သိုၵ်းလူင်ပွင်ၸိုင်ႈမၢၼ်ႈ လႄႈ သိုၵ်းပီႇတုၸိတ်ႉ တပ်ႉပႂ်ႉလႅၼ်လိၼ် ႁူမ်ႈၵၼ်ပိုတ်းယိုဝ်းတပ်ႉပၢင်သဝ်း RCSS တီႈၸႄႈဝဵင်းမိူင်းတူၼ် ၽူႈၶၢၼ်ပၢၵ်ႇ RCSS လၢတ်ႈ။

မိူဝ်ႈၼႆႉ ဝၼ်းတီႈ 3/6/2020 ယၢမ်းၵၢင်ၼႂ်မွၵ်ႈ 8 မူင်းပၢႆ ထိုင် 10 မူင်း၊ သိုၵ်းလူင်ပွင်ၸိုင်ႈမၢၼ်ႈ တပ်ႉၶလယ 65 လႄႈ တပ်ႉပႂ်ႉလႅၼ်လိၼ် BGF 1007 (ၸုမ်းၵျပီးၵွႆႇ) ႁူမ်ႈၵၼ်ဢဵၼ်ႁႅင်း 100 ပၢႆ လႆႈပဵၼ်ပၢင်တိုၵ်းၵၼ်တင်း ၶွင်ႇသီႇဢဝ်ၶိုၼ်းၸိုင်ႈတႆး/ တပ်ႉသိုၵ်းၸိုင်ႈတႆး (RCSS/SSA) တီႈၵိဝ်ႇၼမ်ႉၶမ်း ဢိူင်ႇၼႃးၵွင်းမူး ၸႄႈဝဵင်းမိူင်းတူၼ် ၸိုင်ႈတႆးပွတ်းဢွၵ်ႇၶူင်း-ၼႆယဝ်ႉ။

ၸဝ်ႈႁၢၼ် ၶမ်းၸၢမ်ႇ ၽူႈၶၢၼ်ပၢၵ်ႇ RCSS လၢတ်ႈတီႈၽူႈတွႆႇႁွၵ်ႈဝႃႈ- “ၸႂ်ႈၶႃႈဢေႃႈ သွင်ၾၢႆႇလႆႈပဵၼ်ပၢင်တိုၵ်းၵၼ်၊ တၢင်းၾၢႆႇသိုၵ်းမၢၼ်ႈ ပဵၼ်တပ်ႉၶလယ 65 တင်း BGF 1007 ၸုမ်းၵျပီးၵွႆႇ၊ ၶဝ်ႁူမ်ႈၵၼ်သေ ၶိုၼ်ႈမႃးတူင်ႉၼိုင် တၢင်းဝၢၼ်ႈၼႃးၽႃယွင်းယဝ်ႉ ဢဝ်ၵွင်ႈ M-79, Mortar 60mm ၸိူဝ်းၼႆႉယိုဝ်းၶိုၼ်ႈၸူးတီႈသိုၵ်း RCSS ႁဝ်း တီႈပၢင်သဝ်းၸူဝ်ႈၶၢဝ်း ၵိဝ်ႇၼမ်ႉၶမ်း တႄႇဢဝ် 8 မူင်း ထိုင် 10 မူင်းၼႆႉ။ ယွၼ်ႉရူတ်ႉၵႃးတၢင်ႇၵူၼ်းသိုၵ်းမၢၼ်ႈ တိုၵ်ႉထႅမ်ႁႅင်းၶဝ်ထႅင်ႈယူႇလႄႈ ၾၢႆႇ RCSS ႁဝ်းလႆႈထွၼ်ပၼ်။ ၾၢႆႇ RCSS ႁဝ်းၶႃႈ ဢမ်ႇမီးလွင်ႈတိူဝ်ႉမၢတ်ႇၸဵပ်း လူႉတၢႆသင်” ဝႃႈၼႆ။

ဢိင်ၼိူဝ်သွင်ၾၢႆႇပဵၼ်ပၢင်တိုၵ်းၵၼ်သေ ၾၢႆႇသိုၵ်းလူင်ပွင်ၸိုင်ႈမၢၼ်ႈ တိုၵ်ႉထႅမ်ႁႅင်းသိုၵ်းတၢင်းပွတ်း ဝၢၼ်ႈၼႃးၽႃယွင်းထႅင်ႈယူႇ လႄႈ ၵူၼ်းပိုၼ်ႉတီႈမႆႈၸႂ်ၵူဝ်ပၢင်တိုၵ်းပဵၼ်ႁၢဝ်ႈႁႅင်းမႃး ။

“ပေႃးမႃးတူၺ်းလွင်ႈပိူင်ပဵၼ်မၼ်းတႄႉ မိူဝ်ႈတႄႇမၼ်း သိုၵ်းမၢၼ်ႈဝႃႈသိုၵ်းတႆး RCSS ထူဝ်းသိုၵ်း။ သိုၵ်းတႆးသမ်ႉတွပ်ႇဝႃႈ ႁဝ်းၶႃႈမႃးပႂ်ႉၵႅတ်ႇတၢင်း ၵူၼ်းတေႃႉသူင်ႇယႃႈမဝ်းၵမ်ၵူၺ်း၊ ဢမ်ႇၸႂ်ႈထူဝ်းၼႃႈတီႈ ထူဝ်းသိုၵ်း။ ယွၼ်ႉၼၼ် သိုၵ်းမၢၼ်ႈ လႅပ်ႈဢဝ်တိုဝ်ႉတၢင်းၼႆႉသေ ၵႂႃႇပႂ်ႉတၢင်းသွၵ်ႈတဝ် သိုၵ်းတႆး၊ ၵူဝ်သိုၵ်းတႆး တီႉလႆႈယႃႈမဝ်းၵမ် ႁိုဝ်ၵေႃႈ ဢမ်ႇႁူႉ။ မိူဝ်ႈၼၼ်ႉ သိုၵ်းတႆးသမ်ႉ တီႉလႆႈယႃႈမဝ်းၵမ်တႄႉ ထိုင်တီႈၾၢႆႇၽဵဝ်ႉမူၺ်ႉယႃႈမဝ်းၵမ် RCSS ပေႃးလႆႈၵႂႃႇမွပ်ႈပၼ်တီႈပလိၵ်ႈမၢၼ်ႈၶဝ်လူးၼၼ်ႉ” ၵူၼ်းပိုၼ်ႉတီႈ ဢၼ်ၸမ်ၸႂ် RCSS ပွတ်းမိူင်းတူၼ် ဢမ်ႇၶႂ်ႈဢွၵ်ႇၸိုဝ်ႈၵေႃႉၼိုင်ႈ လၢတ်ႈၼႄ ၽူႈတွႆႇႁွၵ်ႈ ၼင်ႇၼႆ။

မိူဝ်ႈဝၼ်းတီႈ 25/3/2020 ၼၼ်ႉၵေႃႈ တပ်ႉသိုၵ်းလူင်ပွင်ၸိုင်ႈမၢၼ်ႈ 3 တပ်ႉၵွင် တပ်ႉၶလယ 225 ၊ ၶလယ 277 တင်း ၶမယ 519 ႁူမ်ႈၵၼ်ဢဵၼ်ႁႅင်း မွၵ်ႈ 40 ၶိုၼ်ႈၽႃႇၺႃးၵူၼ်းသိုၵ်း တပ်ႉသိုၵ်းၸိုင်ႈတႆး (RCSS/SSA) တီႈၵွင်းႁူဝ်ၼမ်ႉ ၸဵင်ႇၸၢၼ်းဝၼ်းဢွၵ်ႇ ၼႂ်းၸႄႈဝဵင်းမိူင်းတူၼ် ၼႆယဝ်ႉ။

ၶွင်ႇသီႇဢဝ်ၶိုၼ်းၸိုင်ႈတႆး/ တပ်ႉသိုၵ်းၸိုင်ႈတႆး (RCSS/SSA) ၼႆႉ ပဵၼ်ၸုမ်းဢၼ်လူင်းလၢႆးမိုဝ်း ၵိုတ်းတိုၵ်း ပတ်းပိုၼ်ႉတူဝ်ႈမိူင်း NCA ဝႆႉၸုမ်းၼိုင်ႈ။