ၵူၼ်းဝၢၼ်ႈ ၼႂ်းၸႄႈဝဵင်းသီႇသႅင်ႇ ႁူမ်ႈၵၼ်တုၵ်းယွၼ်းၶိုၼ်း တီႈလိၼ်သူၼ်ႁႆႈၼႃး တၢင်းၵႂၢင်ႈ မွၵ်ႈ 1,900 ဢေႊၶိူဝ်ႊ၊ ဢၼ်ၺႃးသိုၵ်းလူင်ပွင်ၸိုင်ႈမၢၼ်ႈ ယိုတ်းဢဝ်ၽွင်းႁၢင်လိူၼ်မေႊပူၼ်ႉမႃး။
မိူဝ်ႈၼႆႉ ဝၼ်းတီႈ 2/6/2020 ယၢမ်းၵၢင်ၼႂ် မွၵ်ႈ 8 မူင်း ၵူၼ်းဝၢၼ်ႈထီႇမၢၼ်ႈ တင်း ဝၢၼ်ႈၼွင်လူင် ၸႄႈဝဵင်းသီႇသႅင်ႇ ၸိုင်ႈတႆးပွတ်းၸၢၼ်း၊ ၸဝ်ႈသူၼ်ၸဝ်ႈၼႃး ႁူမ်ႈၵၼ် သၢၼ်ၶတ်းတုၵ်းယွၼ်းၶိုၼ်း တီႈလိၼ်သူၼ်ႁႆႈၼႃး ဢၼ်သိုၵ်းလူင်ပွင်ၸိုင်ႈႁုပ်ႈယိုတ်းဢဝ်ဝႆႉ တင်းမူတ်းမွၵ်ႈ 1,900 ဢေႊၶိူဝ်ႊၼၼ်ႉ ဝႃႈၼႆ။
ၵူၼ်းၼုမ်ႇ သီႇသႅင်ႇ ၵေႃႉၼိုင်ႈလၢတ်ႈတီႈၽူႈတွႆႇႁွၵ်ႈဝႃႈ “ၸႂ်ႈၶႃႈဢေႃႈ မိူဝ်ႈၼႆႉ ၵၢင်ၼႂ် ၸဵမ်ၵူၼ်းဝၢၼ်ႈ သိုၵ်းမၢၼ်ႈၶဝ် သုၵ်ႉသၵ်ႉၵၼ်ၵႂႃႇမူတ်းၶႃႈယဝ်ႉ မိူဝ်ႈၵႆႈၼႆႉ” ဝႃႈၼႆ။
တပ်ႉသိုၵ်းလူင်ပွင်ၸိုင်ႈမၢၼ်ႈ ဢၼ်ႁုပ်ႈယိုတ်းဢဝ်တီႈသူၼ်ႁႆႈၼႃးၵူၼ်းဝၢၼ်ႈထီႇမၢၼ်ႇလႄႈ ၼွင်လူင် 1,900 ဢေႊၶိူဝ်ႊ ၼၼ်ႉ ပဵၼ်တပ်ႉသိုၵ်း ၶလရ (ခြေလျင်တပ်ရင်း) 413 တင်း ၶလရ (ခြေလျင်တပ်ရင်း) 424 ။ ဝၢႆးၼၼ်ႉ သိုၵ်းလူင်ပွင်ၸိုင်ႈ ယိုတ်းဢဝ် ၸၢၵ်ႈထႆၵူၼ်းဝၢၼ်ႈတႃႇ 29 ၵၼ်း၊ လိူဝ်ၼၼ်ႉသမ်ႉပၢႆၸွႆးတြႃးပႃးၸဝ်ႈၶွင်တီႈလိၼ်သူၼ်တႃႇ 70 ၵေႃႉ။
ဢူးၸၢၼ်ႇဝိၼ်းမွင်ႇ ၽူႈၵွၼ်းပွၵ်ႉ ဢွင်ႇၶျၢမ်းသႃႇလၢတ်ႈတီႈၽူႈတွႆႇႁွၵ်ႈဝႃႈ-“ ယွၼ်ႉဝႃႈ ၸၢၵ်ႇထႆၶဝ်ၺႃးယိုတ်းလႄႈ ၸဝ်ႈသူၼ်ၶဝ်ဢမ်ႇၸၢင်ႈၵႂႃႇထႆသူၼ်။ ၶဝ်ဢမ်ႇမီးဝူဝ်းမီးၵႂၢႆးယဝ်ႉလႄႈ လႆဢဝ်ႁႅင်းၵူၼ်းၸႂ်ႉၶိုၼ်းမိူၼ်မိူဝ်ႈပၢၼ်ၵဝ်ႇၵဝ်ႇၼၼ်ႉ။ ႁဵတ်းႁႂ်ႈၸဝ်ႈသူၼ်ယၢပ်ႇၽိုတ်ႇတႃႇၽုၵ်ႇသွမ်ႈ”
ယၢမ်းလဵဝ် ၸဝ်ႈသူၼ် 70 ၵေႃႉၼၼ်ႉၺႃးၸွႆးတြႃးဝႆႉတီႈႁူင်းပလိၵ်ႈ သီႇသႅင်ႇ။
ဢူးၸၢၼ်ႇဝိၼ်းမွင်ႇလၢတ်ႈဝႃႈ – လိၼ်သူၼ် ဢၼ်ၶဝ်ယိုတ်းၼၼ်ႉ ပဵၼ်လိၼ်ပူႇမွၼ်ႇၼၢႆးယႃႈ ပိူၼ်ႈမႃးပၢၼ်သိုပ်ႇပၢၼ်။ မီးၸိုဝ်ႈဝႆႉၼႂ်းသဵၼ်ႈမၢႆ ၾၢႆႇၼႂ်းမိူင်းယဝ်ႉ။ ယၢမ်းလဵဝ် သမ်ႉထိုင်မႃးၶၢဝ်းၽုၵ်ႇသွမ်ႈထႅင်ႈၵမ်း႞ယဝ်ႉလႄႈ ၸဝ်ႈသူၼ်ၸဝ်ႈႁႆႈၸဝ်ႈၼႃးၶဝ်ယၢပ်ႇၽိုတ်ႇ လိူဝ်ႁႅင်း- ဝႃႈၼႆ။
ယၢမ်းလဵဝ် ၸဝ်ႈလိၼ်သူၼ်ပွတ်းၸေႊဝဵင်းသီႇသႅင်ႇၼႆႉ ပၢႆလိူဝ်ဢမ်ႇလႆႈၽုၵ်ႇသွမ်ႈလီလီ ၊ သမ်ႉပၢႆၺႃးၸွႆးတြႃး ဢဝ်လိူင်ႈထႅင်ႈလႄႈ တေလႆႈတေႃႇသူႈ ၶိုၼ်ႈလုမ်းတြႃးၵႂႃႇထႅင်ႈ၊ ႁူပ်ႉတၢင်းယၢပ်ႇၽိုတ်ႇလိူဝ်ႁႅင်း။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ