵၼ်ၵူၼ်းပၢႆႈသိုၵ်း – ၸိုဝ်ႈ ၸၢႆးထုၼ်း ဢႃႇယု 38 ပီ၊ လုၵ်ႉတၢင်းလႅၼ်လိၼ် ၸႄႈဝဵင်းပၢင်မၢၵ်ႇၽႃႈ ၸႄႈတွၼ်ႈမႄႈႁွင်ႈသွၼ် မႃး ယွၼ်းပိုင်ႈဢိင်ယူႇသဝ်း တီႈႁိူၼ်း (ၸၢႆးဝူၼ်ႇၼႃႉ ၼၢင်းဢိတ်း) သေ လၵ်ႉဢဝ်ငိုၼ်းၶမ်းၶႃႈ ပူဢွၵ်ႇၵႂႃႇ။

ၸဝ်ႈသိုၵ်းဢုမ်ႈၶိူဝ်း ၽူႈၶၢၼ်ပၢၵ်ႇ RCSS လၢတ်ႈတီႈၽူႈတွႆႇႁွၵ်ႈဝႃႈ- “လွင်ႈသိုၵ်းလၵ်ႉပၢႆႈၼႆႉ လႆႈႁၼ် ၼိူဝ် Social Media သေ လႆႈႁူႉၸွမ်းယူႇ၊ ၵူၺ်းၵႃႈ ယူႇတီႈမုၵ်ႉၸုမ်းသေ ပၼ်လိၵ်ႈပွင်ႇၶၢဝ်ႇ ၵူႈႁွင်ႈၵၢၼ် ႁႂ်ႈပဵၼ်တၢင်းၵၢၼ်တႄႉ ပႆႇလႆႈႁူႉပႆႇလႆႈငိၼ်း၊ ပေႃႇလသီႇၼိူဝ်သိုၵ်းလၵ်ႉပၢႆႈတႄႉ ပေႃးတီႉၺွပ်းလႆႈၵေႃႈ ပၼ်တူတ်ႈတၢမ်ႇ၊ ၵူၺ်းၵႃႈ တၢမ်ႇၵေႃႈမၼ်းမီးလၢႆသႅၼ်း ၵွပ်ႈပိူဝ်ႈဝႃႈ လၢႆးသိုၵ်းလၵ်ႉပၢႆႈၵေႃႈမီးလၢႆလၢႆး” ဝႃႈၼႆ။

ငိုၼ်းၶမ်း ဢၼ်ၺႃးလၵ်ႉၵႂႃႇၼၼ်ႉ ဢမ်ႇၸႂ်ႈၶွင်ၶႃ သွင်ၵေႃႉၽူဝ်မေးမူတ်း၊ ပိူၼ်ႈယုမ်ႇယမ်သေ ၾၢၵ်ႇဝႆႉၵေႃႈပႃး၊ တူဝ်ငိုၼ်း တႄႉ ဢၼ်ပီႈၼွင်ႉ ၾၢၵ်ႇဝႆႉႁႃႈမိုၼ်ႇ၊ ငိုၼ်းၶႃပူႇဢွၵ်ႇသမ်ႉ ၵဝ်ႈမိုၼ်ႇ( ငိုၼ်းထႆး ၼိုင်ႈသႅၼ် တူၵ်းငိုၼ်းမၢၼ်ႈ မွၵ်ႈ 45 သႅၼ်)။ ၶမ်းဢၼ်ၺႃးလၵ်ႉၵႂႃႇသမ်ႉ ၶမ်းၶႃၽူဝ်မေး သၢႆၶေႃးၶမ်း ၼမ်ႉၼၵ်း ၼိုင်ႈဝၢတ်ႇ – 2 သဵၼ်ႈ၊ မူင်းၵူၺ်းၼမ်ႉၼၵ်းၶမ်း ၼိုင်ႈဝၢတ်ႇ –  2 သဵၼ်ႈ။ လိူဝ် ၼၼ်ႉ ပဵၼ်ၶမ်းပီႈၼွင်ႉၾၢၵ်ႇဝႆႉ ႁူမ်ႈတင်းမူတ်း 13 ဝၢတ်ႇ (ၼမ်ႉၼၵ်းၶမ်းထႆး ၼိုင်ႈဝၢတ်ႇ ဢမ်ႇၼၵ်းပဵင်း ၶမ်းမၢၼ်ႈၼိုင်ႈၵျၢပ်ႈ၊ တေမဝ်လိူဝ်ဢိတ်းဢိတ်း)။

ၸၢႆးဝူၼ်ႇၼ လၢတ်ႈတီႈၸုမ်းၶၢဝ်ႇၽူႈတွႆႇႁွၵ်ႈဝႃႈ “လွင်ႈၼႆႉမႅၼ်ႈၶႃႈဢေႃႈ။ ငိုၼ်းၶမ်းတင်းမူတ်း သႂ်ႇ ၼႂ်းထူင်ၸိပ်ႉ 3 ၸၼ်ႉသေဝႆႉၼႂ်းႁူဝ်ရူတ်ႉယႂ်ႇၶႃႈ၊ ဝႆႉလေႃးၵၼ်မူတ်းၶႃႈ၊ ၺႃးလၵ်ႉဢဝ်ၵႂႃႇတီႈၼႂ်း ႁူဝ်ရူတ်ႉဢေႃႈ၊ မိူဝ်ႈလဵဝ်ၶႃႈပေႃးၶႂ်ႈယွင်ႇယဝ်ႉၶႃႈ။ လွင်ႈၼႆႉ မေးၶႃႈၵႂႃႇႁပ်ႉလုၵ်ႈဢွၼ်ႇမႃးသေ မႃးၶဝ်ႈလွႆးၶူဝ်းၼႂ်းႁွင်ႈၼမ်ႉ၊ ၵၢၵ်ႇသေႃးရူတ်ႉၶိူင်ႈတင်းရူတ်ႉယႂ်ႇသမ်ႉဝႆႉၸွမ်းၵၼ်၊ မၼ်းလႅပ်ႈတေတဵၵ်း ရီႊမူတ်ႊ (Remote) သေၵႂႃႇပိုတ်ႇဢဝ်။ မိူဝ်ႈၽွင်းၼၼ်ႉ ၶႃႈတိုၵ်ႉမီးယူႇတီႈႁဵတ်းၵၢၼ်၊ ၶိုၼ်းၼၼ်ႉ ပေႃးႁူႉဝႃႈငိုၼ်းၶမ်းႁၢႆမူတ်းယဝ်ႉ ၶႃႈႁွင်ႉသႅၼ်ႇႁႆႈမင် ပေႃးၶႂ်ႈပဵၼ်လူမ်းဢေႃႈ၊ ၵႂႃႇၸႅင်ႈပလိၵ်ႈဝႆႉ ၶိုၼ်းၼၼ်ႉ ၵမ်းလဵဝ်ၶႃႈ” ဝႃႈၼႆ။

မိူဝ်ႈၼႆႉ 04/09/2020 ၽွင်းပွတ်းၼႂ်ဢွၼ်ဝၼ်းၼၼ်ႉ ပလိၵ်ႈထႆး ၸႅင်ႈလၢတ်ႈတီႈ ၸၢႆးဝူၼ်ႇၼႃႉဝႃႈ ဢမ်ႇၸၢင်ႈတီႉၺွပ်းတူဝ်ၽူႈလၵ်ႉလႆႈယဝ်ႉ၊ မၼ်းၶၢမ်ႈပူၼ်ႉလႅၼ်လိၼ်မိူဝ်းပႅတ်ႈယဝ်ႉ – ဝႃႈၼင်ႇၼႆ။

ၸၢႆးတႆးထိူၼ်ႇ ၽူႈတူင်ႉၼိုင်ၸွႆႈထႅမ်ႁႅင်းၵၢၼ်ယၢၼ်မိူင်း လၢတ်ႈဝႃႈ– “မၼ်းပႆႇပၢႆႈၵႆၵႆလႆႈ၊ မၼ်းတိုၵ်ႉ ၵႂႃႇမႃးယူႇထႅဝ်ၵဵင်းမႆႇၸိူဝ်းၼႆႉၵူၺ်း။ ပေႃးဝႃႈပၢႆႈဢွၵ်ႇမိူဝ်းမိူင်းတႆး ၶႅၼ်းတီႉဢဝ်ငၢႆႈ၊ ၵွပ်ႈပိူဝ်ႈဝႃႈ ပိုၼ်း တူဝ်မၼ်းယူႇၼႂ်းတပ်ႉသိုၵ်းဝႆႉမူတ်းယဝ်ႉ။ ၵူၺ်းၵႃႈ ၸွမ်းၼင်ႇၶႃႈႁဝ်းလႆႈၵပ်းသၢၼ် တွင်ႈထၢမ်တူၺ်း ၸဝ်ႈၼႃႈတီႈ RCSS တႄႉလၢတ်ႈဝႃႈ မၼ်းၸၢႆးလၵ်ႉဢွၵ်ႇပၢႆႈတပ်ႉယဝ်ႉလႄႈ ဢမ်ႇၵဵဝ်ႇၶွင်ႈတင်း တပ်ႉသိုၵ်းယဝ်ႉ၊ ပေႃးၶဝ်ႈမိူင်းထႆးၵေႃႈ မၼ်းပဵၼ်ႁႅင်းၵၢၼ်ယၢၼ်မိူင်း ၵေႃႉၼိုင်ႈၵူၺ်းယဝ်ႉ” – ဝႃႈၼႆ။

တႆးႁွတ်ႈမိူင်းထႆး ၵမ်ႈၼမ် ပဵၼ်ႁဵတ်းၵၢၼ် ဢၼ်ၸႂ်ႉမႃႇ ၸႂ်ႉႁႅင်း၊ ဢမ်ႇပေႃးသူင်မိုတ်ႈ ၶဝ်ႈလုမ်းၶဝ်ႈၸၢႆး ၊ တႃႇၵႂႃႇပိုတ်ႇပပ်ႉသဵၼ်ႈမၢႆယေးငိုၼ်းသေ ဢမ်ႇငိုၼ်းၶမ်းၸဝ်ႈၵဝ်ႇ ၵႂႃႇဝႆႉၼႂ်းယေးငိုၼ်းၵေႃႈ ဢမ်ႇပေႃး သူင်၊ ဢမ်ႇပေႃးဝႆႉဝၢင်းၸႂ်၊ ငိုၼ်းၶမ်းၸဝ်ႈၵဝ်ႈ ၵမ်ႈၼမ် ဢဝ်ပႃးတိတ်းၸပ်းတူဝ် ၵဝ်ႇသေႇသေႇ၊ ယွၼ်ႉ ႁွင်ႈႁိူၼ်း ၵမ်ႈၼမ်ၶၢတ်ႈယူႇ၊ ဢမ်ႇမီးလွင်ႈႁူမ်ႇလူမ်ႈ ။ ၵမ်ႈၽွင်ႈသႂ်ႇၵပ်းတူဝ် ၵႂႃႇပွႆးလၢမ်း ၺႃးလၵ်ႉၼႂ်း ပွႆးၼႂ်းလၢမ်းၵေႃႈမီး ဢဝ်တူၵ်းႁၢႆၵေႃႈ ၵႆႉၵႆႉမီး၊ ပေႃးပလိၵ်ႈထႆး ၵူတ်ႇထတ်း ဝႂ်ၵပ်းတူဝ် ဢမ်ႇတဵမ်ထူၼ်ႈ သေ ၺႃးထႆၵိၼ်ငိုၼ်းၸိူဝ်းၼႆႉၵေႃႈမီး။