ပၢင်တိုၵ်း တပ်ႉသိုၵ်းလူင်ပွင်ၸိုင်ႈမၢၼ်ႈလႄႈ တပ်ႉသိုၵ်းရၶႅင်ႇ ပဵၼ်တီႈလႅၼ်လိၼ် မိူင်းၶျၢင်းလႄႈ မိူင်းရၶႅင်ႇ ႁၢဝ်ႈႁႅင်း ႁဵတ်းႁႂ်ႈၵူၼ်းမိူင်းၼႂ်းဝဵင်း ပလႅတ်ႉဝ မိူင်းၶျၢင်း ၼပ်ႉႁူဝ်ႁဵင် ယၢပ်ႇၽိုတ်ႇလွင်ႈ ၶဝ်ႈၼမ်ႉတၢင်းၵိၼ်။
မိူဝ်ႈဝၼ်းသဝ် ပူၼ်ႉမႃး 9/5/2020 ၼႆႉၸုမ်း WFP သူင်ႇၶဝ်ႈသၢၼ်တၢင်းၵိၼ်ႁႅင်ႈထိုင် ၵူၼ်းမိူင်း ပလႅတ်ႉဝ 3700 ပၢႆ ဝႃႈၼႆ။
ၸုမ်း WFP ဢွၵ်ႇလိၵ်ႈပိုၼ်ၽၢဝ်ႇၽိုၼ်ၼိုင်ႈဝႃႈ – ယွၼ်ႉပိူဝ်ႈ ပၢင်တိုၵ်းလႄႈ ၶူဝ်းၵိၼ်ၶူဝ်းယႅမ်ႉ ဢမ်ႇႁွတ်ႈထိုင်မိူင်းပလႅတ်ႉဝ လႆႈ။ ၵူၼ်းမိူင်း ဢိုပ်းယၢၵ်ႈ။ လႆႈႁႃၵိၼ် ႁူဝ်မႆႉႁူဝ်တွၵ်ႇ။ ယူႇတီႈ WFP တေၵႂႃႇသူင်ႇ ၶဝ်ႈၼမ်ႉတၢင်းၵိၼ်ၵေႃႈယၢပ်ႇၽိုတ်ႇ။ ယွၼ်ႉဢမ်ႇမီးလွင်ႈႁူမ်ႇလူမ်ႈ။ မိူဝ်ႈပူၼ်ႉမႃးလိူၼ် ဢေႊပရိူဝ်ႊဝၼ်းတီႈ 29 ၼၼ်ႉ ထႅဝ်ရူတ်ႉၵႃးတၢင်ႇၶဝ်ႈၼမ်ႉတၢင်းၵိၼ်ႁႅင်ႈ ဢၼ်ၸုမ်း WFP သူင်ႇၸူးမိူင်းပလႅတ်ႉဝ 5 လမ်းၺႃးယိုဝ်း။ ၵူၼ်းၸွမ်းရူတ်ႉၵႃး တိူဝ်ႉမၢတ်ႇၸဵပ်း ။ ၵူၺ်းၵႃႈ လႆႈၶတ်းၸႂ်သူင်ႇၶဝ်ႈၼမ်ႉတၢင်းၵိၼ် ႁႂ်ႈထိုင်ၼႂ်းမိုဝ်းၵူၼ်းမိူင်းပလႅတ်ႉဝ လီငၢမ်းယူႇ ။ ပွၵ်ႈၵမ်းၼႆႉၵေႃႈ လႆႈသူင်ႇထႅင်ႈၵမ်းၼိုင်ႈယဝ်ႉ- ဝႃႈၼႆ။
ယွၼ်ႉပိူဝ်ႈ ဢမ်ႇမီးလွင်ႈႁူမ်ႇလူမ်ႈလႄႈ ႁိူဝ်းတၢင်ႇၶူဝ်းၵိၼ်ၶူဝ်းယႅမ်ႉ ၵႃးတၢင်ႇၶူဝ်းၸႂ်ႉၶူဝ်းသွႆ ဢမ်ႇၸၢင်ႈတေႃႉၵႂႃႇၶၢႆမိူင်း ပလႅတ်ႉဝ ၸဵမ်မိူဝ်ႈႁၢင်ပီ 2019 ။ ၵွပ်ႈၼၼ်လႄႈ ၵူၼ်းမိူင်းပလႅတ်ႉဝ လႆႈၶၢႆဝူဝ်းၶၢႆၵႂၢႆး ၶၢႆတိူၵ်ႇႁႆႈလွၵ်းၼႃးပၼ်ၽူႈမၢၵ်ႈၵူၼ်းမီးသေ လႆႈဢွမ်ႈပႅင်းဝႆႉၵိၼ်ဝႆႉၸၢႆႇတႃႇၼႃႈႁိူၼ်းလႄႈ ယူႇတီႈ WFP ပဵၼ်ဢၼ်မႆႈၸႂ် တႃႇႁႃၵိၼ်လဵင်ႉတွင်ႉၵူၼ်းမိူင်းမိူဝ်းၼႃႈ ဝႃႈၼႆ။
မိူင်းပလႅတ်ႉဝ ၼႆႉ မီးႁိမ်းၾင်ႇၼမ်ႉ ၵလတၢၼ်ႇ ၊ လႅၼ်လိၼ်မိူင်းရၶႅင်ႇလႄႈ မိူင်းၶျၢင်း။ ပဵၼ်မိူင်းဢၼ်ယူႇဝၼ်းတူၵ်းသုတ်းတိတ်းၸပ်းလႅၼ်လိၼ် မိူင်းၿင်းၵလႃးၻဵတ်ႉသ် ယၢၼ်ၵႆၵၼ်တၢင်း လႅၼ်လိၼ် မွၵ်ႈ 18 ၵီႊလူဝ်ႊမီႊတိူဝ်ႊလႄႈ လႆႈဝႃႈပဵၼ်ၼႃႈလိၼ်ဢၼ်ယူႇၼႂ်းၵႄႈပၢင်တိုၵ်းသိုၵ်းသိူဝ်။ ပဵၼ်ၼႃႈလိၼ်ဢၼ်ၶဝ်ႈႁႃတိတ်းတေႃႇၵႂႃႇမႃးယၢပ်ႇ။
