ယူင်ႉၵၢၼ်ႁူမ်ႈမဵတ်ႉတႃႇ ဢၼ်သင်ၶၸဝ်ႈ ဢွၼ်ႁူဝ်ၼမ်းၼႃး လူင်းပိုၼ်ႉတီႈၸွႆႈထႅမ် ၶဝ်ႈၼမ်ႉတၢင်းၵိၼ် ပၼ်ပီႈၼွင်ႉၵူၼ်းမိူင်း ၼႂ်းၸႄႈဝဵင်းမႄႈႁွင်ႈသွၼ် လၢႆလၢႆတီႈ ႁူမ်ႈမွၵ်ႈ 66 လင်ႁိူၼ်း။
မိူဝ်ႈဝၼ်းတီႈ 15/06/2020 တၢင်တူဝ်ယူင်ႉၵၢၼ်ႁူမ်ႈမဵတ်ႉတႃႇသေ ၸဝ်ႈၶူးမိလိၼ်ႇတ ၸဝ်ႈၵွၼ်းဝတ်ႉပႃႇလၢၼ်း ႁူၺ်ႈလူၺ်ႈသင်ႇၶၸဝ်ႈလၢႆလၢႆတူၼ် လူင်းၸွႆႈထႅမ် ၶဝ်ႈၼမ်ႉတၢင်းၵိၼ် တီႈပီႈၼွင်ႉတႆး ဢိၵ်ႇပီႈၼွင်ႉယၢင်း တီႈဝၢၼ်ႈပႃႇလၢၼ်း ဢိူင်ႇႁူၺ်ႈပူင်ႇ ၸႄႈဝဵင်းမႄႈႁွင်ႈသွၼ် တႃႇ 22 လင်ႁိူၼ်း၊ ဝၢၼ်ႈၼႂ်းသွႆ ဢိူင်ႇပၢင်မူထႅင်ႈ 2 လင်ႁိူၼ်း-ၼႆယဝ်ႉ။
ၸဝ်ႈၶူးမႁႃႇသႅင်ၾႃႉ လၢင်းၶိူဝ်း ၽူႈၵိူဝ်းၵုမ်ယူင်ႉၵၢၼ်ႁူမ်ႈမဵတ်ႉတႃႇ လၢတ်ႈဝႃႈ- “ၶူဝ်းၶွင်ႁႅင်ႈ ၶွင်ၵိၼ်တၢင်းယႅမ်ႉ ၸိူဝ်းၸွႆႈပၼ်ပီႈၼွင်ႉတၵ်ႉၵႃႇၶဝ်ၼၼ်ႉ မိူၼ်ၼင်ႇ ၶဝ်ႈသၢၼ်၊ ၼမ်ႉမၼ်း၊ ၶႆႇၵႆႇ၊ ၶဝ်ႈသွႆးလႄႈၼမ်ႉပႃ ၸိူဝ်းၼႆႉ။ လႆႈၸွႆႈပၼ်တီႈၵူၼ်းထဝ်ႈဢႃႇယုယႂ်ႇ၊ ၵူၼ်းတုၵ်ႉၶိတႃႉ မိူၼ်ၼင်ႇၵူၼ်းတၢႆၽၢၵ်ႇ၊ ၵူၼ်းပဵၼ်ၵိၼ်း၊ ၵူၼ်းတႃမွတ်ႇ ၸိူဝ်းၼႆႉ- ႁူမ်ႈလင်ႁိူၼ်း ဢၼ်လႆႈၸွႆႈထႅမ်ဝူင်ႈၼႆႉ တေမီး 66 လင်ႁိူၼ်း”- ဝႃႈၼႆ။
ဢွၼ်ၼႃႈၼႆႉ မိူဝ်ႈ 13/06/2020 တၢင်တူဝ်ယူင်ႉၵၢၼ်ႁူမ်ႈမဵတ်ႉတႃႇ ၸဝ်ႈၶူးၶမ်းသႅၼ် ဝတ်ႉပၢင်ၽႅၼ် ဢွၼ်ႁူဝ်ၼမ်းၼႃႈ လူင်းၸွႆႈထႅမ်တီႈၼႂ်းဝၢၼ်ႈ ပွၵ်ႉၵျၢၼ်ႇ 6 လင်ႁိူၼ်း၊ ဝၢၼ်ႈပၢႆးၵူင်ႉ 1 လင်ႁိူၼ်း၊ ဝၢၼ်ႈၵိဝ်ႇၶဝ်ႈမိၼ်ႉ 1 လင်ႁိူၼ်း။
မိူဝ်ႈ 14/06/2020 တၢင်တူဝ်ယူင်ႉၵၢၼ်ႁူမ်ႈမဵတ်ႉတႃႇ မီးၸဝ်ႈၶူးမႁႃႇသႅင်ၾႃႉ လၢင်းၶိူဝ်း လႄႈၸဝ်ႈၶူးသႅင်ၸွမ်ႁိူင်း ဝတ်ႉၸွင်းၵၢင် ႁူမ်ႈလူၺ်ႈသင်ႇၶၸဝ်ႈလၢႆလၢႆၸဝ်ႈ လူင်းပိုၼ်ႉတီႈ ၸွႆႈထႅမ်ၶဝ်ႈၼမ်ႉတၢင်းၵိၼ် ပီႈၼွင်ႉၵူၼ်းမိူင်း တီႈဝၢၼ်ႈသူပ်းပွင်ႇ ဢိူင်ႇသူပ်းပွင်ႇ ၸႄႈဝဵင်းပၢင်မၢၵ်ႇၽႃႈ ၸႄႈတွၼ်ႈမႄႈႁွင်ႈသွၼ် ႁူမ်ႈ 22 လင်ႁိူၼ်း။
မိူဝ်ႈ 12/06/2020 တၢင်တူဝ်ယူင်ႉၵၢၼ်ႁူမ်ႈမဵတ်ႉတႃႇ ၸဝ်ႈၶူးမႁႃႇသႅင်ၾႃႉ လၢင်းၶိူဝ်း လႄႈၸဝ်ႈၶူးသႅင်ၸွမ်ႁိူင်း ၸွင်းၵၢင် ႁူၺ်ႈလူၺ်ႈသင်ၶၸဝ်ႈလၢႆလၢႆၸဝ်ႈ လူင်းပိုၼ်ႉတီႈ ၸွႆႈထႅမ်ၶဝ်ႈၼမ်ႉတၢင်းၵိၼ် တီႈပီႈၼွင်ႉၵူၼ်းမိူင်း တီႈဝၢၼ်ႈသူပ်းသွႆ ဢိူင်ႇပၢင်မူ ၸႄႈဝဵင်းမႄႈႁွင်ႈသွၼ် ႁူမ်ႈ 13 လင်ႁိူၼ်း-ၼႆယဝ်ႉ။
ယူႇတီႈၸဝ်ႈၶူးမႁႃႇသႅင်ၾႃႉသေ သင်ႇလၢတ်ႈထိုင် ပီႈၼွင်ႉၵူၼ်းမိူင်းဝႃႈ- “ပဵၵ်ႉသမ်ႉဝႃႈရေႃးၵႃႇလူင် ၶူဝ်ႊဝိတ်ႉ 19 ၼႆႉ ၼႂ်းလၢႆလၢႆၸိုင်ႈမိူင်း လူတ်းယွမ်းလူင်းၵႂႃႇ၊ ၼႂ်းၸိုင်ႈမိူင်းႁူမ်ႈတုမ်ၼႆၵေႃႈ ၵၢၼ်ဢွၵ်ႇတၢင်းၵႂႃႇတႂ်ႈမိူဝ်းၼိူဝ် မီးၶိုၼ်းၵမ်ႈၽွင်ႈယဝ်ႉၼႆသေတႃႉ ဢမ်ႇလီလိုမ်းတူဝ်လိုမ်းၶိင်း၊ ထုၵ်ႇလီလူလွမ်တူၺ်းထိုင် ပၢႆးယူႇလီၸဝ်ႈၵဝ်ႇ လဵၼ်ႈႁႅင်းဢွၵ်ႇႁႅင်းပၼ် ႁႂ်ႈမီးတူဝ်ၵႅၼ်ႇၶႅင် ၸႂ်ၵႅၼ်ႇၶႅင်ယူႇတႃႇသေ”-ဝႃႈၼႆ။
ႁူမ်ႈမဵတ်ႉတႃႇၼႆႉ သင်ၶၸဝ်ႈၼႂ်းမိူင်းထႆး ဢိၵ်ႇမူႇၸုမ်းပီႈၼွင်ႉတႆးၼႂ်းမိူင်းထႆး မိူၼ်ၼင်ႇ- 1)ၸုမ်းသင်ၶတႆးၼႂ်းၸိုင်ႈထႆး၊ 2.မုၵ်ႉၸုမ်းၸၢဝ်းၶိူဝ်းတႆး၊ 3.ၵွင်တိုၼ်းၵၢင်ၸွႆႈၸိူဝ်ႉၸၢတ်ႈ၊ 4.တုမ်းတူၼ်ႈတႆး၊ 5.ၸုမ်းၼုမ်ႇတႆးၵတ်းယဵၼ် ၸိူဝ်းၼႆႉ ႁူမ်ႈၵၼ်ၽွတ်ႈတင်ႈၶိုၼ်ႈမႃး မိူဝ်ႈဝၼ်းတီႈ 2/5/2020 ။ ႁူဝ်ပဝ်ႈပဵၼ် ၸဝ်ႈတူၼ်ၶူးမႁႃႇၺႃႇၼိၼ်ႇ ၽူႈၵွၼ်းဝတ်ႉမႂ်ႇ သႃထုပရႃႇတိတ်ႇ ၶဵတ်ႇယၢၼ်းၼႃးဝႃး ဝဵင်းလူင်မိူင်းၵွၵ်ႇ။
ႁူမ်ႈမဵတ်ႉတႃႇ မီးယိူင်းဢၢၼ်း ပိူဝ်ႈတႃႇႁူမ်ႈၵၼ်ၸွႆႈထႅမ်ပီႈၼွင်ႉၸၢဝ်းၶိူဝ်းတႆး ႁႅင်းၵၢၼ်ယၢၼ်မိူင်း ၸိူဝ်းထူပ်းၺႃးတၢင်းယၢပ်ႇၽိုတ်ႇ လွင်ႈၶဝ်ႈၼမ်ႉတၢင်းၵိၼ် ယွၼ်ႉၽေးရေႃးၵႃႇၶူဝ်ႊဝိတ်ႉ 19 လႄႈပၼ်ႁႃၵူႈလွင်ႈလွင်ႈ။ ၸူဝ်ႈတင်ႈမႃးၶၢဝ်းတၢင်းႁိမ်းလိူၼ်ၼႆႉ လႆႈၸွႆႈထႅမ်ပီႈၼွင်ႉတႆး ႁႅင်းၵၢၼ်ယၢၼ်မိူင်း ၸိူဝ်းထူပ်းၽေးတၢင်းပဵၼ်ၶူဝ်ႊဝိတ်ႉ 19 ယဝ်ႉ ႁူဝ်ၵူၼ်းႁိမ်းၸမ်မိုၼ်ႇ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ