ၼႂ်းဝၼ်းလဵဝ်ၵူၺ်း သိုၵ်းလူင်ပွင်ၸိုင်ႈမၢၼ်ႈ တင်း သိုၵ်းတဢၢင်း TNLA ပဵၼ်ပၢင်တိုၵ်းၵၼ် 4 ပွၵ်ႈ ၼႂ်းၸိုင်ႈတႆးပွတ်းႁွင်ႇ။
ယူႇတီႈႁွင်ႈၵၢၼ်ပိုၼ်ၽၢဝ်ႇ ၶွင်တပ်ႉသိုၵ်းတဢၢင်း TNLA ဢွၵ်ႇဝႃႈ ၼႂ်းဝၼ်းတီႈ 4/6/2020 ဝၼ်းလဵဝ်ၵူၺ်း သိုၵ်းလူင်ပွင်ၸိုင်ႈမၢၼ်ႈ ၶဝ်ႈယိုဝ်းတပ်ႉသိုၵ်းတဢၢင်း ဢၼ်တူင်ႉၼိုင်ယူႇသဝ်းဝႆႉ ၼႂ်းၸိုင်ႈတႆးပွတ်းႁွင်ႇ။ ယၢမ်းၵၢင်ၼႂ် 10 မူင်းပၢႆ သွင်ၾၢႆႇပိုတ်းယိုဝ်းၵၼ် တီႈႁိမ်းဝၢၼ်ႈသူၺ်ႇမေႃႇ(ဝၢၼ်ႈလီႇသူး) ၵမ်းၼိုင်ႈ၊ ယၢမ်းဝၢႆးဝၼ်း 4 မူင်းၶိုင်ႈ ၼႂ်းၵႄႈမိူင်းယူႉ တင်း ဝၢၼ်ႈလူင်ၵၢင် ၵမ်းၼိုင်ႈ ၼႂ်းၸႄႈဝဵင်းၵူတ်ႉၶၢႆ ၸိုင်ႈတႆးပွတ်းႁွင်ႇ- ၼႆယဝ်ႉ။
လိူဝ်ၼၼ်ႉ ၼႂ်းၸႄႈဝဵင်းၼမ်ႉၶမ်း ၸိုင်ႈတႆးပွတ်းႁွင်ႇၵေႃႈ ယၢမ်းဝၢႆးဝၼ်း 2 မူင်းပၢႆ သွင်ၾၢႆႇလႆႈပဵၼ်ပၢင်တိုၵ်းၵၼ် တီႈႁိမ်းဝၢၼ်ႈတူၼ်ႈယုမ်း ၵမ်းၼိုင်ႈလႄႈ ယၢမ်းဝၢႆးဝၼ်း 4 မူင်းပၢႆ တီႈႁိမ်းမၢၼ်ႈၸၢပ်ႈ(မန်စပ်ကျေးရွာ)ၵမ်းၼိုင်ႈ ဝႃႈၼႆ။
“တႄႇဢဝ် ဝၼ်းတီႈ 1 လိူၼ်ၵျုၼ်ႊတေႃႇထိုင် ဝၼ်းတီႈ 4 လိူၼ်ၵျုၼ်ႊၼႆႉ တပ်ႉသိုၵ်းလူင်ပွင်ႈၸိုင်ႈမၢၼ်ႈ ႁၢင်ႈႁႅၼ်း ၽိုတ်ႉၸူးၼႂ်းၼႃႈတီႈ တပ်ႉသိုၵ်းတဢၢင်း တူင်ႉၼိုင်ယူႇဝႆႉၼၼ်ႉသေ သွင်ၾၢႆႇလႆႈပဵၼ်ပၢင်တိုၵ်းၵၼ် တင်းမူတ်း 7 ပွၵ်ႈယဝ်ႉ” ႁွင်ႈၵၢၼ်ပိုၼ်ၽၢဝ်ႇသိုၵ်းတဢၢင်း ဢွၵ်ႇဝႆႉၼင်ႇၼႆ။
ထႅင်ႈၾၢႆႇၼိုင်ႈၵေႃႈ ယူႇတီႈတပ်ႉသိုၵ်းလူင်ပွင်ၸိုင်ႈမၢၼ်ႈ ပိုၼ်ၽၢဝ်ႇဢွၵ်ႇမႃး မိူဝ်ႈဝၼ်းတီႈ 9 လိူၼ်မေႊၼၼ်ႉဝႃႈ တေၵိုတ်းတိုၵ်းဝႆႉ ၶၢဝ်းတၢင်း 3 လိူၼ် ဝႃႈၼႆ။
ထႅင်ႈၾၢႆႇၼိုင်ႈတၢင်းၼိုင်ႈ ယူႇတီႈၸုမ်းဢူၺ်းလီ ဢၼ်မီးလုၵ်ႈၸုမ်း ၵဝ်ႈၵၢင်ႉ၊ တဢၢင်းလႄႈ ရၶႅင်ႇ ႁူမ်ႈၵၼ်ၼၼ်ႉၵေႃႈ ပိုၼ်ၽၢဝ်ႇၵိုတ်းတိုၵ်း တႃႇၶၢဝ်းတၢင်း 3 လိူၼ် တင်ႈတႄႇဝၼ်းတီႈ 1 လိူၼ်ၵျုၼ်ႊ တေႃႇထိုင်လိူၼ် ဢေႃႊၵတ်ႊသ် ဝၼ်းတီႈ 31 ၊ ၼင်ႇႁိုဝ် တင်းသွင်ၾၢႆႇ ပေႃးတေၵိုတ်းတိုၵ်းၵၼ်လႆႈၼႆသေ ယိုၼ်းမိုဝ်းဝႆႉတၢင်းၾၢႆႇသိုၵ်း လူင်ပွင်ၸိုင်ႈယူႇ- ၼႆယဝ်ႉ။
