ပၢင်ၵုမ်လူင်ပၢင်လူင် ပီႁူဝ်ပၢၵ်ႇ 21 ဝၼ်းလိုၼ်းသုတ်း မိူဝ်ႈၼႆႉ လၢႆၾၢႆႇ လၢႆပႃႈ တူဝ်တႅၼ်း ၸိူဝ်းၶိုၼ်ႈ ႁွတ်ႈ ႁူမ်ႈလူင်းလၢႆးမိုဝ်း တမ်းပိူင်တၢင်း ၵေႃႇတင်ႈ မိူင်းႁူမ်ႈတုမ်ၻီႊမူဝ်ႊၶရေႊသီႊၾႅတ်ႊၻရႄႊ။
မိူဝ်ႈၼႆႉ 21/08/2020 ပၢင်ၵုမ်လူင်လွင်ႈငမ်းယဵၼ် မိူင်းႁူမ်ႈတုမ် (UPC) ပွၵ်ႈၵမ်းထူၼ်ႈ 5 ၊ ဢမ်ႇၼၼ် ပၢင်ၵုမ်လူင်ပၢင်လူင် ပီႁူဝ်ပၢၵ်ႇ 21 ပွၵ်ႈၵမ်းထူၼ်ႈ 4 ဢၼ်တႄႇၸတ်း မႃးမိူဝ်ႈဝၼ်းတီႈ 19-21/08/2020 ၶၢဝ်းတၢင်း 3 ဝၼ်း ၼႆႉ တူဝ်တႅၼ်း လူင်ပွင်ၸိုင်ႈမၢၼ်ႈ၊ သိုၵ်းမၢၼ်ႈ၊ ၸုမ်းယိပ်းၵွင်ႈၵၢင်ႇ 10 ၸုမ်း (ၸုမ်းလူင်းလၢႆးမိုဝ်း NCA ) ၊ ပႃႇတီႇ ၵၢၼ်မိူင်း ၸိူဝ်းၼႆႉ လႆႈၸႂ်ၵၼ်လူင်းလၢႆးမိုဝ်း တွၼ်ႈၵၼ် 3 ၊ ပိူင်လူင်မၼ်း – 1.ၵၢၼ်ၽေႃႇၼမ်ႉၼႄတူဝ် NCA ။ 2. ၵၢၼ်ၵေႃႇတင်ႈ မိူင်းႁူမ်ႈတုမ်ၻီႊမူဝ်ႊၶရေႊသီႊ ၾႅတ်ႊၻရႄႊ။ 3.မူႇပိူင်ၾႅတ်ႊၻရႄႊ – ၼႆယဝ်ႉ။
ၸၢႆးလႅင်း ၽူႈၶဝ်ႈၸုမ်းဢွၼ်ႁူဝ် ၵေႃပွင်သၢင်ႈလွင်ႈငမ်းယဵၼ် RCSS လၢတ်ႈဝႃႈ- “ဢၼ်ႁဝ်းဢုပ်ႇဢူဝ်း ၵၼ်မႃး လွင်ႈၵေႃႇတင်ႈမိူင်း ၾႅတ်ႊၻရႄႊသေ မီးပၼ်ႁႃမႃးၼၼ်ႉ တေႃႈလဵဝ်ၼႆႉ ၸိုင်ႈမိူင်း ၾႅတ်ႊၻ ရႄႊ ဢၼ်ႁဝ်းၶႂ်ႈလႆႈၶႂ်ႈပဵၼ်မိူဝ်းၼႃႈၼႆႉ မၼ်းတေပဵၼ်ၸိူင်ႉႁိုဝ်ၼႆ မၼ်းဢွၵ်ႇၾၢင်ႁၢင်ႈ မၼ်းမႃးၽွင်ႈ ယဝ်ႉ၊ မိူဝ်းၼႃႈမႃးမၼ်းတေဢုပ်ႇၵၼ်ငၢႆႈလူမ်လိူဝ်။ ဢၼ်တၢင်းႁဝ်းတၢင်ႇၵႂႃႇမီး 8 ၶေႃႈ၊ မိူဝ်ႈလဵဝ်ၼႆႉ လႆႈၸႂ်ၵၼ်ၵႂႃႇမီးယူႇ 5 ၶေႃႈ။ ၼႂ်း 5 ၶေႃႈၼၼ်ႉ ဢၼ်လမ်ႇလွင်ႈလိူဝ်ပိူၼ်ႈၼႆႉ ပဵၼ်လွင်ႈၵေႃႇတင်ႈ မိူင်းႁူမ်ႈတုမ်ၾႅတ်ႊၻရႄႊၼႆႉယဝ်ႉ” ဝႃႈၼႆ။
လိၵ်ႈၵိၼ်ၵႅၼ်ႇၵၼ်ၵမ်းၼႆႉ မီး 3 တွၼ်ႈ – တွၼ်ႈ (1) ၵဵဝ်ႇၵပ်း ၵၢၼ်ၽေႃႇၼမ်ႉၼႄ တူဝ် ၶၵ်ႉၵၢၼ်ၵိုတ်းတိုၵ်းတူဝ်ႈမိူင်း NCA – တင်းမူတ်းမီး 15 ၶေႃႈ ၊ တွၼ်ႈ (2) ၶၵ်ႉၵၢၼ်ႁဵတ်းၵၢၼ် လႄႈ ၵၢၼ်ၽေႃႇၼမ်ႉၼႄတူဝ် ပိူင်ၵေႃႇတင်ႈမိူင်း မိူင်းႁူမ်ႈတုမ် တီႊမူဝ်ႊၶရေႊသီႊ ၾႅတ်ႊတရႄႊ 3 ၶၵ်ႉတွၼ်ႈ – ႁူဝ်ႈယွႆႈၼႃႈ ၵၢၼ် 8 ၶေႃႈ။ တွၼ်ႈ (3) ပိူင်ပိုၼ်ႉၽႅၼ်တၢင်းၵေႃႇတင်ႈမိူင်းႁူမ်ႈတုမ် တီႊမူဝ်ႊၶရေႊသီႊ ၾႅၻ်ႊတရႄႊ သမ်ႉ တင်းမူတ်းမီး 5 ၶေႃႈ။
ၵဵဝ်ႇၵပ်းလွင်ႈၼႆႉသေ ၸၢႆးလႅင်း သိုပ်ႇလၢတ်ႈထႅင်ႈဝႃႈ – “လွင်ႈဢွၵ်ႇၾၢင်ႁၢင်ႈမိူင်းၾႅတ်ႊၻရႄႊ ၼႆၼႆႉ ဢႃႇၼႃႇၸိုင်ႈမိူင်းႁူမ်ႈတုမ်လႄႈဢႃႇၼႃႇၸႄႈမိူင်းၼႆႉ တေၸႅၵ်ႇၽႄၵၼ်၊ ၵူၺ်းၵႃႈ ႁူဝ်ယွႆႈမၼ်းတႄႉ တေၸႅၵ်ႇၽႄၸိူင်ႉႁိုဝ် ဢၼ်လႂ်ထႅင်ႈၸိူဝ်းၼႆႉ ယင်းလူဝ်ႇဢုပ်ႇၵၼ်ထႅင်ႈမိူဝ်းၼႃႈယူႇ။ တေႃႈလဵဝ်ၼႆႉ တႃႇတေၵေႃႇတင်ႈမိူင်း ၾႅတ်ႊၻရႄႊၼႆႉ ၽၵ်းတူမၼ်းပိုတ်ႇယဝ်ႉ ၼႆၵေႃႈၸၢင်ႈဝႃႈလႆႈ။ ၵူၺ်းၵႃႈ တေပဵၼ်ၸိူင်ႉႁိုဝ်ၵႂႃႇၼၼ်ႉ ယူႇတီႈၵၢၼ် သဵတ်ႈၵႃႈသဵတ်ႈႁူဝ်ၵၼ်ၵႂႃႇမိူဝ်းၼႃႈ”- ဝႃႈၼႆ။
ပိူင်ၵေႃႇတင်ႈမိူင်းႁူမ်ႈတုမ် ၻီႊမူဝ်ႊၶရေႊသီႊၾႅၻ်ႊတရႄႊ 5 ၶေႃႈ ၼၼ်ႉတႄႉ – တႃႇႁူမ်ႈၵေႃႇတင်ႈ မိူင်း ႁူမ်ႈတုမ်တီႊမူဝ်ႊၶရေႊသီႊၾႅတ်ႊၻရႄႊ Union Accord ၊ တႃႇၵႄႈပၼ်ႁႃ ဝူင်ႈၵၢင်ၸႄႈမိူင်းလႄႈ တိူင်းၼၼ်ႉ တၵ်းလႆႈမီး ပိူင်ပိုင်းလၵ်းမိူင်းႁင်းၶေႃ Union Accord ၊ ၵဵဝ်ႇၵပ်းဢႃႇၼႃႇၸိၵ်းၸွမ်လူင် 3 ပိူင် – ၶဵၼ်ႇတႅမ်ႈမၢႆမီႈ၊ တႅပ်းတတ်းတြႃး၊ ၵၢၼ်ၽွင်းငမ်း ၸဵမ်ၸိူဝ်းၼႆႉသေ ဢမ်ႇၵႃး တႃႇၸႄႈမိူင်းလႄႈတိူင်း မီးဢႃႇၼႃႇၽဵင်ႇပဵင်းၵၼ် လႄႈ တႃႇၸႅၵ်ႇဝၢၵ်ႈ ၸႂ်ႉတိုဝ်း ၶူဝ်းႁႄႈၶူဝ်းတိုၼ်း၊ တႃႇပႂ်ႉပႃးၽႃသႃလိၵ်ႈလၢႆး ၵႂၢမ်း လၢတ်ႈၸၢဝ်းၶိူဝ်း ၸိူဝ်းၼႆႉ။
ပၢင်ၵုမ်လူင်ငမ်းယဵၼ် ၵမ်းတီႈ 1 ၸွမ်ၸိုင်ႈတဵင်းၸဵင်ႇဢွၼ်ႁူဝ်ၸတ်းႁဵတ်း မိူဝ်ႈပီ 2016 ႁူဝ်ပီ ၊ ပၢင်ၵုမ်ပၢင်လူင်ပီႁူဝ်ပၢၵ်ႇ 21 ၵမ်းတီႈ 1 လူင်ပွင်ၸိုင်ႈၼူၵ်ႉယုင်း ဢွၼ်ႁူဝ်ၸတ်းႁဵတ်း မိူဝ်ႈႁၢင်ပီ 2016 ၊ ၵမ်းသွင် ၸတ်းႁဵတ်းမိူဝ်ႈပီ 2017 ၊ ၵမ်းသၢမ် ၸတ်းႁဵတ်းမိူဝ်ႈပီ 2018 သေ ဢၼ်ၸတ်းႁဵတ်း ၵမ်းၼႆႉ ပဵၼ် ၵမ်းထူၼ်ႈ 4 ။
