မေႃႇသႅင်ၶဵဝ်ဝဵင်းၽႃၵၢၼ်ႉ လိၼ်ၵူၼ်ႇယၢတ်ႇပင်းလူင်းၼႂ်းၼွင်၊ ၵူၼ်းၶုတ်းၶူၼ်ႉသွၵ်ႈႁႃသႅင် ထုၵ်ႇၵူမ်ႇလိၼ်ႁိၼ်သၢႆး လုပ်ႇၼွင်းထူမ်ႈထူမ်တဵင် လူႉတၢႆပၢၵ်ႇပၢႆ။
ဢိင်ၼိူဝ်ၾူၼ်တူၵ်းမႃး ထပ်းၵၼ်လၢႆဝၼ်းသေ မိူဝ်ႈဝၼ်းတီႈ 02/07/2020 ၵၢင်ၼႂ်မွၵ်ႈယၢမ်း 06:30 မူင်းၼၼ်ႉ ၵိူတ်ႇပိူင်ပဵၼ်လိၼ်ၵူၼ်ႇယၢတ်ႇပင်းလူင်း တီႈမေႃႇသႅင်ၶဵဝ်ၽႃၵၢၼ်ႉ (ႁူၺ်ႈၶႃႇ) ၸႄႈမိူင်းၶၢင်။ ႁွၼ်ၵူမ်ႇလိၼ်ႁိၼ်သၢႆး ဢီးပတ်ႉဢဝ်ၵူၼ်းၵႂႃႇႁဵတ်းၵၢၼ်တီႈၼၼ်ႈ ၸိူဝ်းတိုၵ်ႉ ၶူၼ်ႉသွၵ်ႈႁႃသႅင် ၼႂ်းသၢၵ်ႈယိူဝ်ႇလိၼ်ႁိၼ်သၢႆး ဢၼ်ၶွမ်ႊပၼီႊၶဝ် ၶုတ်းထွၵ်ႇၵွင်ဝႆႉၼၼ်ႉ တူၵ်းလူင်းၼႂ်းၼမ်ႉၼွင်သေ လူႉတၢႆၵႂႃႇ ပၢၵ်ႇပၢႆ-ၼႆယဝ်ႉ။
ၵမ်ႈၽွင်ႈၸိူဝ်းၵၢမ်ႇလီ ထုၵ်ႇႁွၼ်ၼမ်ႉၵူမ်ႇ လိၼ်ႁိၼ်သၢႆး ပတ်ႉဢီးမႃးၸူးၾင်ႇသေ ၸိုၼ်ႇတူဝ် လုၵ်ႉဢွၵ်ႇမႃးလႆႈ ႁင်းၵူၺ်းၵေႃႈမီး။ ၵမ်ႈၽွင်ႈ ၸိူဝ်းမႃးၶၢင်ႉႁိမ်းၾင်ႇသေ ၵူၼ်းၸိူဝ်းပၵ်းတႃ ပႂ်ႉတူၺ်းယူႇ ဢွၼ်ၵၼ်လူင်းၵႂႃႇၸွႆႈ ဢဝ်ဢွၵ်ႇမႃးၵေႃႈမီး-ၼႆယဝ်ႉ။
ၵဵဝ်ႇၵပ်းလွင်ႈၼႆႉ ႁူဝ်ၼႃႈၵူၼ်းၼုမ်ႇတႆး ဢၼ်ယူႇတီႈၽႃၵၢၼ်ႉ လၢႆးၸိုၼ်ႈလႃႉ၊ ၵေႃႉတူင်ႉၼိုင် ၼႂ်းပႃႇတီႇႁူဝ်သိူဝ် ၵေႃႈၸႂ်ႈ- လၢတ်ႈတီႈၽူႈတွႆႇႁွၵ်ႈဝႃႈ- “တေႃႇထိုင်ႁူဝ်ၶမ်ႈ (2/7/2020) ၼႆႉ ၵူၼ်းၸိူဝ်းလူႉတၢႆၵႂႃႇ ဢၼ်ႁၼ်ၶၢပ်ႈတူဝ်တၢႆမီး 150 ၵေႃႉပၢႆယဝ်ႉ၊ ၵူၼ်းၸိူဝ်းႁၢႆလၢႆဝႆႉသေ ဢၼ်လႆႈႁူႉၸိုဝ်ႈသဵင်ၶဝ်ဝႆႉၼၼ်ႉ မီး 300 ၵေႃႉ၊ ၵူၺ်းၵႃႈ လႅပ်ႈၼမ်လိူဝ်ၼၼ်ႉၵွၼ်ႇ”- ဝႃႈၼႆ။
သိုပ်ႇလၢတ်ႈဝႃႈ “ၸၢဝ်းၶိူဝ်းတႆးတႄႉ ဢမ်ႇလႆႈႁူႉဝႃႈပႃးသေၵေႃႉ၊ ၼႂ်းၵူၼ်းၸိူဝ်းလူႉတၢႆၵႂႃႇ ၼၼ်ႉ ဢၼ်ပႃးၼမ်လိူဝ်ပိူၼ်ႈ ပဵၼ်ၸၢဝ်းၶိူဝ်းရၶႅင်ႇ၊ ၶၢင်လႄႈမၢၼ်ႈ” ဝႃႈၼႆ။
ပူၼ်ႉမႃးမိူဝ်ႈၼႂ်းလိူၼ်ၼူဝ်ႊဝႅမ်ႊၿိူဝ်ႊ ပီ 2015 ၼၼ်ႉၵေႃႈ တီႈမေႃႇသႅင်ၶဵဝ်ၽႃၵၢၼ်ႉၼႆႉ ၵိူတ်ႇပိူင်ပဵၼ်လိၼ်ယၢတ်ႇယူတ်ႇၵူၼ်ႇပင်းၵၢၼ်ႉလူင်းၼင်ႇၵဝ်ႇ၊ မိူဝ်ႈၼၼ်ႉ ၵူၼ်းလူႉတၢႆ တီႈဢေႇသုတ်းဢမ်ႇယွမ်း 116 ၵေႃႉ-ၼႆယဝ်ႉ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ