ပၢင်ၵုမ်လူင် ပၢင်လူင် ပီႁူဝ်ပၢၵ်ႇ 21 ပွၵ်ႈၵမ်း 4 ဢၼ်တေၸတ်းႁဵတ်း ၼႂ်းလုၵ်ႈလိူၼ်ဢေႃႊၵတ်ႉသ်ၼႆႉ ပေႃး လူင်ပွင်ၸိုင်ႈမၢၼ်ႈၼေႇပျီႇတေႃႇ ဢမ်ႇမွၵ်ႇလုၵ်ႈၸုမ်း FPNCC တင်းမူတ်း ယူႇတီႈ SSPP ၵေႃႈ “တေဢမ်ႇၸၢင်ႈ ၶဝ်ႈႁူမ်ႈၸွမ်း”  – ဝႃႈၼႆ။

တင်ႈတႄႇ ႁၢင်လိူၼ်ၵျူႊလၢႆႊမႃး တေႃႇယၢမ်းလဵဝ် တူဝ်တႅၼ်း ၸုမ်းၵိုတ်းတိုၵ်း 10 ၸုမ်း၊ တူဝ်တႅၼ်း လူင်ပွင်ၸိုင်ႈမၢၼ်ႈ တူဝ်တႅၼ်းသိုၵ်းမၢၼ်ႈ ႁဵတ်းပၢင်ၵုမ်ၵၼ် ႁၢင်ႈႁႅၼ်းတႃႇႁဵတ်းပၢင်ၵုမ်လူင် ပၢင်လူင် ပီႁူဝ်ပၢၵ်ႇ 21 ၵမ်းထူၼ်ႈ 4 တီႈၼေႇ ပျီႇတေႃႇ။ ပၢင်ၵုမ်ၼႆႉ ယူႇတီႈ ၸုမ်းယိပ်းၵွင်ႈၵၢင်ႇၵိုတ်းတိုၵ်း 10 ၸုမ်း ၵေႃႈ တုၵ်းယွၼ်း ႁႂ်ႈ ၸုမ်းၸိူဝ်းပႆႇလူင်းလၢႆးမိုဝ်း NCA လႆႈတိုဝ်ႉတၢင်း ၶဝ်ႈႁူမ်ႈၸွမ်း။ ၵူၺ်းၵႃႈ တေႃႇထိုင်ဝၼ်းမိူဝ်ႈၼႆႉ လူင်ပွင်ၸိုင်ႈၼေႇပျီႇတေႃႇ ယင်းပႆႇမွၵ်ႇၸုမ်း FPNCC ၶွမ်ႊမတီႇဢုပ်ႇဢူဝ်းလွင်ႈငမ်းယဵၼ်မိူင်းႁူမ်ႈတုမ် ဢၼ် ဝႃႉ UWSA ဢွၼ်ႁူဝ်။

ၸဝ်ႈႁၢၼ် တၢၼ်းဢွင်ႇ ၽူႈၶၢၼ်ပၢၵ်ႇ SSPP လၢတ်ႈတီႈၽူႈတွႆႇႁွၵ်ႈဝႃႈ – “ပၢင်ၵုမ် 21 ပွၵ်ႈၵမ်း 4 တေမႃးၼႆႉ ယူႇတီႈ SSPP ႁဝ်းၶႃႈ ႁႂ်ႈပေႃးၸၢင်ႈမုင်ႈမွင်းဢၼ်ယႂ်ႇဢၼ်လူင်ၸိူင်ႉၼၼ် ၸိူင်ႉၼႆတႄႉ ဢမ်ႇၸၢင်ႈမုင်ႈမွင်းၸိူင်ႉႁိုဝ်ၶႃႈ — တႃႇ ၶိုၼ်ႈဢမ်ႇၶိုၼ်ႈၼၼ်ႉတေႉ သင်ၸိူဝ်ႉဝႃႈ လူင်ပွင်ၸိုင်ႈမွၵ်ႇမႃးၼႆ ႁဝ်းၶႃႈ တေထွမ်ႇတူၺ်းတီႈ FPNCC ၵွၼ်ႇ။ ပေႃးဝႃႈ FPNCC ႁူမ်ႈၵၼ်ၶိုၼ်ႈတင်း မူတ်းၼႆ ႁဝ်းၶႃႈၵေႃႈ တေၶိုၼ်ႈၸွမ်း ၸုမ်း FPNCC ၵွပ်ႈပိူဝ်ႈဝႃႈ ၸုမ်းႁဝ်းၶႃႈၼႆႉ ၶဝ်ႈပႃး ၼႂ်းတပ်ႉၽွမ်ႉႁူမ်ႈ FPNCC  ဝႆႉလႄႈ ၵၢၼ်မိူင်းၸိူဝ်းၼႆႉ ႁဝ်းၶႃႈ တေလႆႈဢဝ် FPNCC ဝႃႈ” –  ဝႃႈၼႆ။

ၸွမ်းၼင်ႇၵၢၼ်ဢုပ်ႇဢူဝ်းၵၼ်သေ ပၢင်ၵုမ်လူင်ပၢင်လူင်ပီႁူဝ်ပၢၵ်ႇ 21 ၼႆႉ ဢၢၼ်းၸတ်းႁဵတ်းၵၢင်လိူၼ်ဢေႃးၵသ်ႉၼႆႉ၊ ၵူၺ်းၵႃႈ ၵၢၼ်ႁၢင်ႈႁႅၼ်း၊ ၵၢၼ်ဢုပ်ႇဢူဝ်း ႁႃၶေႃႈတေဢုပ်ႇဢူဝ်း တႃႇတေတတ်း ၼႃႈၵၢၼ် တၢင်းၼႃႈ ဢမ်ႇထိုင်တီႈ လႄႈ လႆႈၶၢႆႉဝၼ်းၵႂႃႇ ဝၼ်းတီႈ 19 – 21/8/2020 ၼႆႉဝႆႉ။

ၸၢႆးႁၢၼ်ႇ ႁူဝ်ပဝ်ႈၸုမ်းၵူၼ်းၼုမ်ႇတႆးပွတ်းႁွင်ႇ လၢတ်ႈတီႈၽူႈတွႆႇႁွၵ်ႈဝႃႈ – “ ယူႇတီႈႁဝ်းၶႃႈၵူၼ်းမိူင်းတႄႉ ႁၼ်ထိုင်ဝႃႈ ပၢင်ၵုမ်လူင်ပၢင်လူင် ပီႁူဝ်ပၢၵ်ႇ 21 ပွၵ်ႈၵမ်း 4 တေမႃးၼႆႉ ၶႂ်ႈႁႂ်ႈမီးလွင်ႈသိုဝ်ႈယူဝ်းတေႃႇၵၼ်၊  ႁႂ်ႈမီးၼမ်ႉၸႂ်ဢၼ်ၶႂ်ႈလႆႈ လွင်ႈငမ်းယဵၼ် တႄႉတႄႉတေႃႇၵၼ်”  – ဝႃႈၼႆ။

ၾၢႆႇၼိုင်ႈ ၼႂ်းမိူင်းတႆးပွတ်းႁွင်ႇသမ်ႉ သိုၵ်းလူင်ပွင်ၸိုင်ႈမၢၼ်ႈ တိုၵ်ႉထႅမ်ႁႅင်းသိုၵ်း ယူႇၵူႈၾၢႆႇၵူႈပႃႈလႄႈ ၵူၼ်းမိူင်း ၵေႃႈ မႆႈၸႂ် ၵူဝ်ပဵၼ်ပၢင်တိုၵ်းသိုၵ်းသိူဝ်၊ ၵူဝ် ပၢင်လိူၵ်ႈတင်ႈ ဢၼ်တေၸတ်းႁဵတ်း ႁၢင်ပီ 2020 ၼႆႉ ဢမ်ႇပဵၼ်။ ၵမ်ႈၽွင်ႈ ၵေႃႈ ထတ်းသၢင်ဝႃႈ တႃႇလွၵ်ႇငိုတ်ႈၸုမ်းယိပ်းၵွင်ႈၵၢင်ႇၸၢဝ်းၶိူဝ်း ၽွင်းဢုပ်ႇဢူဝ်း ၼႂ်းပၢင်ၵုမ်လူင်ပၢင်လူင် ပီႁူဝ်ပၢၵ်ႇ 21။

ပၢင်ၵုမ်လူင်ပၢင်လူင် ပီႁူဝ်ပၢၵ်ႇ 21 ၵမ်းထူၼ်ႈ 4 ၼႆႉ ဢၢၼ်းၸတ်းႁဵတ်း ၸဵမ်မိူဝ်ႈ ၼႂ်းပီ 2019 ၊ ဢိင်ၼိူဝ် လွင်ႈၶွင်ႉၶမ် ၵၢၼ်ဢုပ်ႇဢူဝ်းၵၼ်သေ ဢမ်ႇပဵၼ်ၸတ်းႁဵတ်းမႃး ႁၢၼ်ႉတေႃႇထိုင်ဝၼ်းမိူဝ်ႈၼႆႉ။ ၼႂ်းပၢင်ၵုမ်လူင်ပၢင်လူင် ၵမ်းထူၼ်ႈ 3 ၼၼ်ႉၵေႃႈ မီးလွင်ႈၶွင်ႉၶမ်ၵၼ်မႃး လွင်ႈ –  ယွမ်းႁပ်ႉ၊ ဢမ်ႇယွမ်းႁပ်ႉ ပိူင်ၽၢတ်ႇဢွၵ်ႇ/ဢမ်ႇၽၢတ်ႇဢွၵ်ႇ၊ လွင်ႈပိူင်ပူတ်း ၵွင်ႈ/ပိူင်မူၼ်ႉမႄးတပ်ႉသိုၵ်း DDR/SSR  ၵဵဝ်ႇၵပ်းတပ်ႉသိုၵ်းလုၵ်ႈလဵဝ် ၸဵမ်ၸိူဝ်းၼႆႉ။

https://www.rfa.org/burmese/news/21st-century-Panglong-Conference-date-changed-08012020075227.html