ပႃႇတီႇမႂ်ႇသုင်ၸိုင်ႈတႆး တပ်ႉသိုၵ်းၸိုင်ႈတႆး SSPP/SSA တင်း ၸိူဝ်းပဵၼ် လုၵ်ႈၸုမ်း FPNCC ဢၼ်ဝႃႉ UWSA ဢွၼ် ႁူဝ်တင်းမူတ်း ၸတ်းႁဵတ်းပၢင်ၵုမ်ၵၼ်သေ တႅပ်းတတ်း ဝႃႈ တေဢမ်ႇၵႂႃႇၶဝ်ႈႁူမ်ႈ ပၢင်ၵုမ်လူင် ပၢင်လူင် ပီႁူဝ်ပၢၵ်ႇ 21 ပွၵ်ႈၵမ်း 4 ဢၼ်တေၸတ်းႁဵတ်း တီႈၼေႇပျီႇတေႃႇ ၼႂ်းဝူင်ႈတေမႃးၼႆႉ။

ဝၼ်းတီႈ 13/8/2020 ၼႆႉ တူဝ်တႅၼ်း ၸုမ်းဢူၺ်းလီ ပွတ်းႁွင်ႇ 7 ၸုမ်း မိူၼ်ၼင်ႇ တပ်ႉသိုၵ်းဝႃႉ UWSA၊ မိူင်းလႃး NDAA ၊ ၵူဝ်းၵၢင်ႉ MNDAA ၊ ဝၢၼ်ႈႁႆး SSPP၊ ၶၢင် KIA ၊ တဢၢင်း TNLAလႄႈ ရၶႅင်ႇ AA ၸိူဝ်းၼႆႉ ၸတ်းႁဵတ်းပၢင်ၵုမ်ၵၼ် တီႈဝဵင်းပၢင်သၢင်း (ပၢင်ၶမ်း) ၊ လႆႈၸႂ်တႅပ်းတတ်းဝႃႈ တေဢမ်ႇၵႂႃႇၶဝ်ႈႁူမ်ႈပၢင်ၵုမ်လူင် ပၢင်လူင် ပီႁူဝ်ပၢၵ်ႇ 21 ပွၵ်ႈၵမ်း 4 ဢၼ်တေၸတ်း ႁဵတ်း ၼႂ်းႁၢင်လိူၼ်ၼႆႉ။  

ၸဝ်ႈႁၢၼ် တၢၼ်းဢွင်ႇ ၽူႈၶၢၼ်ပၢၵ်ႇ SSPP လၢတ်ႈဝႃႈ – “ယူႇတီႈႁဝ်းၶႃႈ ၸုမ်း FPNCC  တႅပ်းတတ်း ဢမ်ႇၵႂႃႇၶဝ်ႈ ႁူမ်ႈပၢင်ၵုမ်ၼႆႉ (1) ယွၼ်ႉတၢင်းပဵၼ် ၶူဝ်ႊဝိတ်ႉ 19 ၊ (2) ယွၼ်ႉဢမ်ႇမွၵ်ႇၵူႈမူႇၵူႈၸုမ်း။ ဢိင်ၼိူဝ် တၢင်းပဵၼ်ၵႃႇလၵူၼ်း ၶူဝ်ႊ ဝိတ်ႉၼႆႉ ယႃႇႁႂ်ႈၶွၼ်ႈတုမ်ၵၼ် ၵူၼ်းၼမ် ၵူၼ်းလၢႆ။ ၵူၼ်းၸိူဝ်း မႃးၶိုၼ်ႈပၢင်ၵုမ် မီးဢမ်ႇမီးတၢင်းပဵၼ် ဢမ်ႇၸၢင်ႈ လၢမ်းလႆႈ။ လိူဝ်ၼၼ်ႉ လူင်ပွင်ၸိုင်ႈၵေႃႈ သမ်ႉဢမ်ႇမွၵ်ႇၵူႈမူႇၵူႈၸုမ်းသေ ပိူင်လူင်မၼ်းတႄႉ ၸုမ်းဢူၺ်းလီႁဝ်းၶႃႈ မႆႈၸႂ် လွင်ႈတၢင်းပဵၼ် ၼၼ်ႉၵူၺ်းၶႃႈ” – ဝႃႈၼႆ။

သင်ဝႃႈ ၸုမ်းဢူၺ်းလီ ပွတ်းႁွင်ႇ 7 ၸုမ်း FPNCC ၵႂႃႇၶဝ်ႈႁူမ်ႈပၢင်ၵုမ်ၼႆ ပေႃးဢဝ်ပိူင်တၢင်းၵၢၼ်ဝႃႈတႄႉ တေလႆႈပဵၼ် ၸုမ်း ၵႂႃႇလဵပ်ႈႁႅၼ်းၵူၺ်း ဢမ်ႇမီးသုၼ်ႇတႃႇဢုပ်ႇလၢတ်ႈသင် ၼႂ်းပၢင်ၵုမ်လူင် ပၢင်လူင် ပီႁူဝ်ပၢၵ်ႇ 21 ၼၼ်ႉ ဝႃႈၼႆ။

ၸဝ်ႈၶိုၼ်းသႂ် ၸႂ်ယဵၼ် တီႈၵိူဝ်းၵုမ် RCSS ဢၼ်ဢွၵ်ႇၶၢဝ်းတၢင်းၵႂႃႇၸွမ်း ၸွမ်သိုၵ်းလူင်ယွတ်ႈသိုၵ်းသေ မီးဝႆႉတီႈၼေႇ ပျီႇတေႃႇၼၼ်ႉ လၢတ်ႈဝႃႈ – “ ပေႃးဝႃႈ ၶဝ်ၸဝ်ႈမႃးၼႆတႄႉ ပေႃး ဢဝ်တၢင်းၵၢၼ်ဝႃႈ ပဵၼ်ၽူႈလဵပ်ႈႁဵၼ်းၵူၺ်း ။ ၶဝ်ၸဝ်ႈ ဢမ်ႇမီးသုၼ်ႇလႆႈလၢတ်ႈၸႃ ဢုပ်ႇဢူဝ်းသင်ၼင်ႇၵဝ်ႇ။ ၵူၺ်းၵႃႈ -ပေႃးၶဝ်မႃးတႄႉ ႁဝ်းၸၢင်ႈလႆႈႁူပ်ႉထူပ်းၵၼ် ၼွၵ်ႈလႅၵ်ႈမၼ်း၊  ၸၢင်ႈသၢင်ႈလႆႈ လွင်ႈယုမ်ႇယမ်ၸမ်ၸႂ်ၵၼ်။ ဢၼ်ႁဝ်းဢမ်ႇႁူႉ ႁဝ်းၸၢင်ႈထၢမ်ၶဝ်၊ ဢၼ်ၶဝ်ၶႂ်ႈႁူႉ ၶဝ်ႈၸၢင်ႈထၢမ်ႁဝ်း” – ဝႃႈၼႆ။

ၸုမ်းဢူၺ်းလီ ပွတ်းႁွင်ႇမီး 7 ၸုမ်း၊ လူင်ပွင်ၸိုင်ႈၼေႇပျီႇတေႃႇ  ယိုၼ်ႈလိၵ်ႈမွၵ်ႇထိုင်သမ်ႉ မီး 6 ၸုမ်း။ ၸုမ်းသိုၵ်းရၶႅင်ႇ AA သမ်ႉ ၺႃးၼႄးပဵၼ်ၸုမ်းၵေႃႇၵၢၼ်ႁၢႆႉလႄႈ  ဢမ်ႇမွၵ်ႇပႃးသေ ဢမ်ႇၵႃး ႁႅၼ်းသိုၵ်းလေႃႇတိုၵ်းၵၼ်ယူႇၵူႈဝၼ်း။

ဝၢႆးလင်ပၢင်ၵုမ်ယဝ်ႉ FPNCC ဢွၵ်ႇလိၵ်ႈပိုၼ်ၽၢဝ်ႇ ပႃးဝႆႉဝႃႈ – ၶၢဝ်းဢၼ်လူင်ပွင်ၸိုင်ႈ ၸတ်းပၢင်ၵုမ်လူင်ပီႁူဝ်ပၢၵ်ႇ 21 ပၢင်လူင်ၼႆႉ ပဵၼ်ၶၢဝ်းတၢင်းပဵၼ်ၶူဝ်ႊဝိတ်ႉ 19 ၽႄႈလၢမ်း၊ ယူႇတီႈၸၢဝ်းၶိူဝ်းမိူင်းသၼ်လွႆသမ်ႉ မီးလွင်ႈယၢပ်ႇၽိုတ်ႇၾၢႆႇယူတ်းယႃတၢင်းပဵၼ်၊ ၶိူင်ႈၵူတ်ႇထတ်း ယူတ်းယႃဢမ်ႇတဵမ်ထူၼ်ႈ၊  ပိူင်လူင် ၶၢဝ်းတၢင်း လွင်ႈၵႂႃႇမႃး ယၢပ်ႇၽိုတ်ႇလႄႈ ၸင်ႇလႆႈတႅပ်းတတ်း ဝႃႈဢမ်ႇၶဝ်ႈႁူမ်ႈဝႃႈၼႆ။

ၽူႈလဵပ်ႈႁဵၼ်းထတ်းသၢင်ၵၢၼ်မိူင်းၼႂ်းၸိုင်ႈတႆး တေႉဢုပ်ႇဢူဝ်းထတ်းသၢင်ဝႃႈ ဢၼ်ၸုမ်းဢူၺ်းလီပွတ်းႁွင်ႇ ဢမ်ႇၶဝ်ႈႁူမ်ႈပၢင်ၵုမ်ၼႆႉ တူဝ်တႅၼ်းမိူင်းၶႄႇ မိတ်ႉသတိူဝ်ႊ သုၼ်းၵေႃႇသႅင်း ဢမ်ႇမႃးၶဝ်ႈႁူမ်ႈၸွမ်းလႄႈ တွၼ်ႈတႃႇ ၸုမ်း ဢူၺ်းလီပွတ်းႁွင်ႇ ဢမ်ႇမီးလွင်ႈႁပ်ႉႁွင်းၵၢၼ်ႁူမ်ႇလူမ်ႈၽူႈၼမ်းၸိူဝ်းတေ ၵႂႃႇၶဝ်ႈႁူမ်ႈပၢင်ၵုမ်တီႈၼေႇပျီႇတေႃႇ ဝႃႈၼႆ။

ပၢင်ၵုမ်လူင် ပၢင်လူင် ပီႁူဝ်ပၢၵ်ႇ 21 ၵမ်းထူၼ်ႈ 4 ၼႆႉ တေၸတ်းႁဵတ်းတီႈၼေႇပျီႇတေႃႉ ၼႂ်းဝၼ်းတီႈ 19-21/8/2020 ဝႃႈ ၼႆ။ ဢၼ်တေၶိုၼ်ႈပၢင်ၵုမ်လူင်ငမ်းယဵၼ်မိူင်းႁူမ်ႈတုမ် ႁိုဝ် ပၢင်ၵုမ်လူင်ပၢင်လူင် ပီႁူဝ်ပၢၵ်ႇ 21 ၼႆႉ ၽူႈၼမ်း ၸုမ်းယိပ်းၵွင်ႈၵၢင်ႇၵိုတ်းတိုၵ်း တူဝ်ႈမိူင်း 10 ၸုမ်း ပႃႇၸဵမ် ႁူဝ်ပဝ်ႈလူင်ၶွင်ႇသီႇဢဝ်ၶိုၼ်းၸိုင်ႈတႆး တပ်ႉသိုၵ်းၸိုင်ႈတႆး RCSS/SSA ၸွမ်သိုၵ်းလူင် ယွတ်ႈသိုၵ်းၵေႃႈ ႁွတ်ႈၼေႇပျီႇတေႃႇဝႆႉသေ ႁၢင်ႈႁႅၼ်းတေၶိုၼ်ႈႁူမ်ႈပၢင်ၵုမ်လူင်ၼႆႉ။