ၸွမ်သိုၵ်းလူင်ယွတ်ႈသိုၵ်း ႁွတ်ႈၼေႇပျီႇတေႃႇ မီးၽႅၼ်ႁူပ်ႉၽူႈၼမ်း လၢႆမူႇလၢႆၸုမ်း

ၸွမ်သိုၵ်းလူင်ယွတ်ႈသိုၵ်း ႁူဝ်ပဝ်ႈလူင် RCSS ဢွၵ်ႇၶၢဝ်းတၢင်း ႁွတ်ႈထိုင်ၼေႇပျီႇတေႃႇ ယဝ်ႉသေ ၵွၼ်ႇၼႃႈ ပၢင်ၵုမ်လူင်လွင်ႈငမ်းယဵၼ် UPC ၼႆႉ မီးၽႅၼ် ဢၢၼ်းႁူပ်ႉထူပ်း ဢုပ်ႇဢူဝ်း ၽူႈၼမ်းလူင်ပွင်ၸိုင်ႈ ဢိၵ်ႇ ပႃႇတီႇၵၢၼ်မိူင်း။

ဝၼ်းတီႈ 09/08/2020 ၸွမ်သိုၵ်းလူင်ယွတ်ႈသိုၵ်း ႁူဝ်ပဝ်ႈ ၶွင်ႇသီႇဢဝ်ၶိုၼ်းၸိုင်ႈတႆး (RCSS/SSA) ဢၼ်ႁပ်ႉတၼ်းႁဵင်းဝႆႉ ပဵၼ်ပႃးႁူဝ်ၼႃႈ ၸုမ်းဢွၼ်ႁူဝ်ၼႃႈၵၢၼ်ငမ်းယဵၼ် (PPST) ၸူဝ်ႈၶၢဝ်း၊  ဢွၼ်ႁူဝ်ၼမ်းၼႃႈၸုမ်းတူဝ်တႅၼ်း RCSS သေ လုၵ်ႉလွႆတႆးလႅင်း ဢွၵ်ႇၶၢဝ်းတၢင်းၵႂႃႇ ႁွတ်ႈထိုင် ၼေႇပျီႇတေႃႇယဝ်ႉ-ဝႃႈၼႆ။

ၵဵဝ်ႇၵပ်းလွင်ႈ ၶၢဝ်းတၢင်းၸဝ်ႈယွတ်ႈသိုၵ်း ပွၵ်ႈၵမ်းၼႆႉ မိူဝ်ႈဝၼ်းတီႈ 08/08/2020 ယူႇတီႈ ၵေႃၵမ်ၵၢၼ် ပွင်ႈၵၢၼ်လူင် ၶွင်ႇသီႇဢဝ်ၶိုၼ်းၸိုင်ႈတႆး (RCSS) ဢွၵ်ႇလိၵ်ႈပိုၼ်ၽၢဝ်ႇဝႆႉဝႃႈ- ၸွမ်သိုၵ်းလူင် ယွတ်ႈသိုၵ်း ႁူဝ်ပဝ်ႈလူင် RCSS  တေၶိုၼ်ႈႁွတ်ႈၶဝ်ႈႁူမ်ႈ ပၢင်ၵုမ် ၵၢၼ်ပွင်သၢင်ႈ ၼႄၼမ်ႉၼႄတူဝ် ၶေႃႈတူၵ်းလူင်းၵၢၼ်ၵိုတ်းယိုဝ်းၸိုင်ႈမိူင်းပတ်းပိုၼ်ႉ (JICM) လႄႈ ပၢင်ၵုမ်လူင် ပၢင်လူင် ႁူဝ်ပၢၵ်ႇပီ 21 ပွၵ်ႈၵမ်း 4 ဢၼ်တေၸတ်းႁဵတ်း တီႈၼေႇပျီႇတေႃႇ (ၼႂ်းဝူင်ႈတီႈ 4 ၼႆႉ) ၼႆယဝ်ႉ။

လိူဝ်သေၼၼ်ႉ မိူဝ်ႈၽွင်းၽႅဝ်ဝႆႉယူႇတီႈၼေႇပျီႇတေႃႇၼၼ်ႉ မၼ်းၸဝ်ႈ တေႁူပ်ႉဢုပ်ႇဢုပ်ႇဢူဝ်းငူပ်ႉငီႉ လွင်ႈၶၵ်ႉၵၢၼ်ငမ်းယဵၼ် တီႈ ၽူႈၼမ်းလူင်ပွင်ၸိုင်ႈ၊ ၽူႈဢွၼ်ႁူဝ် ပႃႇတီႇၵၢၼ်မိူင်းလႄႈ ၽူႈမီးပုၼ်ႈၽွၼ်း ထႅင်ႈလၢႆၵေႃႉလၢႆၸဝ်ႈ ၼင်ႇႁိုဝ် ပေႃးတေၸတ်းႁဵတ်းလႆႈ ပၢင်ၵုမ်လူင် ပၢင်လူင် ပီႁူဝ်ပၢၵ်ႇ 21 ပွၵ်ႈၵမ်းထူၼ်ႈ 4 ။ ယူႇတီႈ RCSS ယုမ်ႇယမ်ဝႃႈ တေပဵၼ်ၽွၼ်းလီ တႃႇၵေႃႇသၢင်ႈ လွင်ႈယုမ်ႇယမ်တေႃႇၵၼ် လႄႈ ၶၵ်ႉၵၢၼ်ငမ်းယဵၼ် ၶိုပ်ႈၼႃႈၵႂႃႇလႆႈလီ တေႃႇပေႃးထိုင် ၵေႃႇတင်ႈလႆႈ မိူင်းႁူမ်ႈတုမ် ၾႅတ်ႊၻရႄႊ ဢၼ်မၼ်ႈၵိုမ်းယိုၼ်းယၢဝ်း ၼႆယဝ်ႉ။

ၸဝ်ႈႁၢၼ်ၶမ်းၸၢမ်ႇ ၽူႈၶၢၼ်ပၢၵ်ႇ RCSS/SSA လၢတ်ႈတီႈ ၽူႈတွႆႇႁွၵ်ႈ ဝႃႈ- “ဝၼ်းတီႈ 10-11 မိူဝ်ႈၼႆႉ တင်းမိူဝ်ႈၽုၵ်ႈ ပဵၼ်ပၢင်ၵုမ် ႁၢင်ႈႁႅၼ်း JICM ၵူၺ်း၊ ပဵၼ်ပၢင်ၵုမ်သွင်ၾၢႆႇ ၸုမ်းၸၢဝ်းၶိူဝ်းယိပ်းၵွင်ႈၵၢင်ႇ EAOs-S တင်းလူင်ပွင်ၸိုင်ႈ သွင်ၾၢႆႇႁူပ်ႉထူပ်း ဢုပ်ႇဢူဝ်းၵၼ်။ ပၢင်ၵုမ် JICM တႄႉတႄႉ ပဵၼ်တၢင်းၵၢၼ် ပဵၼ်ဝၼ်းတီႈ 13 ၶႃႈဢေႃႈ” ဝႃႈၼႆ။

ၸွမ်းၼင်ႇၶၵ်ႉၵၢၼ်ငမ်းယဵၼ် ပိူဝ်ႈတႃႇပဵၼ်မႃး ပၢင်ၵုမ်လူင် လွင်ႈငမ်းယဵၼ်မိူင်းႁူမ်ႈတုမ် (UPC) ပွၵ်ႈၵမ်း 5 ႁိုဝ် ပၢင်ၵုမ်လူင် ပၢင်လူင် ပီႁူဝ်ပၢၵ်ႇ 21 ပွၵ်ႈၵမ်းထူၼ်ႈ 4 ၼႆႉ ပိူင်လူင်မၼ်း ဢိင်ၼိူဝ် JICM ၊ ဢဝ်ၶေႃႈတႅပ်းတတ်း တီႈ JICM သေပဵၼ်မႃး။

ၽူႈၶၢၼ်ပၢၵ်ႇ RCSS သိုပ်ႇလၢတ်ႈဝႃႈ “ဝၼ်းတီႈ 13 ပၢင်ၵုမ် JICM ပဵၼ်တၢင်းၵၢၼ်။ ပေႃးၼၼ်ႉယဝ်ႉ ဝၼ်းတီႈ 14 တေပဵၼ်ပၢင်ၵုမ် UPDJC ၾၢႆႇၵၢၼ်မိူင်း၊ ၼႂ်းၸုမ်းၽႂ်မၼ်း ၵိပ်ႇၽႂ်မၼ်း မိူၼ်ၼင်ႇ ၾၢႆႇ EAOs-S ၵေႃႈ EAOs-S ၊ ၾၢႆႇလူင်ပွင်ၸိုင်ႈၵေႃႈ လူင်ပွင်ၸိုင်ႈ၊ ၾၢႆႇပႃႇတီႇၵၢၼ်မိူင်းၵေႃႈ ပႃႇတီႇၵၢၼ်မိူင်း ၸိူဝ်းၼႆႉဢုပ်ႇဢူဝ်းၵၼ်ႁင်းၵူၺ်းၽႂ်မၼ်း။ ဝၼ်းတီႈ 15 တေပဵၼ်ပၢင်ၵုမ်ၸုမ်းၽူႈၼမ်းၼႂ်း UPDJC ၊ ၽူႈၼမ်းၼႂ်း ၸုမ်းလႂ်ၸုမ်းၼၼ်ႉ မႃးလၢတ်ႈတီႈ UPDJC ။ ပေႃးၼၼ်ႉယဝ်ႉ ဝၼ်းတီႈ 17 ဢၢၼ်း ၸတ်းပၢင်ၵုမ် UPDJC ၸေးၸုမ်ႇသေ ထိုင်မႃးဝၼ်းတီႈ 19-21/08/2020 ၸင်ႇၸတ်းပၢင်ၵုမ်လူင် UPC” ၼႆယဝ်ႉ။

UPDJC ၼႆႉ ၸွမ်းၼင်ႇပိူင်ၶွတ်ႇၽွတ်ႈမီး 5 ၵိပ်ႇ/ၸုမ်း၊ ၾၢႆႇလူင်ပွင်ၸိုင်ႈ၊ ၾၢႆႇသိုၵ်း၊ ၾၢႆႇသၽႃး၊ ပႃႇတီႇၵၢၼ်မိူင်း ဢိၵ်ႇ ၾၢႆႇ ၸၢဝ်းၶိူဝ်း EAOs-S ၸိူဝ်းလူင်းလၢႆးမိုဝ်ႈ လိၵ်ႈႁူမ်ႈမၢႆၵိုတ်းယိုဝ်ႈတူဝ်ႈမိူင်း NCA ဝႆႉ ၸိူဝ်းၼႆႉ။

ၶွင်ႇသီႇဢဝ်ၶိုၼ်းၸိုင်ႈတႆး/တပ်ႉသိုၵ်းၸိုင်ႈတႆး(RCSS/SSA)ၼႆႉ ပဵၼ်ၸုမ်းဢၼ်လူင်းလၢႆးမိုဝ်း ၵိုတ်း တိုၵ်း ပတ်းပိုၼ်ႉတူဝ်ႈမိူင်း NCA ဝႆႉၸုမ်းၼိုင်ႈ ။ ၼႂ်းၸုမ်းလူင်းလၢႆးမိုဝ်းလိၵ်ႈႁူမ်ႈမၢႆၵိုတ်း တိုၵ်းပတ်း ပိုၼ်ႉတူဝ်ႈမိူင်း NCA သိပ်းၸုမ်းၼႆႉ RCSS ႁပ်ႉတၼ်းႁဵင်း ပဵၼ်ႁူဝ်ပဝ်ႈ ၸုမ်းၽူႈၼမ်း PPST ဝႆႉ။