သိုၵ်းလူင်ပွင်ၸိုင်ႈမၢၼ်ႈ ထွႆထွၼ်ႇ ဢွၵ်ႇၼႂ်းပိုၼ်ႉတီႈလႄႈ ၵူၼ်းမိူင်း ၸိူဝ်းပၢႆႈၽေးသိုဝ်း ႁူဝ်ၵူၼ်းမွၵ်ႈ 700 ပၢႆ ၸူဝ်းၵၼ်ပွၵ်ႈၶိုၼ်းႁိူၼ်းယေးၽႂ်မၼ်း ယဝ်ႉၼႆ လႆႈႁူႉၸွမ်းၶၢဝ်ႇပိုၼ်ႉတီႈၼင်ႇၼႆ။
မိူဝ်ႈၼႆႉ ဝၼ်းတီႈ 1/7/2020 ၵူၼ်းပၢႆႈၽေး ဢၼ်မႃးသွၼ်ႈဝႆႉၸွမ်း ဝတ်ႉဝႃးၽႃႇသိူဝ်ႇ မိူၼ်ၼင်ႇ တီႈဝတ်ႉပၢင်ႇလေႃႉ ႁူဝ်ၵူၼ်းမွၵ်ႈ 200 ၵေႃႉ၊ တီႈဝတ်ႉဢွင်ႇတမႃႇယူင်ႇ ၼွင်ပိင် ႁူဝ်ၵူၼ်း မွၵ်ႈ 400 ၵေႃႉ၊ တီႈဝတ်ႉၼမ်ႉႁၢင်ႈၶိူင်ႈၵမ်ႈၽွင်ႈ လႄႈ တီႈဝၢၼ်ႈၼွင်ၵၢင် မွၵ်ႈ 80 ၵေႃႉ ၼႂ်းၸႄႈဝဵင်းၵျွၵ်ႉမႄး ၸိုင်ႈတႆးပွတ်းႁွင်ႇ ၸိူဝ်းၼႆႉ ဢွၼ်ၵၼ်ပွၵ်ႈမိူဝ်းၶိုၼ်းႁိူၼ်းယေးၽႂ်မၼ်းယဝ်ႉ ၼႆယဝ်ႉ။
ၸၢႆးထုၼ်းဝိၼ်း ၽူႈတႅၼ်းသၽႃးၸႄႈမိူင်း ၶဵတ်ႇလိူၵ်ႈတင်ႈမၢႆ 1 ၸႄႈဝဵင်းၵျွၵ်ႉမႄး လၢတ်ႈတီႈၽူႈတွႆႇႁွၵ်ႈဝႃႈ “ မိူဝ်ႈၼႆႉ (1/7/2020) ၵူၼ်းပၢႆႈၽေးႁဝ်းၶႃႈ ႁူဝ်ၵူၼ်း 700 ပၢႆ လႆႈဢွၼ်ၵၼ်ပွၵ်ႈမိူဝ်းၶိုၼ်းႁိူၼ်းယေးၽႂ်မၼ်းမူတ်းယဝ်ႉၶႃႈ။ ယွၼ်ႉၼႂ်းပိုၼ်ႉတီႈ ၸိူဝ်းၼၼ်ႉ ပၢင်တိုၵ်းၵေႃႈယဵၼ်လူင်းယဝ်ႉ သိုၵ်းမၢၼ်ႈၵေႃႈ ထွႆထွၼ်ဢွၵ်ႇမူတ်းယဝ်ႉ၊ ၵွပ်ႈၼႆ ၵူၼ်းပၢႆႈၽေးႁဝ်းၶႃႈ ၸင်ႇဢွၼ်ၵၼ်ပွၵ်ႈမိူဝ်းၵၼ်ၶိုၼ်းၶႃႈယဝ်ႉ” ဝႃႈၼႆ။
တႄႇဢဝ် မိူဝ်ႈဝၼ်းတီႈ 25 လိူၼ်ၵျုၼ်ႊပူၼ်ႉမႃး ယူႇတီႈသိုၵ်းလူင်ပွင်ၸိုင်ႈမၢၼ်ႈ 5 တပ်ႉၵွင် ႁူမ်ႈႁႅင်းၵၼ်သေ သွၵ်ႈတဝ် ႁွႆးတိၼ် သိုၵ်းတႆး RCSS ၊ သွင်ၾၢႆႇလႆႈပဵၼ်ပၢင်တိုၵ်းၵၼ်မႃး ႁၢဝ်ႈႁႅင်း ၵူၼ်းဝၢၼ်ႈ လႆႈ ဢွၼ်ၵၼ်ပၢႆႈၽေးသိုၵ်း မႃးသွၼ်ႈဝႆႉၸွမ်းဝတ်ႉဝႃးၽႃႇသိူဝ်ႇၵၼ်။
ၵူၼ်းဝၢၼ်ႈ ဢၼ်လႆႈပၢႆႈယၢၼ်ႁိူၼ်းယေးတီႈယူႇ ပဵၼ် – ဝၢၼ်ႈပၢင်ၵႅၼ်၊ ဝၢၼ်ႈယေႇသၢၼ်ႇ၊ ဝၢၼ်ႈၼမ်ႉၽၢတ်ႇ၊ ဝၢၼ်ႈဢႅၵ်းၵျီး၊ ဝၢၼ်ႈလွႆၵူင်၊ ဝၢၼ်ႈၶိူဝ်းၼိမ်းလႄႈ ဝၢၼ်ႈပဵင်းၼိမ်ၵဝ်ႇ ၸိူဝ်းၼႆႉ။
ၶွင်ႇသီႇဢဝ်ၶိုၼ်းၸိုင်ႈတႆး RCSS/SSA ၼႆႉ ပဵၼ်ၸုမ်း ဢၼ်လူင်းလၢႆမိုဝ်းၵိုတ်းတိုၵ်းတူဝ်ႈမိူင်း NCA ဝႆႉ။ ၵူၺ်းၵႃႈ ၾၢႆသိုၵ်းမၢၼ်ႈ ဝႆႉမိူၼ်ၽူႈၶဵၼ်သေ ႁႅၼ်းသိုၵ်း လေႃႇတိုၵ်း လၢႆႈတီႈလၢႆၵမ်း။ ၼႂ်းၸိုင်ႈတႆး ပွတ်းဢွၵ်ႇၶူင်း ၸႄႈတွၼ်ႈ တႃႈၶီႈလဵၵ်း၊ ၸေႈတွၼ်ႈမိူင်းသၢတ်ႇ ထုင်ႉလွႆၵေႃႇ ဝၼ်းၼၼ်ႉၵေႃႈ သိုၵ်းလူင်ပွင်ၸိုင်ႈမၢၼ်ႈ ထႅမ်ႁႅင်းသိုၵ်း မုင်ႈၼႃႈ ၸူး ဝႆႉလႄႈ ငဝ်းလၢႆး ပႂ်ႉတူၺ်းၵၼ် 24 ၸူဝ်ႈမူင်း၊ ပၢင်တိုၵ်းၸၢင်ႈၵိူတ်ႇၶိုၼ်ႈၵူႈၶၢဝ်းလႄႈ ၵူၼ်းမိူင်းၵူဝ်ပဵၼ်ပၢင်တိုၵ်းသိုၵ်းသိူဝ်။
