သိုၵ်းမၢၼ်ႈဢွၵ်ႇငႃးသိုၵ်းသွၵ်ႈတဝ်ႈထိူၼ်ႇၶိူဝ်း ၶိုၼ်ႈၵႂႃႇတၢင်း လွႆပၢင်ၶူင်ႉ ပၢင်ၶႃး ၽႃႇၺႃး RCSS/SSA သေ လေႃႇတိုၵ်း သွင်ၾၢႆႇပဵၼ်သိုၵ်းၵၼ် မိူဝ်ႈဝႃး ယၢမ်းႁူဝ်ၶမ်ႈ။

ဝၼ်းတီႈ 10/6/2020 ယၢမ်းႁူဝ်ၶမ်ႈ 4 မူင်းၶိုင်ႈ တေႃႇ 5 မူင်းပၢႆ သိုၵ်းလူင်ပွင်ၸိုင်ႈမၢၼ်ႈ တပ်ႉ ၶမယ 326 တင်း ၶွင်ႇ သီႇဢဝ်ၶိုၼ်းၸိုင်ႈတႆး/ တပ်ႉသိုၵ်းၸိုင်ႈတႆး (RCSS/SSA) ပဵၼ်ပၢင်တိုၵ်းၵၼ် တီႈလွႆပၢင်ၶႃး ဢိူင်ႇမိူင်းတုင် ၸႄႈဝဵင်း သီႇပေႃႉ ၸိုင်ႈတႆးပွတ်းႁွင်ႇ။ လွႆပၢင်ၶႃးၼႆႉ မီးၸဵင်ႇၸၢၼ်းဝၼ်းဢွၵ်ႇ ဝဵင်းသီႇပေႃႉ ၼႂ်းၵႄႈသီႇပေႃႉ – ၵေးသီး၊ ၾၢႆႇ ႁွင်ႇၵေးသီး။

ၸဝ်ႈသိုၵ်းဢုမ်ႈၶိူဝ်း ၽူႈၶၢၼ်ပၢၵ်ႇ RCSS လၢတ်ႈတီႈၽူႈတွႆႇႁွၵ်ႈဝႃႈ “ ၸႂ်ႈၶႃႈဢေႃႈ လႆႈပဵၼ်ပၢင်တိုၵ်းၵၼ်။ လွင်ႈပဵၼ်ပၢင်တိုၵ်းၵၼ်ၼႆႉ သိုၵ်းမၢၼ်ႈၶဝ် ဢမ်ႇပွင်ႇၶၢဝ်ႇၸူးၵူၼ်းႁဝ်း၊ ယူႇတီႈၵူၼ်းသိုၵ်းႁဝ်းႁူႉသေ ပွင်ႇၶၢဝ်ႇပၼ်ၶဝ်ယူႇဝႃႈ ပေႃးသူၵႂႃႇမႃးၸွမ်းၼိူဝ်တၢင်းလူင်တႄႉ ဢမ်ႇပဵၼ်သင် ယႃႇပေၶဝ်ႈတဝ်ထိူၼ်ႇၼႃႈ ၼႂ်းထိူၼ်ႇၼႆႉ မီးၵူၼ်းႁဝ်းဢိူဝ်ႈ၊ ပေႃးသူၶဝ်ႈတဝ်ထိူၼ်ႇၼႆႉ မၼ်းတေၸၢင်ႈတုမ်ႉတိူဝ်ႉၺႃးၵၼ် ၵူၼ်းႁဝ်းလၢတ်ႈၶဝ်ၸိူင်ႉၼၼ်။ ၵူၺ်းၵႃႈ ၶဝ်ဢမ်ႇထွမ်ႇသေ လတ်းထိူၼ်ႇ လတ်းၶိူဝ်း သွၵ်ႈတဝ်တီႈၵူၼ်းႁဝ်းမီးလႄႈ ၸင်ႇလႆႈပဵၼ်ပၢင်တိုၵ်းၵၼ်” ဝႃႈၼႆ။

ၵဵဝ်ႇၵပ်းလွင်ႈၼႆႉ ၾၢႆႇ RCSS/SSA ဢွၵ်ႇၶၢဝ်ႇပိုၼ်ၽၢဝ်ႇ ဝႆႉၼႂ်း ဝႅပ်ႉသၢႆႉ တႆးလွတ်ႈ တမ်းၼႄ ၶူဝ်းသိုၵ်း၊ မၢၵ်ႇၵွင်ႈ၊ ၵူၺ်သၢၼ် ဢၼ်ယိုတ်းဢဝ်လႆႈမႃးတီႈငႃးသိုၵ်း လူင်ပွင်ၸိုင်ႈ၊ ၾၢႆႇသိုၵ်း RCSS ဢမ်ႇမီးလွင်ႈတိူဝ်ႉမၢတ်ႈ ။ ၾၢႆႇသိုၵ်းလူင်ပွင်ၸိုင်ႈမၢတ်ႇၸဵပ်းလူႉတၢႆ ၵႃႈႁိုဝ်ၼႆၵေႃႈ ဢမ်ႇတူၵ်ႇပႃးဝႆႉ။

ၸၢႆးလႅင်း ၵူၼ်းၼုမ်ႇ ဢၼ်တူင်ႉၼိုင်ဝႆႉတၢင်းပွတ်းတွၼ်ႈၼၼ်ႉ လၢတ်ႈတီႈၽူႈတွႆႇႁွၵ်ႈဝႃႈ “သိုၵ်းမၢၼ်ႈၼႆႉ ပဵၼ်တပ်ႉပၢင်ၸိူင်း၊ လုၵ်ႉတၢင်ႉယၢၼ်းမႃးပၵ်းယူႇဝႆႉပႆႇႁိုင်သင် ဢဵၼ်ႁႅင်းသိုၵ်းမီး 40 ၵေႃႉ၊ ၶဝ်ၶိုၼ်ႈၵႂႃႇတၢင်းၵုၼ်တီး သေ ၶိုၼ်ႈၸူးတၢင်းလွႆပၢင်ၶႃး ၺႃးတၢင်းသိုၵ်းတႆး RCSS ၼၼ်ႉၶႃႈယဝ်ႉ။ တင်းသွင်ၾၢႆႇ ပဵၼ်ပၢင်တိုၵ်းၵၼ်သေ သိုၵ်းမၢၼ်ႈတႄႉ လႆႈလူႉတၢႆ 2 ၵေႃႉ မၢတ်ႇၸဵပ်း 2 ၵေႃႉ ပႃးၸၼ်ႉ 2 တုမ်ႇ 1 ၵေႃႉ” ဝႃႈၼႆ။

လွႆပၢင်ၶႃးၼႆႉ မီးၼႂ်းၸႄႈဝဵင်းသီႇပေႃႉ ၼႂ်းၵႄႈသီႇပေႃႉ – ၵေးသီး၊ ပေႃးလုၵ်ႉၵေးသီးၵႂႃႇ တေႁိုင်မွၵ်ႈ 1 ၸူဝ်ႈမူင်း။ မီးၾၢႆႇႁွင်ႇလွႆတွၼ်း ဢိူင်ႇႁၢမ်းငၢႆး ၸႄႈဝဵင်းမိူင်းၵိုင် ဢၼ်သိုၵ်းလူင်ပွင်ၸိုင်ႈမၢၼ်ႈ ၶိုၼ်ႈယိုဝ်း သိုၵ်းတႆး RCSS ႁၢဝ်ႈႁႅင်း ပူၼ်ႉမႃးမိူဝ်ႈႁၢင်လိူၼ်ၾႅပ်ႊၿိဝ်ႊရီႊ လႄႈ ႁူဝ်လိူၼ်မၢတ်ႉၶျ် 2020 ၼႆႉ ဝႃႈၼႆ။

ၶွင်ႇသီႇဢဝ်ၶိုၼ်းၸိုင်ႈတႆး/ တပ်ႉသိုၵ်းၸိုင်ႈတႆး (RCSS/SSA) ၼႆႉ ပဵၼ်ၸုမ်းဢၼ်လူင်းလၢႆးမိုဝ်း ၵိုတ်းတိုၵ်းပတ်းပိုၼ်ႉ တူဝ်ႈမိူင်း NCA ၸုမ်းၼိုင်ႈ။

ႁွင်ႈၵၢၼ်ပိုၼ်ၽၢဝ်ႇ ၶွင် RCSS/SSA ဝႅပ်ႉသၢႆႉတႆးလွတ်ႈလႅဝ်း ဢွၵ်ႇဝႆႉဝႃႈ တင်ႈတႄႇ ၶွင်ႇသီႇဢဝ်ၶိုၼ်းၸိုင်ႈတႆး RCSS လူင်းလၢႆးမိုဝ်း ၵိုတ်းတိုၵ်းပတ်ႉပိုၼ်ႉတူဝ်ႈမိူင်း NCA မႃးၼႆႉ တႄႇဢဝ် ဝၼ်းတီႈ 31/12/2015 တေႃႇထိုင် 3/6/2020 ၼႂ်းၶၢဝ်းတၢင်း 4 ပီ သိုၵ်းလူင်ပွင်ၸိုင်ႈမၢၼ်ႈတင်း သိုၵ်း RCSS သွင်ၾၢႆႇလႆႈပဵၼ်ပၢင်တိုၵ်းၵၼ်မႃး 87 ပွၵ်ႈ ဝႃႈၼႆ။

ၼႂ်းၸုမ်းယိပ်းၵွင်ႈၵၢင်ႇ ၸၢဝ်းၶိူဝ်း 10 ၸုမ်း ဢၼ်လူင်းလၢႆးမိုဝ်း NCA တင်းသဵင်ႈၼႆႉ RCSS/SSA လႆႈပဵၼ်ပၢင်တိုၵ်းၵၼ် တင်း တပ်ႉသိုၵ်းလူင်ပွင်ၸိုင်ႈမၢၼ်ႈ ၼမ်လိူဝ်ပိူၼ်ႈ ၼႆယဝ်ႉ။