ၾူၼ်တူၵ်းထပ်းၵၼ်လၢႆဝၼ်းလႄႈ ၼမ်ႉၶူင်းၼွင်း လူၼ်ႉၾင်ႇ တီႈ တႃႈသူပ်းတဵင်း ႁၢဝ်ႈႁႅင်း ၼႂ်းႁွပ်ႈ 20 ပီ ထူမ်ႈႁိူၼ်းၵူၼ်းဝၢၼ်ႈမွၵ်ႈ 30 လင်ႁိူၼ်း။

ဝၼ်းတီႈ 22/8/2020 ၼမ်ႉၶူင်းၼွင်းလူၼ်ႉၾင်ႇ တီႈဝၢၼ်ႈတႃႈသူပ်းတဵင်း( တီႈၼမ်ႉၶူင်းလႄႈ ၼမ်ႉတဵင်းၶွႆႈၵၼ်) ဢိူင်ႇဝၢၼ်ႈၸလွင်း ၼႂ်းၸေႈဝဵင်းလၢင်းၶိူဝ်း ၸိုင်ႈတႆးပွတ်းၸၢၼ်း။

ၸၢႆးဢွင်ႇမဵဝ်းၵျေႃႇ ၽူႈတႅၼ်းသၽႃး ၸေႈမိူင်း ပႃႇတီႇ ႁူဝ်သိူဝ် SNLD ၸေႈဝဵင်းလၢင်းၶိူဝ်း လၢတ်ႈတီႈၽူႈတွႆႇႁွၵ်ႈဝႃႈ –   ၾၢႆႇဢွၵ်ႇၾင်ႇၶူင်းမီးမွၵ်ႈ 8 လင်ႁိူၼ်း။ ၾင်ႇၾၢႆႇတူၵ်းသမ်ႉမီး 20 လင်ႁိူၼ်း။ ၵမ်ႈၼမ်ပဵၼ်ပီႈၼွင်ႉဝၢၼ်ႈႁၢတ်ႇ ၵႂႃႇပိုတ်ႇႁၢၼ်ႉၶၢႆၶူဝ်းၶွင်ဝႆႉၶႃႈ။ ၵူၼ်းဝၢၼ်ႈတၼ်းလႆႈၶၢႆႉၶူဝ်းဝႆႉတီႈလွတ်ႈၽေးလႄႈ ၶူဝ်းႁိူၼ်းတႄႉဢမ်ႇသုမ်းသင်။ ၵူၺ်းၵႃႈႁိူၼ်းလႄႈသုမ်ႉသွင်းတႄႉ ၼမ်ႉထူမ်ႈထိုင်လင်ၶႃး ။ ႁဝ်းၶႃႈလၢႆၾၢႆႇလၢႆၸုမ်း လႆႈၵႂႃႇတူၺ်းလူ ၸွႆႈထႅမ်ပၼ်  ၵူၼ်းဝၢၼ်ႈမႃးၶႃႈဢေႃႈ။  – ဝႃႈၼႆ။

မၼ်းၸၢႆးလၢတ်ႈဝႃႈ  ၼမ်ႉၶူင်းၼွင်းထူမ်ႈပွၵ်ႈၼႆႉ လႆႈဝႃႈ ပဵၼ်ဢၼ်ၼွင်းထူမ်ႈႁၢဝ်ႈႁႅင်းသုတ်း ၼႂ်းၶၢဝ်းတၢင်း 20 ပီပူၼ်ႉမႃး ဝႃႈၼႆ။

ၸဝ်ႈၼႃႈတီႈၾၢႆႇၶႄၾႆးလႄႈ ၾၢႆႇၸေႈဝဵင်း ဝဵင်းလၢင်းၶိူဝ်း ဢၼ်လူင်းပိုၼ်ႉတီႈ ၵႂႃႇၸွႆႈထႅမ်ၼၼ်ႉတႄႉလၢတ်ႈဝႃႈ ၼမ်ႉလူၼ်ႉၾင်ႇထူမ်ႈၶိုၼ်ႈသုင်ႁႅင်း။ ၵူၼ်းထူပ်းၽေးၼမ်ႉၼွင်းတီႈတႃႈသူပ်းတဵင်းၼႆႉမီး 104 ၵေႃႉ။ ၼိူဝ်သဵၼ်ႈတၢင်း လၢင်းၶိူဝ်း-ႁူဝ်မိူင်းၼၼ်ႉ ၼမ်ႉထူမ်ႈသုင်ၶိုၼ်ႈမွၵ်ႈ 6 ပေႇ ဝႃႈၼႆ။

ၸၢႆးသိူဝ်ႁၢၼ် ၼေႃႇၽူႈတႅၼ်းသၽႃးၸေႈမိူင်း ပႃႇတီႇၼူၵ်ႉယုင်း NLD ဝဵင်းလၢင်းၶိူဝ်းတႄႉလၢတ်ႈဝႃႈ –  ၼမ်ႉၶူင်းတႄႉ လူၼ်ႉၾင်ႇ ၼွင်းၶိုၼ်ႈၼမ်လိူဝ်ၵူႈပီ။ ပေႃးၼမ်ႉၶူင်းၼွင်းၼႆႉ  ၼမ်ႉတဵင်းၵေႃႈ ၸၢင်ႈလူၼ်ႉၾင်ႇၸွမ်း။ ပေႃးၾၢႆႇႁၵ်ႉသႃငဝ်ႈတိုၼ်းၼမ်ႉ (ရေအရင်းအမြစ်) ၶဝ်ပိုတ်ႇၾၢႆ ပွႆႇၼမ်ႉၸိုင် ၵူၼ်းလၢင်းၶိူဝ်းၵေႃႈ လႆႈမႆႈၸႂ်ၶႃႈဢေႃႈ။

ၵူၺ်းၵႃႈ တင်ႈဢဝ်မိူဝ်ႈဝႃး 24/8/2020 ယၢမ်းဝၢႆးဝၼ်းတႄႉ ၼမ်ႉၶူင်းၶိုၼ်းယွမ်းလူင်းၵႂႃႇၶိုၼ်းဢိတ်းၼိုင်ႈယဝ်ႉ။ ၵူၺ်းၵႃႈ ၵူၼ်းဝၢၼ်ႈၵမ်ႈၼမ် ပႆႇၸၢင်ႈပွၵ်ႈႁိူၼ်းၶိုၼ်း ။ တိုၵ်ႉမီးဝႆႉတီႈဝတ်ႉၵျွင်းဝၢၼ်ႈ ၸလွင်း ယူႇ ၸၢႆးဢွင်ႇမဵဝ်းၵျေႃႇလၢတ်ႈၼင်ႇၼႆ။