ၵူၼ်းဝၢၼ်ႈ ပွတ်းၸေႈဝဵင်းၵူတ်ႉၶၢႆ ၵႂႃႇၶုတ်းႁႆႈ ၺႃးမၢၵ်ႇတႅၵ်ႇတိူဝ်ႉသႂ်ႇလႄႈ မၢတ်ႇၸဵပ်း 7 ၵေႃႉ ။
Photo Credit to ၸုမ်းၸွႆႈထႅမ် တူင်ႇဝူင်းၵူၼ်းမဵတ်ႉတႃႇသျိၼ်ႇ – ၵူၼ်းဝၢၼ်ႈၼမ်ႉၶွၼ် ဝဵင်းၵူတ်ႉၶၢႆ ဢၼ်မၢၵ်ႇတႅၵ်ႇတိူဝ်ႉၺႃးၽွင်းၵႂႃႇႁဵတ်းႁႆႈ 8/7/2020
ဝၼ်းတီႈ 8 ယၢမ်းၵၢင်ဝၼ်းတဵင်ႈၼၼ်ႉ ၵူၼ်းဝၢၼ်ႈ ၼမ်ႉၶွၼ် ဢိူင်ႇပၢင်ၵႆႇ ၸေႈဝဵင်းၵူတ်ႉၶၢႆ 7 ၵေႃႉၵႂႃႇၶုတ်းႁႆႈ သေၵႂႃႇတိူဝ်ႉၺႃးမၢၵ်ႇလုၵ်ႈၼိုင်ႈ တႅၵ်ႇတိူဝ်ႉသႂ်ႇ မၢတ်ႇၸဵပ်း လႆႈသူင်ႇႁူင်းယႃ။
ပဵၼ်ၵူၼ်းၸၢႆး 2 ၵေႃႉလႄႈ ၼၢင်းယိင်း 5 ၵေႃႉ။
ၸုမ်းၸွႆႈထႅမ် တူင်ႇဝူင်းၵူၼ်းမဵတ်ႉတႃႇသျိၼ်ႇ လၢတ်ႈတီႈၽူႈတွႆႇႁွၵ်ႈဝႃႈ – “ဢမ်ႇၸႂ်ႈမၢၵ်ႇမႅင်းၾင်လိၼ် ။ ပဵၼ်မၢၵ်ႇဢၼ်ပွႆႇၵၼ်ၼႂ်းပၢင်တိုၵ်း။ မၼ်းဢမ်ႇတႅၵ်ႇသေၵိုတ်းဝႆႉ။ ၵူၼ်းမိူင်းမႃးတိူဝ်ႉ ၺႃးၵေႃႈ တႅၵ်ႇသႂ်ႇၵူၼ်းမိူင်း ။ မၢတ်ႇၸဵပ်းလိူဝ်ႁႅင်း 5 ၵေႃႉ။ လႆႈသူင်ႇႁူင်းယႃ လႃႈသဵဝ်ႈယဝ်ႉ” – ဝႃႈၼႆ။
တီႈထုင်ႉၸေႈဝဵင်းၵူတ်ႉၶၢႆၼႆႉ ပဵၼ်တီႈဢၼ်သိုၵ်းလူင်ပွင်ၸိုင်ႈလႄႈသိုၵ်းၸၢဝ်းၶိူဝ်းတူင်ႉၼိုင် ၵႂႃႇမႃးလႄႈ မၢၵ်ႇဢၼ်ပွႆႇသႂ်ႇၵၼ်ၼႂ်းပၢင်တိုၵ်းသေ ယင်းပႆႇတႅၵ်ႇၼၼ်ႉ ယင်းၸၢင်ႈမီးထႅင်ႈတၢင်းၼမ်- ၸုမ်းၸွႆႈထႅမ်လၢတ်ႈၼေၼင်ႇၼႆ။
လိူဝ်ၼၼ်ႉၼႂ်းဝူင်ႈဝၢင်ႈၼႆႉ သိုၵ်းလူင်ပွင်ၸိုင်ႈသမ်ႉ ထႅမ်ႁႅင်းသိုၵ်းထႅင်ႈယူႇတိၵ်းတိၵ်းလႄႈ ၵူၼ်းမိူင်းမႆႈၸႂ်ၵူဝ်ႁႄ ပၢင်တိုၵ်းၸၢင်ႈပဵၼ်လႆႈၵူႈၶၢဝ်းယၢမ်း ။
