တႆးႁွတ်ႈၵဵင်းမႆႇ ၼွၼ်းဢိင်ရူတ်ႉၶိူင်ႈလူႉတၢႆ ယွၼ်ႉတၢင်းပဵၼ် ႁူဝ်ၸႂ်

တႆးႁွတ်ႈၵဵင်းမႆႇ ဢၼ်တၢႆဢိင်ရူတ်ႉၶိူင်ႈ ဝႆႉၼၼ်ႉ မေႃယႃၵူတ်ႇထတ်းတူၺ်း လႆႈႁူႉဝႃႈ တၢႆယွၼ်ႉတၢင်းပဵၼ်မၢၵ်ႇႁူဝ်ၸႂ် ဝႃႈၼႆ။

Photo by – ၸၢႆးတႆးထိူၼ်ႇ/ လုင်းၼၼ်ႇတေႃး ဢႃယု 43 ပီ ဢၼ်လႆႈၼွၼ်းဢိင်ရူတ်ႉၶိူင်ႈသေ လူႉတၢႆဝႆႉၼၼ်ႉ

မိူဝ်ႈဝၼ်းတီႈ 27/7/2020 ယၢမ်းၵၢင်ၼႂ် ပီႈၼွင်ႉတႆး ႁႅင်းၵၢၼ်ယၢၼ်မိူင်း ဢၼ်ႁွတ်ႈၵဵင်းမႆႇ၊ ၸိုဝ်ႈၸၢႆးၼၼ်ႇတေႃး ဢႃယု 43 ပီ ၼွၼ်းဢိင်ရူတ်ႉၶိူင်ႈသေ လူႉတၢႆၵႂႃႇ တၢင်းၼႃႈ ႁွင်ႈသဝ်းမၼ်းၸၢႆးတီႈၼိုင်ႈ တၢင်းလင် ၵၢတ်ႇထႃးၼိၼ်း ဝဵင်းၵဵင်းမႆႇ ၸိုင်ႈထႆး။ ၶၢပ်ႈတူဝ်မၼ်းၸၢႆးၼၼ်ႉ လႆႈတေႃႉသူင်ႇႁူင်းယႃသေ ယူႇတီႈမေႃယႃၶဝ် ၵူတ်ႇထတ်းတူၺ်း လွင်ႈၵၢၼ်တၢႆမၼ်းၸၢႆး လႆႈႁူႉဝႃႈ ပဵၼ်တၢင်းပဵၼ်မၢၵ်ႇႁူဝ်ၸႂ် ဝႃႈၼႆ။

ၸၢႆးတႆးထိူၼ်ႇ ၽူႈတူင်ႉၼိုင်ၸွႆႈထႅမ်ၵၢၼ်တူင်ႇဝူင်းၵူၼ်းတႆး ၼႂ်းၵဵင်းမႆႇ လၢတ်ႈတီႈၽူႈတွႆႇႁွၵ်ႈဝႃႈ “ ယူႇတီႈမေႃယႃၶဝ် လႆႈၵူတ်ႇထတ်းတူၺ်းသေ ႁူႉဝႃႈပဵၼ်တၢင်းပဵၼ်မၢၵ်ႇႁူဝ်ၸႂ်ၼႆၶႃႈ။ ႁွႆးၸဵပ်းၸွမ်းတူဝ် တၢင်းၼႂ်းတူဝ် ၸိူဝ်းၼႆႉတႄႉ ဢမ်ႇမီးၼႆၶႃႈ” ဝႃႈၼႆ။

ယၢမ်းလဵဝ် ၶၢပ်ႈတူဝ်တၢႆ ၸၢႆးၼၼ်ႇတေႃးၼႆႉ လႆႈဢဝ်မႃးဝႆႉ တီႈဝတ်ႉၻွၼ်းၾႆး ဢိူင်ႇဝၢၼ်ႈဝႅၼ် ၸႄႈဝဵင်းႁၢင်ၻူင်း ၸႄႈတွၼ်ႈၵဵင်းမႆႇ၊ တေပူၼ်ႉၶၢပ်ႈတူဝ် ၼႂ်းဝၼ်းတီႈ 30/7/2020 ဝႃႈၼႆ။

ၸၢႆးၼၼ်ႇတေႃးၼႆႉ ပဵၼ်ၵူၼ်းၸႃတိ ဝၢၼ်ႈၼႃးလေႃး ဢိူင်ႇၶူဝ်ဢုတ်ႇ ဝဵင်းၶူဝ်လမ် ၸႄႈဝဵင်းၼမ်ႉၸၢင် ၸိုင်ႈတႆးပွတ်းၸၢၼ်း ၼႆယဝ်ႉ။

ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ

SHARE