ၼၢင်းယိင်းတုၵ်ႉၶိတ ၼႂ်းပၢင်သဝ်းၵူၼ်းပၢႆႈၽေး ၺႃးဢၢင်ႈၵၼ်ႉၸၼ်

0
303

ၼၢင်းယိင်း တုၵ်ႉၶိတ ဢၼ်ယူႇသဝ်းၼႂ်းပၢင်သဝ်းၵူၼ်းပၢႆႈၽေး ၼႂ်းၸေႈဝဵင်းၵူတ်ႉၶၢႆ ၺႃးၵူၼ်းၸၢႆးတၢင်းၼွၵ်ႈၶဝ်ႈမႃးလၢၵ်ႈၸၼ်ဢၢင်ႈၵၼ်ႉၸၼ်။

ဝၼ်းတီႈ 9/7/2020 ယၢမ်းၵၢင်ဝၼ်းတဵင်ႈ 1 မူင်းၶိုင်ႈ ၽွင်းၼၢင်းယိင်းတုၵ်ႉၶိတ ဢွၼ်ႇၼၼ်ႉ ယူႇသဝ်းၼႂ်းသုမ်ႉ တီႈပၢင်သဝ်းၵူၼ်းပၢႆႈၽေး  ၼႂ်းၸေႈဝဵင်းၵူတ်ႉၶၢႆၼၼ်ႉ မီးၵူၼ်းၸၢႆးၼွၵ်ႈပၢင်သဝ်း ၶဝ်ႈမႃးလၢၵ်ႈၸၼ်။ ၽူႈယႂ်ႇၵူၼ်းလူင်ၼႂ်းပၢင်သဝ်းၶဝ်ႈၵႄႈၵၢင် လၢတ်ႈၸွႆႈလႄႈ ၾၢႆႇၽူႈၸၢႆးမႃးယွၼ်း ၼွမ်းသေ လႆႈတူၵ်းလူင်းၽွမ်ႉပၼ် လူၺ်ႈ ဢမ်ႇဢဝ်လိူင်ႈ ဢဝ်တၢင်း။

တေႃႇပွၵ်ႉတွင်ႇ ၽူႈမီးပုၼ်ႈၽွၼ်းၼႂ်းပၢင်သဝ်းလၢတ်ႈတီႈၽူႈတွႆႇႁွၵ်ႈဝႃႈ – “မၼ်းဢၢင်ႈမႃးၵၼ်ႉၸၼ်။ ၵူၺ်းဢမ်ႇတၼ်းလႆႈၵၼ်ႉၸၼ်ၼင်ႇၵဝ်ႇ ။ ပေႃးၾၢႆႇၶဝ်မႃးယွၼ်းၼွမ်းၵေႃႈ ၾၢႆႇယိင်းၵေႃႈ ၵႃႈလႆႈၽွမ်ႉ ဢမ်ႇဢဝ်လိူင်ႈ။ ဢၼ်ၼၼ်ႉ ၾၢႆႇပေႃႈမႄႈတင်းသွင်ၾၢႆႇၵူၺ်း။ ႁဝ်းၶႃႈတႄႉဢမ်ႇလႆႈၶဝ်ႈပႃးၸွမ်း ”- ဝႃႈၼႆ။

ၾၢႆႇပေႃႈမႄႈပီႈၼွင်ႉ ၽူႈၸၢႆးၼၼ်ႉလၢတ်ႈဝႃႈ “မၼ်းၸၢႆးလႆႈၵိၼ်လဝ်ႈမဝ်းၵႅပ်ႇသေ ၽိတ်းပိူင်ႈ ၵႂႃႇ ဢိတ်းဢီႈၵူၺ်း ။ ဢမ်ႇလႆႈတင်ႈၸႂ် ” – ၼႆသေ ယွၼ်းၼွမ်းလူၺ်ႈ သၢႆႈတႅၼ်းငိုၼ်းပၼ် 1 သႅၼ် 5 မိုၼ်ႇ ပဵၼ် ၵႃႈပူၼ်ႉပႅၼ်ၶဝ်ႈပၢင်သဝ်း ၊ ပူၼ်ႉပႅၼ်ၶဝ်ႈဝၢၼ်ႈလႄႈ ၶဝ်ႈႁိူၼ်းၼၢင်းယိင်းမႃး ။ လိူဝ်ၼၼ်ႉသၢႆႈတႅၼ်းပၼ်ငိုၼ်း တီႈပေႃႈမႄႈၼၢင်းယိင်းၼၼ်ႉ 1 သႅၼ်ပျႃး ၼႆ ၵူၼ်းၼႂ်းပၢင်သဝ်းၵူၼ်းပၢႆႈၽေးလၢတ်ႈ။

ၸဝ်ႈၼႃႈတီႈၼႂ်းပၢင်သဝ်းၵူၼ်းပၢႆႈၽေးတႄႉလၢတ်ႈဝႃႈ ၼင်ႇႁိုဝ်တေဢမ်ႇမီးလွင်ႈႁုၵ်ႉႁၢႆႉၸိူင်ႉၼႆထႅင်ႈၼၼ်ႉ တၵ်းလႆႈ မီးလွင်ႈႁူမ်ႇလူမ်ႈ ပၢင်သဝ်းထႅင်ႈ၊ ပေႃးၵူၼ်းတၢင်းၼွၵ်ႈၶဝ်ႈမႃး တေၵူတ်ႇထတ်းပႂ်ႉတူၺ်းလီလီ ဝႃႈၼႆ။

ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ

SHARE