Friday, March 29, 2024

ၵၢၼ်မၢၵ်ႈမီးဢမ်ႇပဵၼ် ၵူၼ်းမိူင်းမူႇၸေႊ မုင်ႈမွင်းၸဵဝ်းပိုတ်ႇၶိုၼ်းၽၵ်းတူမိူင်း လႅၼ်လိၼ် တႆး-ၶႄႇ

Must read

ၵူၼ်းမိူင်းၸိူဝ်းယူႇၸွမ်းလႅၼ်လိၼ်တႆး – ၶႄႇ ၵမ်ႈၼမ်ဢွၼ်ၵၼ် မုင်ႈမွင်း ႁႂ်ႈၸဵဝ်းပိုတ်ႇၽၵ်းတူလႅၼ်လိၼ်ၽႂ်းၽႂ်းၵၼ် ယွၼ်ႉဝႃႈ တုမ်ႉတိူဝ်ႉၵၢၼ်ႁႃၵိၼ်လဵင်ႉတွင်ႉလႄႈ ၵၢၼ်ပၢႆးမၢၵ်ႈမီးႁၢဝ်ႈႁႅင်း။

Photo by – ထုင်ႉႁူၺ်းလီ/ ၽၵ်းတူမိူင်း လႅၼ်လိၼ်တႆး – ၶႄႇ ဢိုတ်း/ ပိၵ်ႉယဝ်ႉ

ယွၼ်ႉတၢင်းပဵၼ်ၶူဝ်ႊဝိတ်ႉ – 19 လၢမ်ႈၽႄႈႁၢဝ်ႈႁႅင်းၼႆသေ ယူႇတီႈလူင်ပွင်ၸိုင်ႈမိူင်းၶႄႇ ၸီႉသင်ႇႁႂ်ႈပိၵ်ႉဢိုတ်း ၽၵ်းတူ ၶဝ်ႈဢွၵ်ႇၸွမ်းလႅၼ်လိၼ်ၶႄႇ ၸိူဝ်းၶဝ်ႈဢွၵ်ႇပဵၼ်တၢင်းၵၢၼ် ဢမ်ႇပဵၼ်တၢင်းၵၢၼ် ၸိူဝ်းၼႆႉ တႄႇဢဝ် မိူဝ်ႈဝၼ်းတီႈ 1/4/2020 မႃး မီးၶၢဝ်းတၢင်း 2 လိူၼ်ပၢႆယဝ်ႉ တေႃႇထိုင်ယၢမ်းလဵဝ် ပႆႇပိုတ်ႇ။ ၵူၼ်းမိူင်း ၸိူဝ်းယူႇၸွမ်းလႅၼ်လိၼ်လႄႈ ၵူၼ်းၵႃႉၶၢႆၸိူဝ်းၼႆႉ ထူပ်းတၢင်းယၢပ်ႇၽိုတ်ႇလိူဝ်ႁႅင်း ၵိၼ်းၸႂ်ၵၼ်။

- Subscription -

ၽၵ်းတူ ဢၼ်ပဵၼ်တၢင်းၵၢၼ် ၶဝ်ႈဢွၵ်ႇ တီႈမူႇၸေႊ ၸိုင်ႈတႆးပွတ်းႁွင်ႇၼႆႉ တေမီး 3 တီႈ မိူၼ်ၼင်ႇ ၽၵ်းတူႁေႃၶမ်းလူင်၊ ၽၵ်းတူမၢၼ်ႈဝဵင်းလႄႈ ၽၵ်းတူၸၢင်ႉၽိူၵ်ႇ ၸိူဝ်းၼႆႉၵေႃႈ ပိၵ်ႉဢိုတ်းဝႆႉမူတ်း။ လိူဝ်သေၼၼ်ႉ ၽၵ်းတူ ဢၼ်ၶဝ်ႈဢွၵ်ႇ ၵႂႃႇမႃးၸူးၵၼ် ဢမ်ႇပဵၼ်တၢင်းၵၢၼ်ၸိူဝ်းၼၼ်ႉၵေႃႈ ပိၵ်ႉဢိုတ်းမိူၼ်ၵၼ်မူတ်း ပႃးၸဵမ်တႃႈႁိူဝ်း။

ၼၢင်းၶမ်းလႅင်း ၵူၼ်းၵႃႉၶၢႆ ၽၵ်းၶဵဝ် လႅၼ်လိၼ်တႆး – ၶႄႇ လၢတ်ႈတီႈၽူႈတွႆႇႁွၵ်ႈဝႃႈ “ၵႃႈၸူဝ်ႈပိူၼ်ႈပိၵ်ႉၽၵ်းတူ တၢင်းၶဝ်ႈဢွၵ်ႇမႃးၼႆႉ ၽၵ်းၶဵဝ်ၼႆႉ ဢမ်ႇၶၢႆလီၶႃႈယဝ်ႉ၊ သိုဝ်ႉယၢပ်ႇၶၢႆယၢပ်ႇ ၵူၼ်းသိုဝ်ႉၸၢႆႇၵေႃႈ ဢမ်ႇပေႃးမီး မိူၼ်မိူဝ်ႈၵူႈပွၵ်ႈယဝ်ႉ။ ၽၵ်းၼႆႉ ၵမ်ႈၼမ်လႆႈတေႃႉဢဝ်တၢင်းမိူင်းၶႄႇမႃးၶၢႆ။ မိူဝ်ႈၵူႈပွၵ်ႈတႄႉ ႁဝ်းၶႃႈ တေၶဝ်ႈၵႂႃႇ တၢင်းမိူင်းၶႄႇသေ တေႃႉမႃးၶၢႆတၢင်းမိူင်းႁဝ်းၵမ်ႈသိုဝ်ႈ၊ တေႃႈလဵဝ်ၼႆႉ လႆႈၸႂ်ႉပီႈၼွင်ႉႁဝ်းတၢင်းၾင်ႇမိူင်းၶႄႇ တေႃႉမႃးသူင်ႇပၼ်တီႈလႅၼ်လိၼ်ၼႆႉၶႃႈဢေႃႈ။ ႁဝ်းၶႃႈလႆႈပၼ်ၵႃႈမၼ်းသုင် တိူဝ်းမႃးထႅင်ႈ။ မိူဝ်ႈႁဝ်းၶႃႈ ၶဝ်ႈၵႂႃႇဢဝ်ႁင်းၵူၺ်းတႄႉ လႆႈပၼ်ၵႃႈၶၼ်မၼ်းထုၵ်ႇ တိူဝ်းလႆႈၼမ်ႉတွၼ်းမၼ်း” ဝႃႈၼႆ။

ၵူၼ်းတေႃႉမႃးသူင်ႇတီႈလႅၼ်လိၼ်ၼႆႉ သင်ဝႃႈ ပလိၵ်ႈၶႄႇၶဝ်ႁၼ်ၸိုင် ထုၵ်ႇတီႉၺွပ်း။ ၵွပ်ႈၼၼ် ၵႃႈတေႃႉသူင်ႇ ဢဝ်မႃး၊ ၵႃႈသိုဝ်ႉၽၵ်းၸိူဝ်းၼႆႉ လႆႈပၼ်မူတ်းမူတ်းလႄႈ တႃႇတေလႆႈမႃးၶၢႆၼႆႉဢမ်ႇငၢႆႈငၢႆႈ။ တေႃႈလဵဝ် ၵူၼ်းသိုဝ်ႉၵေႃႈဢမ်ႇပေႃးမီး ၽၵ်းၶဵဝ်ၼႆႉ ဢမ်ႇၶၢႆၵႃႈၵေႃႈ သမ်ႉဢမ်ႇလႆႈၼမ်ႉတွၼ်း/မျႅတ်ႈမၼ်း ယွၼ်ႉၼၼ်လႄႈ ႁဝ်းၶႃႈ ၵူၼ်းၵႃႉၽၵ်းၶဵဝ်ၼႆႉ ထူပ်းတၢင်းယၢပ်ႇၽိုတ်ႇၵၼ်တႄႉတႄႉၶႃႈယဝ်ႉ ၼၢင်းၶမ်းလႅင်း သပ်းလႅင်းၼႄၼင်ႇၼႆ။

ၽေးတၢင်းပဵၼ်ၶူဝ်ႊဝိတ်ႉ – 19 ၼႆႉ တုမ်ႉတိူဝ်ႉၵၢၼ်ပၢႆးမၢၵ်ႈမီး ၵူႈလွင်ႈလွင်ႈ။ ၵူၼ်းယူႇသဝ်းၸွမ်းလႅၼ်လိၼ် ဢွၼ်ၵၼ် ထူပ်းတၢင်းယၢပ်ႇၽိုတ်ႇၵိၼ်းၸႂ်ၵၼ်လိူဝ်ႁႅင်း၊ မိူၼ်ၼင်ႇ တၢင်းၸႄႈဝဵင်းမူႇၸေႊၼႆႉ ႁၢၼ်ႉၶၢႆၶူဝ်းၵေႃႈ ဢမ်ႇမီးၵူၼ်းမႃးသိုဝ်ႉမႃးၸၢႆႇၵၼ် ယဵၼ်သီႇသီႇဝႆႉသေ ၵူၼ်းမိူင်းၵေႃႈ ဢွၼ်ၵၼ်ပႅင်းၵိၼ်ပႅင်းၸၢႆႇၵၼ်မႃး တႄႉတႄႉ ဝႃႈၼႆ။

ပႃႈၸိင်ႇဢူႉ ၵူၼ်းၵႃႉၶၢႆ ၶူဝ်းၵုၼ်ႇ လႅၼ်လိၼ်တႆး – ၶႄႇ လၢတ်ႈတီႈၽူႈတွႆႇႁွၵ်ႈဝႃႈ “တင်ႈတႄႇဢိုတ်းၽၵ်းတူၼႆႉမႃး ၶူဝ်းၵုၼ်ႇသင်ၵေႃႈ ဢမ်ႇၶၢႆလီၶႃႈ။ ၵူၼ်းတၢင်းၾင်ႇမိူင်းၶႄႇ တေမႃးသိုဝ်ႉမႃးၸၢႆႇတၢင်းၼႆႉၵေႃႈဢမ်ႇမီး ၶူဝ်းၵုၼ်ႇၼႆႉ ဢမ်ႇလႆႈၶၢႆ၊ ပိုတ်ႇႁၢၼ်ႉၶၢႆယူႇၵေႃႈ ဢမ်ႇမီးၵူၼ်းမႃးသိုဝ်ႉ မိူၼ်မိူဝ်ႈၵူႈပွၵ်ႈၼၼ်ႉ။ ၶၢႆတေႃႇၵူၼ်းၼႂ်းၸႄႈဝဵင်း ၵူၼ်းႁိမ်းႁွမ်းႁဝ်းၶႃႈၵေႃႈ ဢမ်ႇလႆႈၶၢႆၵႃႈႁိုဝ်ၶႃႈ ယွၼ်ႉဝႃႈ ၵူၼ်းမိူင်းႁဝ်းၼႆႉ ၶူဝ်းသူၼ်ပိူၼ်ႈၵေႃႈ ဢမ်ႇလႆႈၶၢႆၵၼ်လႄႈ တႃႇတေမႃးသိုဝ်ႉမႃးၸၢႆႇၵေႃႈဢေႇၼႃႇၶႃႈ ၵူၼ်းမိူင်းႁဝ်း ဢွၼ်ပႅင်းၵိၼ် ပႅင်းၸၢႆႇၵၼ်ၶႃႈယဝ်ႉ” ဝႃႈၼႆ။

သိုပ်ႇလၢတ်ႈဝႃႈ “ ယွၼ်ႉၼၼ်လႄႈ တေႃႈလဵဝ်ၼႆႉ 3 ပုၼ်ႈ 1 ပုၼ်ႈၵူၺ်းၶႃႈယဝ်ႉ ဢၼ်လႆႈၶၢႆၼႆႉ တႃႇ 2 ပုၼ်ႈတႄႉ ၶၢတ်ႇပႅတ်ႈလုမ်းလုမ်း ဢမ်ႇလႆႈၶၢႆၼၼ်ႉၶႃႈယဝ်ႉ။ မိူဝ်ႈၵူႈပွၵ်ႈတႄႉ တေမီးပီႈၼွင်ႉႁဝ်းတၢင်းၾင်ႇမိူင်းၶႄႇၼၼ်ႉ ၶဝ်ႈမႃးသိုဝ်ႉၸၢႆႇၵၼ်ၼမ်ၶႃႈဢေႃႈ။ တေႃႈလဵဝ်ၼႆႉ ၵူၼ်းတၢင်းၾင်ႇပူၼ်ႉၵေႃႈ ဢမ်ႇမႃးလႆႈ၊ ၵူၼ်းတၢင်းၾင်ႇၼႆႉၵေႃႈ ဢမ်ႇၵႂႃႇလႆႈသေ ၵၢၼ်ပၢႆးမၢၵ်ႈမီးၵူႈဢၼ်ဢၼ်ၼႆႉ တုမ်ႉတိူဝ်ႉႁၢဝ်ႈႁႅင်းတႄႉတႄႉၶႃႈယဝ်ႉ” ဝႃႈၼႆ။

Photo by – ထုင်ႉႁူၺ်ႈလီ/ ၽၵ်းတူလႅၼ်လိၼ် တီႈမၢၼ်ႈႁဵဝ်း ၼႂ်းဢိူင်ႇ 19 မၢၼ်ႈ ၸႄႈဝဵင်းမူႇၸေႊ

လွင်ႈတေပိုတ်ႇၽၵ်းတူ ဢမ်ႇပိုတ်ႇဢၼ်ဝႃႈၼႆႉ မၼ်းယူႇတီႈ တၢင်းလူင်ပွင်ၸိုင်ႈမိူင်းၶႄႇၵူၺ်း သင်ဝႃႈ တၢင်းၾင်ႇမိူင်းၶႄႇ ၽွမ်ႉပိုတ်ႇၼႆ တၢင်းၾင်ႇမိူင်းတႆးၵေႃႈ တိုၼ်းၽွမ်ႉပိုတ်ႇယဝ်ႉ။

လုင်းသႅင်ၶမ်းႁိူင်း ၵူၼ်းမိူင်းမူႇၸေႊ လၢတ်ႈတီႈၽူႈတွႆႇႁွၵ်ႈဝႃႈ “ ၵႃႈၸူဝ်ႈပိၵ်ႉၽၵ်းတူမႃးၼႆႉ ၵၢၼ်ပၢႆးမၢၵ်ႈမီး တၢင်းမူႇၸေႊ ႁဝ်းၶႃႈၼႆႉ တုမ်ႉတိူဝ်ႉတႄႉတႄႉဝႃႈဝႃႈၼၼ်ႉၶႃႈယဝ်ႉ။ ၵူၼ်းမိူင်းၵေႃႈ ပႅင်းၵိၼ်ပႅင်းၸၢႆႇၵၼ်တႄႉတႄႉ။ ပိူင်ၼိုင်ႈၵေႃႈ ယွၼ်ႉဝႃႈ ၶူဝ်းသူၼ်ၵူၼ်းမိူင်းႁဝ်း မိူၼ်ၶဝ်ႈၵၢပ်ႇ ၸိူဝ်းၼႆႉ ဢမ်ႇလႆႈတေႃႉဢွၵ်ႇၶၢႆတၢင်းမိူင်းၶႄႇ၊ ဢွၼ်ၵၼ် သုမ်းတႄႉသုမ်းဝႃႈ၊ ၵူၼ်းသိုဝ်ႉၵူၼ်းၸၢႆႇ မိူၼ်မိူဝ်ႈၵူႈပွၵ်ႈၵေႃႈ ဢမ်ႇမီးယဝ်ႉ တေႃႈလဵဝ် လူတ်းယွမ်း လူင်းတႄႉတႄႉ။ တေလႆႈဝႃႈ တုမ်ႉတိူဝ်ႉၵူၼ်းမိူင်းတႄႉတႄႉၶႃႈယဝ်ႉ တၢင်းပဵၼ်ၶူဝ်ႊဝိတ်ႉ 19 ၼႆႉ” ဝႃႈၼႆ။

ဢိင်ၼိူဝ်လွင်ႈၼႆႉသေ ယူႇတီႈၵူၼ်းမိူင်းပိုၼ်ႉတီႈမူႇၸေႊ ၸဝ်ႈၵုၼ်ႇၶဝ်ၸိူဝ်းၼႆႉ မုင်ႈမွင်း ႁႂ်ႈၸဵဝ်းပိုတ်ႇၽၵ်းတူ မိူင်းၽႂ်းၽႂ်းၵၼ်ယူႇ။

ၸၢႆးၵျေႃႇတဵင်း ၽူႈတႅၼ်းသၽႃးၸႄႈမိူင်းၶဵတ်ႇလိူၵ်ႈတင်ႈမၢႆ 2 ၸႄႈဝဵင်းမူႇၸေႊ လၢတ်ႈတီႈၽူႈတွႆႇႁွၵ်ႈဝႃႈ “ တေႃႈလဵဝ်ၼႆႉ ၵၢၼ်ပၢႆးမၢၵ်ႈမီးၸွမ်းလႅၼ်လိၼ်ၼႆႉ တုမ်ႉတိူဝ်ႉတႄႉတႄႉၶႃႈယဝ်ႉ။ မိူဝ်ႈလဵဝ်ၼႆႉ ၵူၼ်းၶဝ်ႈဢွၵ်ႇ ၵေႃႈယၢပ်ႇ ၶူဝ်းၵုၼ်ႇတႃႇၶဝ်ႈဢွၵ်ႇၵေႃႈယၢပ်ႇ ယၢပ်ႇယူႇၵူႈမဵဝ်းၶႃႈယဝ်ႉ။ ၵူၼ်းမိူင်းၵေႃႈ တုမ်ႉတိူဝ်ႉတႄႉတႄႉၶႃႈယဝ်ႉ ယွၼ်ႉၶူဝ်းသူၼ်ဢၼ်ဢွၵ်ႇၼႂ်းသူၼ်ၸိူဝ်းၼၼ်ႉၵေႃႈ ဢမ်ႇလႆႈတေႃႉၶၢႆတၢင်းမိူင်းၶႄႇသေ ဢွၼ်ၵၼ်သုမ်းတႄႉသုမ်းဝႃႈ ၶႃႈဢေႃႈ” ဝႃႈၼႆ။

ယွၼ်ႉပိူဝ်ႈမီးၵူၼ်းတိတ်းၸပ်းတၢင်းပဵၼ်ၶူဝ်ႊဝိတ်ႉ 19 လႄႈ မိူင်းၶႄႇ ၸင်ႇပိၵ်ႉၽၵ်းတူလႅၼ်လိၼ်။ ၵူၼ်းမိူင်းမုင်ႈမွင်းႁႂ်ႈၸဵဝ်းပိုတ်ႇပၼ်ၶိုၼ်းယူႇသေတႃႉ ယၢမ်းလဵဝ်ၵေႃႈယင်းတိုၵ်ႉမီးၵူၼ်းတိတ်းၸပ်းတၢင်းပဵၼ်ဝႆႉယူႇၵေႃႉၼိုင်ႈလႄႈ ငဝ်းလၢႆးလႅပ်ႈတေၵႂႃႇထႅင်ႈႁိုင်ယူႇႁိုဝ် ၼႆ ၵူၼ်းပိုၼ်ႉတီႈလၢမ်ႈၵၼ်ဝႆႉၼင်ႇၼႆ။

Photo by – Sai Khin Maung/ ပၢင်ၵၢတ်ႇမၢၵ်ႇမႆႉ တီႈ 105 လၵ်း မူႇၸေႊ

ၸၢႆးၵျေႃႇတဵင်း သိုပ်ႇလၢတ်ႈဝႃႈ “တွၼ်ႈတႃႇ တေပိုတ်ႇၽၵ်းတူမိူင်းလႅၼ်လိၼ်တႆး – ၶႄႇၼႆႉ ယူႇတီႈတၢင်း လူင်ပွင်ၸိုင်ႈမိူင်းၶႄႇၵူၺ်း။ ၼႂ်းလိူၼ်ၵျုၼ်ႊၼႆႉ တၢင်းမိူင်းၶႄႇၶဝ် တေပိုတ်ႇဢမ်ႇပိုတ်ႇဢၼ်ဝႃႈၼၼ်ႉ ပႆႇၸၢင်ႈလၢမ်းလႆႈ။  ယွၼ်ႉဝႃႈ တၢင်းမူႇၸေႊၼႆႉ ယၢမ်းလဵဝ် တိုၵ်ႉမီးဝႆႉၵူၼ်းတိတ်းၸပ်းတၢင်းပဵၼ်ၶူဝ်ႊဝိတ်ႉ – 19 ဝႆႉ 1 ၵေႃႉယူႇ။ သင်ဝႃႈတၢင်းမိူင်းႁဝ်း ဢမ်ႇမီးတၢင်းပဵၼ်ယဝ်ႉ လူင်ပွင်ၸိုင်ႈၶႄႇၶဝ် တေပိုတ်ႇ ပၼ်ယူႇၶႃႈယူဝ်ႉ၊ ပေႃးဝႃႈ တိုၵ်ႉမီးတၢင်းပဵၼ်ယူႇတႄႉ ၶဝ်တေဢမ်ႇပႆႇလႅပ်ႈပိုတ်ႇ ၶဝ်ၵေႃႈၵူဝ်ၼၼ်ႉၶႃႈၼႃႇ” ဝႃႈၼႆ။

ထႅင်ႈလွင်ႈၼိုင်ႈ ၽၵ်းတူလႅၼ်လိၼ်ပိၵ်ႉဢိုတ်းယဝ်ႉဝႃႈၼႆသေတႃႉ ၶူဝ်းၵုၼ်ႇဢၼ်လုၵ်ႉတၢင်းမိူင်းႁူမ်ႈတုမ် တေႃႉသူင်ႇၸူးတၢင်းမိူင်းၶႄႇၼၼ်ႉတႄႉ တိုၵ်ႉတေႃႉသူင်ႇၶဝ်ႈၶၢႆၸူးလႆႈယူႇ၊ ၵူၺ်းၵႃႈ ၵႃးတၢင်ႇၵုၼ်ႇၵူၺ်း တေၶဝ်ႈလႆႈ၊ ၵူၼ်းႁေႃႈၵႃး ၵူၼ်းၸွမ်းၵႃးတႄႉ ဢမ်ႇၶဝ်ႈလႆႈ ၼႆႉၵေႃႈ ပဵၼ်ဢၼ်ယၢပ်ႇၽိုတ်ႇတႃႇၸဝ်ႈရူတ်ႉၵႃး  တႄႉတႄႉ ဝႃႈၼႆ။

ယွၼ်ႉတၢင်းပဵၼ်ၶူဝ်ႊဝိတ်ႉ – 19 သေ ယူႇတီႈတၢင်းမိူင်းၶႄႇ လႆႈၸီႉသင်ႇပိၵ်ႉဢိုတ်းၽၵ်းတူမိူင်းဝႆႉၸူဝ်ႈၶၢဝ်း ပိူဝ်ႈတႃႇၵုမ်းၵမ်လႆႈတၢင်းပဵၼ် ၼင်ႇႁိုဝ်ပေႃးတေဢမ်ႇလၢမ်းၽႄႈႁၢဝ်ႈႁႅင်း။ ၵူၺ်းၵႃႈ ၵၢၼ်ဢိုတ်းႁပ်းၽၵ်းတူမိူင်းၼႆႉ တုမ်ႉတိူဝ်ႉၵၢၼ်ပၢႆးမၢၵ်ႈမီး ၶူဝ်းသူၼ်ၵူၼ်းမိူင်း၊ တၢင်းပွတ်းထုင်ႉမၢဝ်းၼႆႉ ဢွၼ်ၵၼ်လူႉသုမ်းတင်းၼမ်တင်းလၢႆ၊ မၢင်ၵေႃႉ ထိုင်တီႈပေႃးလႆႈ ထွၵ်ႇပႅတ်ႈၼႂ်းၼမ်ႉမၢဝ်းၵေႃႈမီး။ မၢင်ၵေႃႉ ထွၵ်ႇၵွင်ပႅတ်ႈၸွမ်းၶၢင်ႈတၢင်းလူင်ၵေႃႈမီး၊ မၢင်ၵေႃႉ တေႃႉမိူဝ်းၸႅၵ်ႇ ပၼ်ပီႈၼွင်ႉဢူၺ်းၵေႃႉၵၼ် ၸွမ်းၼႂ်းၶူးၼႂ်းဝဵင်းၵေႃႈမီး ယွၼ်ႉဢမ်ႇၸၢင်ႈတေႃႉသူင်ႇၶၢႆတေႃႇတၢင်းမိူင်းၶႄႇ  ။

 

 

ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ

- Subscription -
- SHAN's Apps -spot_img

ၶၢဝ်ႇလိုၼ်းသုတ်း