တႆးႁွတ်ႈမိူင်းထႆး ယိုၼ်ႈယွၼ်းတွတ်ႈၶႅပ်းလူင်ႈၼႃႈ ဝႆႉသေတႃႉ သုၼ်ႇတႃႇလႆႈတွတ်ႈၶႅပ်းဢေႇ

ႁႅင်းၵၢၼ်ယၢၼ်မိူင်း/တႆး ႁွတ်ႈမိူင်းထႆး တၢင်ႇယိုၼ်ႈ ဝႅပ်ႊၾွမ်ႊပိူင် 15 ယွၼ်းတွတ်ႈၶႅပ်းၵၢင်ၸႂ်လူင်ႈၼႃႈ တွၼ်ႈတႃႇ ပၢင်လိူၵ်ႈတင်ႈ ပီ 2020 ဝႆႉၼႆသေတႃႉ သုၼ်ႇတႃႇ လႆႈတွတ်ႈၶႅပ်းၵၢင်ၸႂ် ဢေႇၼႃႇ – ဝႃႈၼႆ။

ၵၢင်လိူၼ်ၵျူႊလၢႆႊ တေႃႇထိုင်ႁူဝ်လိူၼ်ဢေႃႊၵတ်ႉ ႁႅင်းၵၢၼ် မိူင်းမၢၼ်ႈ ၸိူဝ်းႁွတ်ႈမိူင်းထႆး ယိုၼ်ႈယွၼ်း တွတ်ႈၶႅပ်းၵၢင်ၸႂ်လူင်ၼႃႈ ႁူဝ်ၵူၼ်း မီး 2 မိုၼ်ႇပၢႆ – ၼႂ်းၼၼ်ႉ တႆး ပႃး မွၵ်ႈ 1500 ၵေႃႉ ၵူၺ်း။ ၸိူဝ်းၽၢတ်ႇဝၢၼ်ႈ ယၢၼ်မိူင်း ယိုၼ်ႈယွၼ်းတႃႇတွတ်ႈၶပ်းၵၢင်ၸႂ် လူင်ႈၼႃႈဝႆႉသေတႃႉ ပေႃးတီႈ ဝၢၼ်ႈၵိူတ်ႇ မိူင်းၼွၼ်း ၼၼ်ႉ ပေႃး သဵၼ်ႈမၢႆ ၸိုဝ်ႈသဵင်ဢမ်ႇပႃးၸိုင် တိုၼ်းတေဢမ်ႇၸၢင်ႈလႆႈတွတ်ႈ။ တႃႇတေလႆႈတွတ်ႈ ပေႃးဢမ်ႇယိုၼ်ႈပႃး ဝႅပ်ႊၾွမ်ႊပိူင် 3 ၸွမ်း ( ၾွမ်ႊၼႆႉ တုၵ်းယွၼ်း ႁႂ်ႈဢွၵ်ႇပၼ်ၶိုၼ်း ၸိုဝ်ႈသဵင် တႃႇလႆႈတွတ်ႈၶႅပ်းၵၢင်ၸႂ်) ။

ၽူႈမီးပုၼ်ႈၽွၼ်း တီႈလုမ်းတၢင်မၢၼ်ႈ ၵဵင်းမႆႇလၢတ်ႈဝႃႈ – “ တီႈၼႆႈယိုၼ်ႈတႃႇတွတ်ႈၶႅပ်းလူင်ႈၼႃႈဝႆႉသေတႃႉ ပေႃး တီႈဝၢၼ်ႈၶဝ် ဢမ်ႇပႃးၸိုဝ်ႈၶဝ် ၼႂ်းသၢႆမၢႆ ၵူၼ်းတွတ်ႈၶႅပ်းၼႆ ဢၼ်ယိုၼ်ႈတီႈၼႆႈၵေႃႈဢမ်ႇထူးသင်။ တီႈဝၢၼ်ႈ ၵေႃႈ ပေႃးဢမ်ႇပႃးၸိုဝ်ႈၸဝ်ႈၵဝ်ႇမႃး တေလႆႈယိုၼ်ႈ ဝႅပ်ႊပိူင် 3 သေ ႁႂ်ႈထတ်းသေ ဢွၵ်ႇပၼ်ၸိုဝ်ႈတႃႇတွတ်ႈၶႅပ်း။ တႃႇႁႅင်းၵၢၼ်ၵေႃႈ တႃႇလႆႈတွတ်ႈၶႅပ်းၵၢင်ၸႂ်ၼၼ်ႉ ပေႃးဢမ်ႇယိုၼ်ႈပႃး ဝႅပ်ႊၾွမ်ႊပိူင် 3 တႄႉ သုၼ်ႇတႃႇ တွတ်ႈၶႅပ်း တေဢႄႇတေႉ” – ဝႃႈၼႆ။

မိူဝ်ႈယိုၼ်ႈၸိုဝ်ႈ ယွၼ်းတွတ်ႈၶႅပ်းၵၢင်ၸႂ်လူင်ႈၼႃႈၼၼ်ႉ တႆး ဢၼ်ႁူမ်ႈၵၼ် ယိုၼ်ႈတီႈ ၵဵင်းမႆႇ မီး 900 ပၢႆ ၊ ဢၼ်ႁူမ်ႈၵၼ်ယိုၼ်ႈတီႈ မိူင်းၵွၵ်ႇၵေႃႈ မီး ႁိမ်း 500 ၵေႃႉ။ ၸၢႆးဢေႃးတ လၢင်းၶိူဝ်းတႄႉလၢတ်ႈဝႃႈ “ၶႃႈထၢမ်မိူဝ်းတီႈႁိူၼ်း တႄႉဝႃႈ ဢမ်ႇပႃးၸိုဝ်ႈၶႃႈ၊ ၶဝ်ဝႃႈ  “ခရီးလွန်” ၼႆသေ ဢမ်ႇပၼ်သႂ်ႇပႃးၶႃႈ” – ဝႃႈၼႆ။

ၼၢင်းထူၺ်းဢိင်ႇ လွႆဢုင်း(ႁွင်ႉ) ၼၢင်းမႂ်ႇ ၵႅမ်ႁူဝ်ပဝ်ႈ 2 မုၵ်ႉၸုမ်းၸၢဝ်းၶိူဝ်းတႆး မိူင်းၵွၵ်ႇဝႃႈ – “ တီႈၵုင်းထဵပ်ႈတင်း ရ ယွင်းတႄႉ ႁဝ်းၶႃႈတၢင်ႇယိုၼ်ႈယွၼ်းၾွမ်ႊပိူင် 15 တီႈလုမ်းၽွင်းတၢင်ၵုင်းထဵပ်ႈဝႆႉယဝ်ႉ။ ၵူၺ်းၵႃႈ လွင်ႈထႅမ်ၾွမ်ႊပိူင် 3 ၼၼ်ႉတႄႉ ႁဝ်းၶႃႈဢမ်ႇလႆႈႁူႉလႄႈ ဢမ်ႇလႆႈထႅမ်တၢင်ႇၸွမ်းၶႃႈ။ တီႈလုမ်းၽွင်းတၢင်မၢၼ်ႈၵုင်းထဵပ်ႈတႄႉဝႃႈ ဝႅပ်ႊၾွမ်ႊပိူင် 3 ၼၼ်ႉ ပႆႇ လူဝ်ႇတၢင်ႇ၊ တၢင်ႇဝႅပ်ႊၾွမ်ႊပိူင် 15 ၵွၼ်ႇ။ ပေႃးယဝ်ႉ ၸင်ႇတေဝႃႈထႅင်ႈၵမ်းၼိုင်ႈ”  – ဝႃႈၼႆ။

မိူဝ်ႈႁၢင်လိူၼ်ၵျူႊလၢႆႊလႄႈ ႁူဝ်လိူၼ်ဢေႃႊၵတ်ႊသ်ၼႆႉ ယူႇတီႈတူဝ်တႅၼ်းလၢႆမူႇလၢႆၸုမ်း ၼႂ်းၵဵင်းမႆႇ ႁူမ်ႈၵၼ်တူင်ႉ ၼိုင်ပိုတ်ႇႁပ်ႉၸွႆႈထႅမ် ထႅမ်ဝႅပ်ႊၾွမ်ႊပိူင် 15 တီႈဝတ်ႉပႃႇပဝ်ႈ ၵၢင်ဝဵင်းၵဵင်းမႆႇ၊ ယဝ်ႉၵေႃႈ ၸႅၵ်ႇၸုမ်းၵၼ်သေ လူင်းပိုၼ်ႉ တီႈ တၢင်းၸႄႈဝဵင်း လမ်းပုၼ်း၊ လွႆလေႃႇ၊ ႁၢင်ၻူင်ႊ၊ သႃရၽီး၊ သၼ်သၢႆးလႄႈ သၼ်ၵမ်ပႅင်း ၸိူဝ်းၼႆႉ။

ၶူးသၢႆလိူၼ်ၶမ်း ၾၢႆႇပၢႆးပၺ်ႇၺႃႇႁႅင်းၵၢၼ်ယၢၼ်မိူင်း ဢၼ်လူင်းၸွႆႈထႅမ်တႅမ်ႈ ဝႅပ်ႊၾွမ်ႊပိူင် 15 တီႈၵဵင်းမႆႇၼၼ်ႉဝႃႈ – “ ႁူဝ် လိူၼ်ဢေႃႊၵတ်ႉသ်ၼႆႉ ယူႇတီႈၸုမ်းၸွႆႈထႅမ်တီႈၵဵင်းမႆႇႁဝ်းၶႃႈ ၸႂ်ႉၶၢဝ်းယၢမ်း 2 ဝၼ်းသေ ထႅမ်ပႃးၾွမ်ႊပိူင် 3 ယိုၼ်ႈ ၸွမ်းထႅင်ႈ တီႈလုမ်းၽွင်းတၢင်ၵဵင်းမႆႇ တႃႇႁူဝ်ၵူၼ်း 700 ပၢႆ။ ဝႅပ်ႊၾွမ်ႊပိူင် 15 ၵေႃႈ တၢင်ႇယိုၼ်ႈဝႆႉယဝ်ႉ။ ယွၼ်ႉဝႃႈ ၵူဝ် သဵၼ်ႈၸိုဝ်ႈႁႅင်းၵၢၼ်ႁဝ်းၶႃႈ ဢမ်ႇပႃး/တူၵ်းႁၢႆဝႆႉ။ ၼင်ႇႁိုဝ် ႁႅင်းၵၢၼ်ႁဝ်း ပေႃးတေ ဢမ်ႇလုတ်ႈသုၼ်ႇတွတ်ႈၶႅပ်းၵၢင် ၸႂ်လႄႈ ဢမ်ႇလႆႈယၢပ်ႇထႅင်ႈလၢႆပွၵ်ႈၼၼ်ႉ ႁဝ်းၶႃႈ တၢင်ႇယိုၼ်ႈပႃးၾွမ်ႊပိူင် 3 ၸွမ်းၵမ်းလဵဝ်ၶႃႈယဝ်ႉ” – ဝႃႈၼႆ။

ႁႅင်းၵၢၼ်ယၢၼ်မိူင်းႁူမ်ႈတုမ် ၼႂ်းမိူင်းထႆးပွတ်းတွၼ်ႈၼိူဝ် မိူၼ်ၼင်ႇ ၵဵင်းမႆႇ၊ လမ်းပုၼ်း၊ လမ်းပၢင်း၊ ဢုတ်ႇတရတိတ်ႇ၊ ၽယဝ်း၊ ၼၢၼ်ႉ၊ ၽရႄႉ၊ ၵဵင်းႁၢႆးလႄႈ မႄႈႁွင်ႈသွၼ် ၸိူဝ်းၼႆႉ ၸိူဝ်းတၢင်ႇယွၼ်းဝႅပ်ႊၾွမ်ႊပိူင် 15 ၼၼ်ႉ တင်းမူတ်းမီးၵႂႃႇ 1,054 ၵေႃႉ ယူႇတီႈလုမ်းၽွင်းတၢင်မၢၼ်ႈ တီႈၵဵင်းမႆႇ ပိုၼ်ၽၢဝ်ႇဢွၵ်ႇဝႆႉၼင်ႇၼႆ။ ယူႇတီႈ လုမ်းတၢင်မၢၼ်ႈ မိူင်းၵွၵ်ႇ ပိုၼ်ၽၢဝ်ႇႁူမ်ႈၵၼ်တေႉဝႃႈ ၵူၼ်းယိုၼ်ႈယွၼ်းတွတ်ႈၶႅပ်း ၵၢင် ၸႂ် မီး သွင်မိုၼ်ပၢႆ ။ ႁူဝ်ၵူၼ်းမိူင်းမၢၼ်ႈ ဢၼ်ႁွတ်ႈ မိူင်းထႆး တႄႉ ၾၢႆႇႁႅင်းၵၢၼ် ပိုၼ်ၽၢဝ်ႇဝႃႈ မီးလၢၼ်ႉပၢႆ ဝႃႈၼႆ။

ပၢင်လိူၵ်ႈတင်ႈၵူႈလွင်ႈလွင်ႈပတ်းပိုၼ်ႉ မိူင်းႁူမ်ႈတုမ်ပီ 2020 ၼႆႉ တေၸတ်းႁဵတ်းၼႂ်းဝၼ်းတီႈ 8/11/2020 တူၵ်းမႅၼ်ႈ ဝၼ်းတိတ်ႉ လိူၼ် 11 လွင်ႈ ပႅတ်ႇ ၶမ်ႈ ၼႆ။