တပ်ႉသိုၵ်းလူင်ပွင်ၸိုင်ႈမၢၼ်ႈ တီႉၺွပ်းၵူၼ်းလူင်ဝၢၼ်ႈ သူင်ႇသၢႆသိုၵ်း သွၵ်ႈတဝ်ထိူၼ်ႇသေဢမ်ႇၵႃး ယင်းပၢႆတဵင်ၵႂၢမ်း ၼၵ်းဝႆႉဝႃႈ ပေႃးႁပ်ႉလဵင်ႉၶဝ်ႈ ၵူၼ်းထိူၼ်ႇ ၸိူဝ်းလူင်းလၢႆးမိုဝ်း NCA တေပၼ်တူတ်ႈတၢမ်ႇ ဝႃႈၼႆ။
ဝၼ်းတီႈ 13/4/2020 ယူႇတီႇၵဝ်ႉငဝ်ႈသုၼ်ႇလႆႈၵူၼ်း ၸိုင်ႈတႆး (SHRF) ဢွၵ်ႇၽိုၼ်တၢမ်းငဝ်းလၢႆးဝႃႈ သိုၵ်းလူင်ပွင် ၸိုင်ႈ မၢၼ်ႈ ၶမယ 519 တီႉၺွပ်းလုင်းႁဵင်လႄႈ လုၵ်ႈၸၢႆးလုင်းႁဵင် ဝၢၼ်ႈမိူင်းဢဵၵ်ႇ ဢိူင်ႇၾၢႆၶႄႇ ၼႂ်းၸႄႈဝဵင်းမိူင်းတူၼ် ၸိုင်ႈ တႆးပွတ်းဢွၵ်ႇၶူင်း တဵၵ်းၸႂ်ႉၼႄတၢင်း။ ၼႆႉပဵၼ်လွင်ႈပူၼ်ႉပႅၼ်သုၼ်ႇလႆႈၵူၼ်းမိူင်းသေဢမ်ႇၵႃး ပဵၼ်လွင်ႈသိုၵ်းလူင် ပွင်ၸိုင်ႈဢမ်ႇၸွမ်းၶေႃႈလႆႈၸႂ်ၵၢၼ်ၵိုတ်းတိုၵ်း ဝႃႈၼႆ။
ၸၢႆးႁေႃသႅင် ၽူႈၶၢၼ်ပၢၵ်ႇ SHRF လၢတ်ႈတီႈၽူႈတွႆႇႁွၵ်ႈဝႃႈ “ လၢႆးႁဵတ်းသိုၵ်းမၢၼ်ႈၼႆႉ မၼ်းလူလၢႆၶေႃႈလႆႈၸႂ် တူၵ်း လူင်းၵိုတ်းယိုဝ်းတူဝ်ႈမိူင်းၵၼ်ၼၼ်ႉတႄႉတႄႉ။ ဢၼ်ႁၢင်ႈႁၢႆႉသုတ်းတႄႉ ပဵၼ်လွင်ႈတဵၵ်းတဵင်ပူၼ်ႉပႅၼ်သုၼ်ႇလႆႈၵူၼ်း မိူင်းယူႇဢမ်ႇထၢတ်ႇဢမ်ႇဝၢႆးၼၼ်ႉယဝ်ႉ။ လူင်ပွင်ၸိုင်ႈၵေႃႈ ပေႃးၵဵဝ်ႇလူၺ်ႈၵၢၼ်သိုၵ်းမႃးၼႆႉ ယဵၼ်သီႇသီႇ မိူၼ်တင်း ဢမ်ႇၵဵဝ်ႇၶွင်ႈ ဢမ်ႇဝႆႉလမ်ႇလွင်ႈၵူၼ်းမိူင်းသင်။ ၸႂ်ဢမ်ႇလီၸွမ်းၸၢတ်ႈပၢၼ်ၵူၼ်းမိူင်းႁဝ်းတႄႉတႄႉၶႃႈ” ဝႃႈၼႆ။
မိူဝ်ႈဝၼ်းတီႈ 25/3/2020 သိုၵ်းမၢၼ်ႈတပ်ႉ ၶလယ 225 ၊ ၶလယ 277 ၊ ၶမယ 519 သၢမ်တပ်ႉၵွင် ႁူမ်ႈႁႅင်းသိုၵ်း 35 ၵေႃႉ တႂ်ႈငဝ်ႈငုၼ်းၵုမ်းၵမ်ၽႅၼ်ၵၢၼ်ယၼ်ႇသိုၵ်း ၸၵၶ 14 (မိူင်းသၢတ်ႇ) ပႃႈတႂ်ႈ တိူင်းသိုၵ်းသၢမ်ၸဵင်ႇ (ၵဵင်းတုင်) ၵႂႃႇပိုတ်ႇၼႃႈသိုၵ်း ယိုဝ်းတပ်ႉသိုၵ်းၸိုင်ႈတႆး RCSS/SSA တီႈ ၵွင်းႁူဝ်ၼမ်ႉ ၸဵင်းၸၢၼ်း ဝၼ်းဢွၵ်ႇ ဝဵင်းမိူင်းတူၼ် ၸိုင်ႈတႆးပွတ်းဢွၵ်ႇ ။ ဝၢႆးၼၼ်ႉ ၶဝ်ႈဝၢၼ်ႈမိူင်းဢဵၵ်ႇ ဢိူင်ႇၾၢႆၶႄႇ ဢၼ်ပဵၼ်ဝၢၼ်ႈတႆး မီးလင်ႁိူၼ်း 35 လင် ၼၼ်ႉမႃးထဵတ်ႈ ထၢမ်လုင်းႁဵင် ၼၼ်ႇတိယ ဢႃယု 55 ။ ထၢမ်လွင်ႈသိုၵ်းတႆး ၼႄးလုင်းႁဵင် လဵင်ႉၶဝ်ႈသိုၵ်းတႆး။ ဝၢႆးၼၼ်ႉ ႁွင်ႉဢဝ်လုင်းႁဵင် လႄႈလုၵ်ႈၸၢႆးမၼ်း ၸၢႆးပီး ဢႃယု 25 ၵႂႃႇၸွမ်းၶဝ်တီႈပဵၼ်ပၢင်တိုၵ်းၼၼ်ႉယဝ်ႉ ၸင်ႇပွႆႇၸၢႆးပီး ပွၵ်ႈႁိူၼ်း ဝႃႈၼႆ။
တပ်ႉသိုၵ်းလူင်ပွင်ၸိုင်ႈ ၶိုၼ်းသိုပ်ႇၸႂ်ႉလုင်းႁဵင်ၵႂႃႇသူင်ႇတၢင်း သွၵ်ႈႁႃ သိုၵ်းတႆးၼႂ်းထိူၼ်ႇထႅင်ႈ။ လုင်းႁဵင်လႆႈၼွၼ်းၼႂ်း ထိူၼ်ႇသွင်ၶိုၼ်း ထိုင်ဝၼ်းတီႈ 28/3/2020 ၸင်ႇပွႆႇပွၵ်ႈႁိူၼ်း။ ၵူၺ်းၵႃႈ သိုၵ်းလူင်ပွင်ၸိုင်ႈမၢၼ်ႈတိုၵ်ႉၸႂ်ႉ လုင်းႁဵင် ဢဝ် ရူတ်ႉၵႃးမၼ်းတေႃႉသူင်ႇၶဝ်ၸွမ်း ဝၢၼ်ႈႁူဝ်ပၢင်လႄႈ ၼႃးပႃႇၵၢဝ်ၸိူဝ်းၼႆႉ ထႅင်ႈလူးၵွၼ်ႇ။
သိုၵ်းလူင်ပွင်ၸိုင်ႈမၢၼ်ႈလၢတ်ႈတီႈလုင်းႁဵင်ဝႃႈ “ တေဢမ်ႇလႆႈလဵင်ႉၶဝ်ႈၵူၼ်းထိူၼ်ႇၸိူဝ်းလူင်းလၢႆးမိုဝ်း NCA။ ႁႂ်ႈၶဝ်ယူႇ မိူင်းထႃး (ဢၼ်ၸမ်လႅၼ်လိၼ်ထႆး) ၶဝ်လူဝ်ႇၵႂႃႇယူႇ မိူင်းထႃးၵူၺ်းတေဢမ်ႇလႆႈမႃးယူႇၸိူဝ်းၼႆႉ။ ပေႃးသိုၵ်းတႆးမႃးထႅင်ႈ တေ လႆႈပွင်ႇၶၢဝ်ႇပၼ် ၶိုတ်းတၼ်း။ ပေႃးဢမ်ႇပွင်ႇၶၢဝ်ႇသေလႆႈႁူႉဝႃႈ လဵင်ႉၶဝ်ႈသိုၵ်းတႆးၼႆ ပူႇၵၢင်ႉမီးတၢင်းၽိတ်း” ဝႃႈၼႆ။
ဝၢႆးပၢင်တိုၵ်းသွင်သၢမ်ဝၼ်းယဝ်ႉ ၸဝ်ႈသိုၵ်းလူင်ဢွင်ႇတႅၵ်ႇ (အောင်သိုက်) တူဝ်ပိဝ်ႇႁႃႇမူး မိူင်းတူၼ် ပႃးသိုၵ်း ၼႂ်းတပ်ႉ မိူင်းတူၼ် ႁူမ်ႈမွၵ်ႈ 300 ၵေႃႉ ၶဝ်ႈၶူၼ်ႉသွၵ်ႈ တဝ်ၸွမ်းႁိမ်းဝၢၼ်ႈမိူင်းဢဵၵ်ႇ သွၵ်ႈတဝ်ႁႃ သိုၵ်းတႆးၵူႈႁူၺ်ႈၵူႈၵုင်း။ ၵႂႃႇသွၵ်ႈတဝ် ၸွမ်းပၢင်ၵႅင်း၊ ႁူဝ်ပၢင်ႇ၊ ၼႃးပႃႇၵၢဝ်၊ မႄႈၵႅၼ်း၊ မွၵ်ႇၸလီႇ၊ လွႆၼွၵ်ႇ၊ ႁူၺ်ႈသၢႆး လႂ်ၸိူဝ်းၼႆႉ ။ မၢင်ပွၵ်ႈ ၸႅၵ်ႇၵၼ်ပႂ်ႉၸွမ်းတၢင်းၽေ ၼိုင်ႈတီႈ သိုၵ်းသွင်ၵေႃႉ သၢမ်ၵေႃႉ တေႃႇထိုင်မိူဝ်ႈလဵဝ်။
မိူဝ်ႈဝၼ်းတီႈ 9-11/4/2020 ၼၼ်ႉၵေႃႈ သိုၵ်းလူင်ပွင်ၸိုင်ႈမၢၼ်ႈယိုဝ်းမၢၵ်ႇလူင်ၵႂႃႇတၢင်းလွႆၼွၵ်ႇ ဢၼ်မီးတၢင်းၸဵင်ႇ ၸၢၼ်းဝၼ်း ဢွၵ်ႇဝဵင်းမိူင်းတူၼ်ၼၼ်ႉသေ ႁၢမ်ႈၵူၼ်းဝၢၼ်ႈၵႂႃႇမႃးၼႂ်းထိူၼ်ႇထႅဝ်ၼၼ်ႉ ၼႂ်းၽိုၼ်တၢမ်းငဝ်းလၢႆး SHRF ဢွၵ်ႇဝႆႉၼင်ႇၼႆ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ